Na manino le eseese o molimau sa tu’uina atu e le Peresetene o le Faletupe o Atina’e a le malo ma le Peresetene o le Kamupani Va’alele a le Tausani, i le taimi na fesiligia ai i laua e afioga i Senatoa i le taeao ananafi e fa’atatau i le nonogatupe a le Tausani lea sa maua mai i le Faletupe o Atina’e, ma le fa’amoemoe e fa’atau mai ai va’alele mai Guam e tautuaina le itumalo o Manu’a.

O le agaga o le iloiloga e pei ona valaauina ai e le afioga i le ali’i ta’ita’ifono o le Komiti o Pulega o Uafu ma Malaeva’alele ia Paepae Faiai, o le fa’amalamalama lea i le Fono ma le atunu’u o le tulaga ua oo i ai le nonogatupe a le kamupani va’alelea le Tausani, i le mafua’aga e lei mae’a ai ona tuuina atu le nonogatupe atoa sa talosagaina, ae pe ua i ai se vaega o lenei nonogatupe ua mae’a ona toe totogiina atu.

Saunoa Ruth Matagi-Fa’atili i lana molimau e fa’apea, o le ulua’i talosaga sa tu’uina atu e le kamupani va’alele a le Tausani i le Faletupe o Atina’e, e mana’omia se nonogatupe e $400,000 e fa’atau mai ai va’alele e 2 mai Guam, ma galulue ai loa le Faletupe ma le Komiti Fa’afoe i le iloiloina o le talosaga, ma i’u ina taliaina ai le tu’uina atu o le nonogatupe.

Ae o le mafua’aga na ala ai ona toe sui le fa’aiuga a le Komiti Fa’afoe ma le Faletupe o Atina’e e le tu’uina atu uma le nonogatupe sa talosagaina, ina ua alu atu le asiasiga a le Komiti Fa’afoe i le kamupani va’alele a le Tausani ma iloa ai, ua sui le va’alele lea ua fuafua le Tausani e fa’atau, e le o va’alele e 2 mai Guam, ae o le va’alele a le malo, le Segaula lea ua sauni le kamupani e fa’atau.

Ae na taua e Filifa’atali Michael Fuiava i lana saunoaga e fa’apea, o le ulua’i talosaga sa tu’uina atu i le Faletupe mo le nonogatupe, sa aofia ai ma le va’alele o le Segaula, ae talu ai ua toe suia le fa’aiuga a le Komiti Fa’afoe e ui ua mae’a ona sainia, na mafua ai loa ona faia le fa’aiuga e fa’atau loa le va’alele a le malo.

Ae na toe fa’amanino e Matagi-Fa’atali i luma o le maota e fa’apea, e lei aofia i le ulua’i talosaga a le Tausani sa latou fuafuaga e fa’atau le Segaula i le nonogatupe, ae o le isi aso ina ua oo atu le “susuga i le Fa’afeagaiga” ia Filifa’atali i luma o le Komiti Fa’afoe, na fa’atoa ia faailoa atu ai le suiga ua i ai la latou fuafuaga, o le faia lea o le latou lisi ma le va’alele a le malo, le Segaula.

Mai le nonogatupe e $400,000 sa talosagaina e le Tausani, e na o le $250,000 le nonogatupe na mafai ona tuuina atu e le Faletupe, e pei ona manino i le molimau a Matagi-Fa’atili, ae na saunoa Filifa’atali e fa’apea, ina ua fa’ailoa atu e le Faletupe le talia aloaia o le nonogatupe, sa folafola atu ai loa o le aso e sosoo ai e piki ai le siaki, peita’i ina ua alu atu le sui o le kamupani o le Tausani ia Su’a Alexander E. Jennings e piki mai le siaki, e leai se mea na maua atu, ae na fa’atoa maua atu ina ua tuana’i masina e lua, ae na o le $50,000 le siaki sa maua atu.

O le $200,000 na tauaao mulimuli atu e le Faletupe, e ala i siaki e 2 e ta’i $100,000 i le siaki e pei ona fa’amaonia i le molimau a le peresetene o le Faletupe i luma o le komiti.

O se tasi o itu sa fesiligia e senatoa, o le talia lea o le nonogatupe ae leai ni meatotino e fa’amaonia ai le nonogatupe, e pei ona faia e le tele o faletupe ma nonogatupe, ae na taua e Matagi-Fa’atili, sa fa’aaoga e le Faletupe ia tupe maua a sui sa talosagaina le nonogatupe e avea ma meatotino e fa’amaonia ai le talosaga.

Na fesili Gaoteote Palaie Tofau pe aisea na mumusu ai le Faletupe e fa’amatu’u le vaega o le nonogatupe o loo totoe, ae na tali le tama’ita’i peresetene o le Faletupe, o le fautuaga mai le Komiti Fa’afoe ina ia taofiofi le tuuina atu atoa o le tupe, ina ua latou maua sa i ai se tulaga faaletonu i le itu tau tupe na tula’i mai i le kamupani mai Guam lea sa fa’amoemoe e fa’atu mai ai va’alele.

Saunoa atili Gaoteote e fa’apea, e le taua le taumafai e saili poo ai e sa’o ao ai fo’i ua sese i le mataupu lenei, ae o le itu taua e tatau ona saili, ia manino pe faafefea ona toe maua le tupe a le faletupe o atina’e.

Saunoa Matagi Fa’atili e fa’apea, o loo latou galulue ma le ofisa o le loia i le fa’atulagaina o auala taitasi e toe maua mai ai le latou tupe ua leiloa.

Ae talu ai le umi o tu le va’alele a le Segaula e le o fealua’i, na taua ai e Filifa’atali le tele o isi manaoga ua alia’e mai i totoga o le va’alele, lea ua mana’omia ai isi tupe fa’aopoopo e toe fa’aleleia ai tulaga ia

Ua toe taoto atu nei le mataupu i le va o le faletupe ma le kamupani va’alele, mo le toe faia o isi feutanaiga e fa’amautu ai tulaga e pei ona fesiligia e le fono.