A o lumana’i ai le tatala aloaiaina o le Faletupe fou a le malo lea ua fa’amoemoe e tatalaina ona faitoto’a i le taeao nei, o le masina na te’a nei o Setema na tauaaoina ai e le afioga i le ali’i kovana ia Lolo Matalasi Moliga, se tusi fa’amanuia mai le Ta’ita’ifono o le Faletupe a Hawaii, susuga Peter Ho, e tusa ai o taumafaiga a le malo mo le tatalaina o lana faletupe fou i le atunu’u.

Na taua e le susuga Peter Ho ia Lolo lona lagona fa’agae’etia, i le aloaia lea e le malo o Amerika Samoa o le tautua a le Faletupe a Hawai’i i le atunu’u, atoa ai ma le taimi sa latou galulue tai mo le tau fa’amautuina o le Faletupe fou a le malo, le Territorial Bank of American Samoa.

“E maualuga lo’u talitonuga e tele lima sa galulue mo le tu’ufa’atasia o lenei fa’amoemoe ina ia tula’i mai i se tulaga manuia mo le atunu’u”, o se vaega lea o le tusi a Peter Ho ia Lolo.

“O le galuega e pei ona outou ausia i le taimi nei, o le ata vaaia lea o le galuega sa outou fita i tuga i ai, ma galulue fa’atasi ai le to’atele ina ia i’u manuia. Lea la ua tula’i mai lenei fa’amoemoe i se tulaga manuia, matou te momoli atu ai le agaga o le fa’afetai atoa ai ma fa’amanuiaga i lau afioga ma le faigamalo, e tusa ai o le galuega sa galulue i ai la outou vaega, lea ua taunu’u ma le manuia”, o se vaega lea o le tusi fa’amanuia a Peter Ho i le ali’i kovana ia Lolo.

E ui i se naunau o le faigamalo ina ia auai le ali’i Ta’ita’ifono ia Peter Ho i le sauniga e tatala aloaia ai le Faletupe fou, peita’i na fa’amalulu mai le ali’i Ta’ita’ifono i le ali’i kovana ma le malo, ona o tulaga i ana faigamalaga ua mae’a ona fa’ataoto, lea ua le mafai ai ona ia auai mai e molimauina lenei galuega taua.

“Ae ui i lo’u le auai i lenei fa’amoemoe taua, e le mafai ona tuua i lalo le maualuga ma le taua o lenei atina’e ua ausia e le malo o Amerika Samoa, atoa ai ma le taua o le tautua sa mafai ona ofoina atu e le lala o le Faletupe a Hawaii i le teritori”, o le saunoaga lea a le ali’i Ta’ita’ifono.

O sui o le Faletupe a Hawaii o le a auai i le sauniga e tatala aloaia ai le Faletupe fou a le atunu’u, e aofia ai le susuga ia Mark Rossie, o le Sui Ta’ita’ifono lea a le Faletupe o Hawaii, lea ua leva ona galulue soosoo tauau ma le malo o Amerika Samoa i le tele o taumafaiga mo le sailiina o se isi faletupe fou e sui tulaga i le Faletupe a Hawai’i o le a tula’i ese, fa’apea ai ma le susuga ia Hobbs Lowson, o le Sui Peresetene Sinia lea o le Faletupe.

“Fa’afetai Amerika Samoa e tusa ai o le taimi sa tatou mafuta ai, ma fa’amanuia atu i la outou fa’amoemoe e pei ona fa’ataunu’uina ma le manuia, e ala lea i le alo atu mo le tatala aloaiaina o la outou faletupe fou”, o upu fa’ai’u lea o le saunoaga a le susuga a Peter Ho.

O le itula e 10:00 i le taeao nei lea ua fa’amoemoe e amata aloaia ai le saunoaga mo le tatalaina o le faletupe fou a le atunu’u, e aofia ai le sauniga lotu faapea ai ma le ootiina o le lipine, ao lumana’i ai le tatalaina o lana tautua mo le atunu’u i se taimi o le aoauli.

O le vaiaso na te’a nei na valaaulia fa’apitoa ai e ta’ita’i o le fono faitulafono afioga i Senatoa ma Faipule, ina ia auai i le sauniga e tatala aloaia ai le faletupe fou i le taeao nei.

E pei ona silafia, o le nofoaga tuai o le faletupe a Hawaii i Utulei, lea ua avea nei ma nofoaga autu o le Faletupe o le Teritori a Amerika Samoa, lea ua silia i le 2 vaiaso o galulue ai le konekarate kamuta a le Nana Constructions Inc mo le toe lipeina o le tele o vaega o le maota, a o lumana’i ai le tatalaina atu i le atunu’u.

E ui o se nofoaga ua masani ona afea e le to’atele, e le gata i totonu ae fa’apea fo’i i le vaega e paka ai ta’avale, peita’i o nai suiga fou e pei ona molimauina i le aso Faraile na te’a nei, ua atagia mai ai le sauni o le malo e tatala le nofoaga fou mo lana faletupe ua tele masina ma tausaga o taumafai ai.