Ua fa’afetaia e le to’atele o matua na maua le avanoa e siaki ai a latou fanau e foma’i fa’apitoa o le fatu mai fafo, le tautua fa’aauau pea a le Vaega o Foma’i fa’apitoa o le fatu lea sa i ai i le atunu’u i le vaiaso na te’a nei, ina ua mafai ona maua lenei avanoa e fa’aauau ai pea le tautua ofo fua mai a foma’i fa’apitoa nei mo alo ma fanau a le atunu’u o lo o maua i gasegase o le fatu.

I se fa’atalatalanoaga ma le Samoa News i le fa’aiuga o le vaiaso na te’a nei, na taua ai e ni isi o matua le agaga fa’afetai i le Pulega a le Falema’i o le LBJ i Faga’alu, ona o le avanoa o lo o maua e alo ma fanau a le atunu’u i tausaga ta’itasi e siaki ma togafiti ai e foma’i fa’apitoa nei mai fafo e aunoa ma se totogi.

“O le 2 lenei o tausaga talu ona vaai e foma’i fa’apitoa o le fatu mai Amerika la’u tama o lo o a’afia i le gasegase o le fatu, ma ua molimauina fo’i suiga i togafiti ma talavai o lo o faia, ma o se tulaga lea e lagona ai le fa’afetai i le malo aemaise ai foma’i mai fafo, ona o le avanoa ua mafai ona latou faia fua ai nei auaunaga mo fanau a le atunu’u”, o le molimau lea a le Tina ia Talalelei Unuto’a o Nu’uuli.

E tasi le vaiaso na fa’atinoina ai le auaunaga a Foma’i mai le Iunivesite o Oregon Health Science (OHSU), ao le i toe tu’u va’a ese atu ma le atunu’u i le po o le aso Faraile na te’a nei, e pei ona fa’amaonia mai e sui o le Vaega o Foma’i fa’apitoa ai le Falema’i a le LBJ i le Samoa News.

Ina ua fesiligia e le Samoa News le vaega e togafiti ai fanau i le falema’i o le LBJ i le aso ananafi, na taua ai e le tama’ita’i tausima’i sinia ia Laufofoga Ale le to’atele o matua ua mae’a ona fa’atulaga avanoa mo a latou fanau e vaai ai le foma’i mo le vaiaso fou.

“O fanau uma lava ia ua mae’a ona fa’atulaga a latou avanoa, o i latou ia o lo o fa’aauau pea ona faia a latou tui puipui i tausaga uma lava e malaga mai ai le vaega lenei o foma’i o le fatu mai Amerika, o lea fo’i la sa tatala le avanoa i matua ma fanau e valaau mai ai i le falema’i poo le vaega o le Soifua Maloloina, mo le fa’atulagaina o avanoa e vaai ai fanau i le vaiaso atoa na te’a nei”, o le saunoaga lea a le tama’ita’i tausima’i ia Ale..

Sa ia taua atili e fa’apea, o le tautua a le vaega lenei o foma’i e ofo fuaina mai mo le atunu’u, ma o se avanoa lelei fo’i lea mo matua e fa’aauau ai le siakiina o fanau o lo o a’afia i le gasegase o le fatu.

E pei ona taua e Ale, o le vaega lenei o foma’i o le fatu na amata osia lenei galuega fai fa’atasi ma le LBJ i le 6 tausaga talu ai, ina ua talosagaina sa latou fesoasoani mo le togafitiga o fanau e a’afia i le gasegase o le fatu, ma fa’aauau mai ai lava seia oo mai i le taimi nei, ina ua malaga mai ona sui e ofo fua mai lenei tautua mo Amerika Samoa.

E le gata na fa’atinoina le tautua masani a foma’i fa’apitoa o le fatu mo fanau a le atunu’u, ae sa mafai fo’i ona latou fa’atinoina ni aoaoga mo foma’i ma i latou o lo o galulue i le tausiaina o le soifua maloloina a le falema’i ma le Matagaluega o le Soifua Maloloina, i auala e a’oa’oina ai i latou i le sailia lea o ‘auga o ma’i eseese o lo o a’afia ai fanau, e pei o le gasegase o le fatu, fa’apea ai ma le gasegase o le “rheumatic fever”, lea ua ta’atele i le atunu’u i le taimi nei.

I le maua ai i fa’amaumauga le to’atele o fanau i Amerika Samoa o lo o maua i le gasegase o le “rheumatic fever”, na taua ai e Ale le tele o metotia na mafai ona a’oa’oina ai le aufaigaluega fa’apea ai foma’i a le atunu’u e le Vaega o Foma’i fa’apitoa sa malaga mai, i metotia ma auala eseese e fesoasoani ai i le fa’atinoina o le latou tautua i le atunu’u.