Na fa’aaoga e le afioga i le ali’i Kovana ia Lolo Matalasi Moliga le fonotaga a lana Kapeneta i le vaiaso na te’a nei, e fa’amanino ma toe fa’amalosia ai le mataupu e fa’atatau i livi tausaga a tagata faigaluega uma a le malo.

Na taua e le ali’i kovana e fa’apea, o se tasi lenei mataupu o lo o to’atele pea tagata faigaluega a le malo e le o malamalama ai, e o o lava fo’i i Faatonusili.

A o lei tu’u atu e le ali’i kovana le avanoa i le Fa’atonusili o le Matagaluega o Tagata Faigaluega a le malo mo le fa’apupulaina atili o le mataupu i livi tausaga, na toe fa’amanatu e Lolo i ana Faatonusili le tatau lea ona latou fa’amalamalama i tagata faigaluega le tulafono o livi tausaga, ina ia mautinoa o lo o malamalama uma i latou.

E ui ua avea o se mataupu e talanoaina so’o lenei mataupu i le faigamalo a Lolo ma Lemanu, peita’i na taua e le tofa Le’i Sonny Thompson le taua o le malamalama o tagata i le aofa’i o itula livi e tatau ona latou maua i tausaga faigaluega ta’itasi.

“I lalo o le tulafono, e 480 itula livi e mafai ona tauave mai e le tagata faigaluega mai tausaga ta’itasi, afai la e uma ane le tausaga ua silia i le aofa’i lea itula livi o le tagata faigaluega ua i ai, o le fautuaga mo outou Fa’atonusili, ia fautua i au tagata faigaluega e ave a latou livi ina ne’i ma’imau”, o le saunoaga lea a Le’i.

Sa ia fa’amalamalamaina fo’i e fa’apea, afai o le a mae’a le tausaga faigaluega, e 60 aso le umi e tu’u atu e le tulafono i le tagata faigaluega e amata ai ona ave ona itula livi o lo o ova atu ma le 480, ae afai e mae’a le 60 aso e lei aveina lava livi a le tagata faigaluega, o le a ma’imau le toe maua.

Saunoa Lolo e fa’apea, o ni isi o tagata faigaluega ua avea le mumusu e ave itula livi ma auala ua fai ai alofaga ina ia le mafai ai ona fa’ataga i latou e malolo.

“O isi tagata faigaluega ua avea le mumusu e ave a latou itula livi ma itu ua fai ai alofaga fai mai, e le mafai ona o e livi ona e pisi tele a latou galuega, o le fautuaga mo outou Fa’atonusili, fautua i tagata faigaluega e ave a latou itula livi, ina ne’i le aoga ona ma’imau lea o le tigaina na maua ai nei livi e tele”, o le isi lea fautuaga a le ali’i kovana.

O se tasi o itu na taua e le ali’i kovana o lo o taumafai ai pea le malo e fa’asa’osa’o, o le ova maualuga o livi tausaga a ni isi o tagata faigaluega, ae o lea o lo o manino le tulafono i le aofa’i o livi e tatau ona i ai.

“E i ai isi tagata faigaluega ua ova i le ta’i 2,000 itula livi ua i ai, ae le o iloa mafua’aga e ala ai ona oo le aofa’i o livi i lea maualuga, e le tatau ona toe tutupu mai ni fa’aletonu e a’afia ai le malo, ae tatau lava ona fautuaina e outou Faatonusili ia tagata faigaluega e usita’i ma mulimuli i le tulafono”, o le fautuaga fa’ai’u lea a le ali’i kovana.