I fa’amaumauga na mafai ona fa’ailoa e le susuga a Meleisea Vai Filiga i luma o le Fonotaga lona 7 a le Vaega o Soifua Maloloina i le taeao o le aso Tofi na te'a nei, na taua ai le maualuga o le aofa’i o tupulaga talavou ua maua o lo o latou tagofia le ‘ava malosi fa’apea ai ma fualaau fa’asaina i le 2 tausaga talu ai.

I le va o le 2013  ma le 2014 i Amerika Samoa, sa fa’atautaia ai se su’esu’ega i le tulaga o lo o i ai le faitau aofa’i o Amerika Samoa, o le saoasaoa o pepe fananau mai, o le aofa’i o tagata ua maliliu, aemaise ai fa’amaumauga fa’aopoopo e fa’atatau i ituaiga soifuaga o lo o fiafia tagata e ola ai.

Mai le aofa’i e to’a 62,610 sa i ai fa’amaumauga mo Amerika Samoa i le 2 tausaga talu ai, e foliga mai sa maitauina i su’esu’ega le avea o le gasegase o le fatu, o le mafua’aga pito sili lea ona to’atele tagata na maliliu ai, ae mafuli lava i le itupa o ali’i.

Sa taua fo’i i lea su’esu’ega valoaga o le umi o tausaga e soifua ai Tina i le 78 tausaga, nai lo Tama i le 71 tausaga le matutua.

I amioga ma gaioiga a tupulaga, o le 40% o tupulaga e fiafia e tagofia le ‘ava malosi, fa’atusatusa i le 66% o tupulaga o lo o tagofia le ‘ava malosi i Amerika, ae o le to’atasi mai le to’atolu o tupulaga talavou e tagofia le ‘ava malosi, sa latou maua mai a latou ‘ava malosi mai isi tagata matutua, ina ua latou foa’i pe ofo fua atu mo i latou le ‘ava malosi.

I le tulaga i tupulaga e ulaula tapa’a, e maualuga atu le aofa’i o tupulaga i Amerika Samoa latou te tagofia le tapa’a i totonu o lotoa o aoga i le 10%, fa’atusatusa ia Amerika e na o le 4%, ae mo tupulaga talavou ma fanau aoga e tagofia fualaau fa’asaina, e tusa ma le to’a 30% o fanau aoga ma tupulaga talavou latou te tagofia fualaau fa’asaina, fa’atusatusa ia Amerika e na o le 22%.

O ia fa’amaumauga o lo o atagia mai ai le fa’atupulaia i luga o le aofa’i o tupulaga talavou ma fanau aoga latou te tagofia fualaau fa’asaina ma le ‘ava malosi, talu mai le tausaga e 1993 seia oo mai i le 2014.

I totonu fo’i o itumalo ma afioaga eseese, o lo o maua ai fo’i i fa’amaumauga le to’atele o tupulaga talavou e fiafia i le ava malosi ma fualaau fa’asaina, ma o ni isi o i latou ua o o atu ai i isi tulaga e pei o le molia i le tulafono ma fa’a falepuipui, e mafua mai i lo latou tagofia o fualaau faasaina ma le ‘ava malosi.

E le gata i fa’amaumauga i soifuaga ma amioga o tupulaga ma fanau aoga sa mafai ona fa’alauiloa, ae na mafai fo’i ona fa’alauiloa soifuaga masani a tagata matutua i Amerika Samoa, i latou e fiafia i le ‘ava malosi ma le ulaula tapa’a.

I suesuega o lo o taua ai e fa’apea, i totonu o Amerika, o le 31% o tagata matutua e fiafia i le ‘ava malosi, ae mo Amerika Samoa, o le to’a 22% o tagata matutau e fiafia i le ‘ava malosi, tusa lea o le 28% o tamaloloa latou te tagofia le ‘ava malosi ae o fafine e na o le 15%.

O le vaega mulimuli o le su’esu’ega o lo o tu’uina mai ai se fa’atusatusaga i le tamaoaiga o aiga i Amerika ma Amerika Samoa, e pei ona i ai i le $50,000 tupe maua e aiga e feololo le tamaoaiga i Amerika, ae na o le $23,000 i Amerika Samoa.

I le aotelega o le folasaga a le afioga a Meleisea e pei ona fa’ailoa i luma o le Fonotaga a Samoa e lua, o le isi lenei tulaga o lo o mafua ai a’afiaga i le soifua maloloina o tagata lautele, o le tagofia o le ‘ava malosi, fualaau fa’asaina ma le tapa’a i taimi ao laiti seia o o ina avea ma tagata matutua.

O le fautuaga e pei ona folasia i luma o le fontaga, e tatau ona fa’aitiitia le tagofia e tagata o nei fa’afitauli.