Na fa’atula’i e le afioga i le ali’i kovana ia Lolo Matalasi Moliga se lu’itau mo tagata faigaluega a le malo i Ofu, Manu’a, i le taimi o lana saunoaga i le sauniga e tatala aloaia ai le Ofisa Tutotonu a le malo, le maota o Misaalefua Tausulu Palega i le vaiaso na te’a nei, ina ia fa’aaoga tatau meatotino a le malo e fa’atino ai galuega e tautua ai le itumalo ma le atunu’u.

“O lea ua taoto atu le maota fou lenei a le malo i lalo o la outou vaavaaiga, e fa’alagolago le lelei ma le umi ona aoga o lenei fale ia te outou uma o le a galulue ai, e le o se fale e malolo ai pe mapu mai le lelava i galuega a le aiga, ae o le fale e fa’atino ai galuega lelei e tautua ai le itumalo ma le atunu’u”, o le saunoaga lea a le ali’i kovana.

“Aua ne’i o outou manatu ua tuua na o outou i Manu’a nei ona fa’apea lea e leai ni galuega e tatau ona outou fa’atinoina, e taua tele la outou pito laau e tatau ona fa’atinoina mo le manuia o aiga ma le itumalo”.

“E le i tofia outou e fa’atino na o galuega i totonu o le Ofisa, e i ai fo’i la outou pito laau e tatau ona fa’atinoina mo le fa’amamaina o le itumalo atoa ina ia fai ai so outou sao i le puipuia o le fa’alapisi ma le tele o fa’ama’i pipisi”.

“O aso Tofi ma aso Faraile o vaiaso tauaunoa uma e le totogia ai le malo, o aso ia e tatau ona tapuni ai le Ofisa ae aga’i uma tagata faigaluega e fa’amama le itumalo atoa i tafatafa o le alatele ma totonu o le nu’u, fa’amama le lapisi ma teuteu fa’amatagofie le itumalo. Fa’apei ona fa’atinoina e Fa’atonu, tagata faigaluega atoa ai ma Ta’ita’i o le atunu’u i Tutuila, le avea o le aso Faraile o vaiaso tauaunoa ma aso e galulue ai tagata uma e fa’amama le atunu’u, ia fa’apena fo’i ona fa’atinoina e i tatou o loo i Manu’a nei”.

“O lea ua mae’a ona fausia e le malo lenei galuega tele, e le tau toe o mai le malo e fa’amama ma teuteu, ae o la outou galuega patino lena e fa’atino, o le tausi ia lelei ma fa’amatagofie lenei fale ina ia umi lona aoga mo le itumalo ma le atunu’u atoa”.

O le vaiaso nei lea ua fa’atonuina e le ali’i kovana e tatau ona tapena atu ai loa Ofisa uma a le malo o loo fa’atutu solo i vaega eseese o le itumalo, mo le fa’amautuina lea i totonu o le Ofisa autu a le EOB i Ofu, lea e soso’o ma le nofoaga o lo o i ai le malaeva’alele i Ofu.

I totonu o lenei maota tele e fogafalelua lona fausiaina, e tofu lava le Ofisa o le malo ma le tama’i ofisa o lo o i ai, ma ua mae’a fo’i ona i ai tagata faigaluega a Ofisa ta’itasi nei e galulue ai i le nofoaga fou lea ua tatalaina nei.

Na taua e ni isi o tagata faigaluega a le malo i Ofu i le Samoa News le tele o galuega o le a latou fa’atinoina, pe afai ae tatalaina lenei Ofisa i le vaiaso nei, ma o ni isi o nei galuega e aofia ai le fesoasoani e fa’amasani tupulaga talavou e lei leva ona fa’a faigaluega i auala e fa’atino ai galuega i totonu o Ofisa.

Na taua e se tasi o Tina matua i le Samoa News lona loto fiafia tele, ina ua mafai ona fausia lenei galuega tele i totonu o le itumalo ao maua pea lona ola.

“E lei tutupu nei atina’e tetele i isi augatupulaga ua mavae atu, ae ou te fa’afetai i le Atua ina ua musumusu i le finagalo o le ali’i kovana, ina ia fausia ni atina’e tetele mo Manu’a se’i o matou vaavaai ma molimauina manu o maua pea lo latou ola”, o le saunoaga lea a se tasi o Tina matua o le itumalo i Ofu.