Ads by Google Ads by Google

Fa’afetaia sui Manu’a taumafaiga Aumua fa’aleleia auala femalagaaiga


Le taimi o le feiloaiga a le sui faipule mai le laumua i Uosigitone [ata AF]

Le va’alele o le Polenisia i le malae va’alele i Fitiuta i Manu’a. [ata AF]
ausage@samoanews.com

Na taua e sui Senatoa ma Faipule mai le itumalo o Manu’a o latou finagalo fa’afetai ina ua manino taumafaiga a le sui faipule a le atunu’u i le laumua i Uosigitone, i lona taumafai lea e fa’aleleia tulaga o femalagaaiga i luga o le ea mo Manu’a.

 

Na taua e le afioga i le ali’i senatoa ia Misaalefua J. Hudson lona lagona fiafia ina ua manino i le molimau a Aumua Amata i le feiloaiga ma le Fono Faitulafono i le vaiaso na te’a nei, o loo ia finau pea e tulei le mataupu e fa’a faigofie ai tulaga o femalagaaiga mo Manu’a, e ala i se tulafono ua mae’a ona ia fa’aulu i luma o le Konekeresi a Amerika.

 

“Ou te iloa e le faigofie le fa’amoemoe o le tama’ita’i faipule i le unaia o lenei mataupu, ae ou te manatu o se tasi lenei o mataupu e sili ona taua mo Manu’a, ona ua tele tausaga o tulaga fa’aletonu pea femalagaaiga i luga o le ea ma le sami mo le itumalo”, o le saunoaga lea a Misaalefua na lagolagoina e le afioga i le ali’i faipule ia Vesi Talalelei Fautanu Jr.

 

Sauna Vesi e fa’apea, e ui i le tele o mataupu eseese o loo galue ai Aumua mo le manuia o Amerika Samoa, ae o lo o aofia atu ai lava ma le mataupu e fa’atatau i le fa’aleleia o tulaga tau femalagaaiga mo Manu’a, ina ia fa’afaigofie ai ona tautua va’alele ma isi kamupani i malae va’alele o loo pulea e le malo tele o Amerika.

 

“E taua le sao o le tama’ita’i faipule i le unaia o lenei tulafono e fa’aleleia atili ai tulaga tau femalagaaiga o Manu’a, o le agaga fa’afetai fo’i lena e fia tuuina atu i le faipule i le Konekeresi, ona o lona finau i mea lelei e manuia ai le itumalo ma ona tagata”, o le saunoaga lea a Vesi.

 

O se tasi o mataupu na fa’ailoa e Aumua i le ulua’i feiloaiga ma le Fono Faitulafono i lenei tausaga i le vaiaso na te’a nei, o le mataupu e fa’atatau i lana pili sa fa’aulu lea ua pasia i le maota o sui, ae o loo iloiloina e le Komiti a le maota maualuga, e talosagaina ai le Ofisa e Pulea Malaeva’alele a le malo tele o Amerika (FAA), mo se avanoa e tu’u atu ai i le 6 masina le umi o le pemita e lele ai le va’alele a le Polenisia mo le tautuaina o femalagaaiga i Manu’a, nai lo le pemita lea o lo o i ai nei e ta’i 30 lava aso ma fa’afou.

 

Na fa’amanino e Aumua i luma o le Fono Faitulafono e fa’apea, e le mafai ona tupu lea tulaga mo Manu’a se’i vagana ua sui le tulafono i tulaga tau femalagaaiga a le Iunaite Setete o lo o i ai, lea fa’asa ai se isi kamupani va’alele e le o i lalo o le fa’amalu a le FAA ona felelea’i i malae va’alele o loo i lalo o le vaavaaiga a le FAA.

 

“O le pogai lena o le fa’aletonu i tulaga tau femalagaaiga i le va o motu o Tutuila ma Manu’a, ona e le o i ai se va’alele mai fafo e fia tautuaina lea alava’a, ae afai fo’i e i ai se va’alele mai fafo e fia tautua i le va lea e pei o le Polenisia o loo i ai nei, e tatau ona talosaga lea kamupani va’alele mai fafo mo le pemita e 30 aso le umi, ae afai e manuia le tulafono taufa’aofi o loo taumafai atu i ai, ona faigofie ai loa lea ona foia le fa’afitauli e pei ona tele tausaga o tula’i mai i Manu’a”, o le saunoaga lea a Aumua.

 

Sa ia taua fo’i lo latou galulue soosoo tauau ma sui o le maota o sui ma le senate a le konekeresi, i le fa’a faigofieina o tulaga e pei ona taua, ina ia mafai mafai ai ona manuia taumafaiga o loo fuafuaina mo lenei mataupu.