Ads by Google Ads by Google

Fa’ateia to’atele tagata faigaluega fa’aiuga tapunia STP taimi le tumau


Ni isi o tagata faigaluega a le Samoa Tuna Processor i le taeao ananafi. [ata AF]
ausage@samoanews.com

Na taua e le to’atele o tagata faigaluega a le lala a le kamupani o le Tri-Marine i Amerika Samoa, le Samoa Tuna Processor (STP) lo latou fa’ateia tele, ina ua latou maua le fa’asilasilaga e fa’atatau i le fa’aiuga a le Kamupani o le Tri-Marine, o le a fa’amuta i le fa’aiuga o le tausaga lenei le tautua a le STP mo le gaosia lea o taumafa tu’uapa e pei ona latou galulue ai i aso ta’itasi.

 

E eseese uma fa’amatalaga na mafai ona fa’asoa mai e tagata faigaluega i le Samoa News, ina ua fesiligia i latou i le taeao ananafi i ni o latou lagona e fa’atatau i lenei fa’aiuga.

 

Na taua e se Tama e 56 tausaga le matua mai Nuuuli e fa’apea, o se tala fa’anoanoa lenei tala, ona o lea fa’atoa amata le tautua a le STP a o lenei ua toe fa’alauiloa mai lana fa’aiuga o le a tapuni lana tautua.

 

“E le o se tala fiafia lenei tala mo a’u, o le galuega lenei o lo o fa’amoemoe i ai le aiga, a o lenei ua fa’ailoa mai le sauni o le kamupani e tapuni le isi vaega o lana tautua, lona uiga o le a tau toe saili fo’i se isi galuega fou”, o le saunoaga lea a le Tama.

 

Ina ua fesiligia e le Samoa News le molimau po o anafea na fa’ailoa atu ai e le pulega a le STP le fa’aaliga lenei i tagata faigaluega, na tali le molimau, “O ananei i le taeao (taeao ananafi) i le taimi o le faigalotu”.

 

Na taua e se tasi o Tina lagona fa’anoanoa ma le le mautonu e pei ona fa’aalia e le ulua’i molimau na fesiligia e le Samoa News. Na taua e le Tina lea e fa’apea, ua avea suiga i fa’aiuga o lo o faia i totonu o le malo, Pasefika ma le lalolagi ua a’afia atu ai ma galuega laiti o lo o tua i ai aiga lima vaivai e pei o lona aiga.

 

“Ou te iloa lava o fa’aiuga e pei ona a’afia ai va’a fagota o lo o latou la’u mai i’a e fa’aaoga e kamupani tu’uapa i lo tatou atunu’u, o le isi lea mafua’aga o nei mau fa’afitauli, ae lagona ai lava le fa’anoanoa o a’u nei le Tina, soo se taimi e tutupu ai fa’afitauli fa’apenei, e pito sili ai lava ona pagatia aiga lima vaivai e pei o a’u ma lo’u aiga, aua afai ae mae’a le masina o Tesema o le tausaga nei, lona uiga o le a le toe maua fo’i sa’u galuega e tausi ai lo’u aiga”, o le saunoaga lea a lea Tina.

 

E to’a 5 isi ali’i sa ese o latou lagona na fa’ailoa i le Samoa News e fa’atatau i le mataupu lenei.

 

Ina ua fesiligia i latou i ni o latou lagona e fa’atatau i le fa’aiuga e tapunia ai le tautua a le STP, na taua ai e le isi ali’i e faapea, “O le tala fiafia lea ua fa’ailoa mai ia i matou i le taeao nei (taeao ananafi), e le umi le taimi lea o le a malolo ai le STP ae toe tula’i mai le isi kamupani fou na te fa’aauauina le galuega, lona uiga la, e le o se taimi o le malologa, ua na o aso fiafia lava o le fa’aiuga o le tausaga lea ua fa’amoemoe e malolo ai le kamupani”.

 

Ae na taua e le isi molimau e fa’apea, “O le tele ia o le mau tala o lo o salalau solo i totonu o le kamupani e uiga i lenei mataupu, o lo o fai mai isi e i ai le kamupani fou lea ua sauni e sui tulaga i le STP, ae fai mai le isi tala e na o aso fiafia lava o le fa’aiuga o le tausaga lea ua fa’amoemoe e malolo ai le kamupani ona toe tatala lea, poo fea lava le tala e sa’o, o le mea moni lava ia, ua ese fo’i lagona ua oo mai, ua leai se lagona fia faigaluega pe afai e moni o le a fa’amuta le tautua a le kamupani, ae talosia e fesoasoani mai le malo i se auala e foia ai lenei fa’afitauli”.

 

Na taua e se tasi o tagata faigaluega sinia i le Samoa News le faia o ni fonotaga a le pulega o le STP ma ni isi o vaega o le kamupani ma a latou ta’ita’i i le taeao ananafi, mo le tau fa’amalamalamaina o le mataupu e pei ona tula’i mai.

 

Na taua atili e le tagata faigaluega sinia lea e fa’apea, na vavala mai lava tulaga fa’aletonu i le auaunaga a le kamupani ina ua faia le suiga i le ogatotonu o le tausaga lenei, ma tasi ai le sifi e galulue ai tagata faigaluega, e na o le sifi ao, ae ua le toe i ai se sifi po.