Ads by Google Ads by Google

Fa’atupe Ofisa CJPA le fa’a faigaluegaina o Leoleo fou e to’a 7

Le Fa’atonusili o le Ofisa o Puipuiga o Solitulafono (CJA) susuga Keith Gebauer ma lona sui lagolago ia Leonard Seumanutafa.  [ata AF]

I le mae’a ai ona fa’amaonia e le Komesina o Leoleo i luma o le Komiti So’ofa’atasi o le Paketi a le Fono Faitulafono i le vaiaso na te’a nei, le le lava o le paketi a lona Ofisa e totogi ai ova taimi o Leoleo, aemaise ai o le fa’a faigaluegaina o ni isi Leoleo fou e fesoasoani i le galuega, o le aso Faraile na te’a nei na fa’amaonia ai e le Fa’atonusili o le Ofisa e Puipuia Solitulafono i le atunu’u (CJPA), lo latou sauni e fa’atupe le fa’a faigaluegaina o Leoleo fou e to’a 7 mo le Ofisa o Leoleo a le malo.

 

O ni isi o galuega e tele na taua e le susuga a Keith Gebauer o lo o fesoasoani ai lona ofisa i Ofisa eseese o le malo, e le gata i le fa’atupeina o masini ma mea faigaluega e fa’atino ai galuega, ae o le a fa’atupeina ai fo’i le fa’a faigaluegaina o tagata faigaluega fou e pei o le Ofisa o Leoleo.

 

“E le gata o lo o i ai le isi vaega tupe fesoasoani mai le feterale o lo o fesoasoani ai i le fa’atauina mai o mea faigaluega mo le Ofisa o le Loia Sili atoa ai ma le Ofisa o Leoleo, ae ua i ai fo’i le isi vaega tupe fesoasoani mai le feterale e fa’a faigaluega ai Leoleo fou e to’a 7 e galulue mo le Ofisa o Leoleo a le malo”, o le saunoaga lea a Gebauer ina ua fesiligia o ia e le afioga i le ali’i faipule ia Vesi Talalelei Fautanu Jr e fa’amalamalama atu ni isi o tautua o lo o fa’atinoina e lona Ofisa mo isi ofisa o le malo ma le atunu’u.

 

E $272,500 le tupe fesoasoani mai le feterale lea o lo o taua i totonu o le paketi a le Ofisa o le CJPA e fa’a faigaluega ai Leoleo fou e to’a 7.

 

E ese mai i le vaega tupe lea, e $618,000 le isi vaega tupe lea o lo o fesoasoani ai i le fa’atupeina o le polokalame e tete’e atu ai i sau’aga fa’asaga i Tina ma tama’ita’i fa’apea fanau, atoa ai ma le isi vaega tupe e tusa ma le $36,000 o lo o totogi ai fale o lo o avea ma sulufaiga mo i latou o lo o a’afia i sau’aga i aiga.

 

Na ta’utino le ali’i fa’atonu il uma o le Komiti e fa’apea, o ni isi o suiga i le paketi a lona Ofisa i le tausaga tupe fou 2017, e mafua mai ina ua si’itia le aofa’i o ni isi o vaega tupe mai fafo, ma ua si’itia ai foi’i vaega tupe e fa’asoa atu i Ofisa o lo o tula’i mai ai le manaoga.

 

E $1.7 miliona le paketi a le Ofisa mo le tausaga tupe lenei, peita’i ua si’itia i le $2.4 miliona i le tausaga tupe fou.

 

O le to’atele o senatoa ma faipule na maua le avanoa latou te fesiligia ai le ali’i fa’atonu, sa latou fesiligia o ia i le alagatupe mai le feterale lea sa masani ona maua ai fesoasoani mo afioaga i tausaga ua mavae, lea e fa’aleleia ai moli ma tali ai manaoga eseese e talosagaina e ali’i mautofi.

 

Ae na fa’amanino e Gebauer e fa’apea, ua 2 tausaga talu ona taofia le vaega tupe lea, ona ua mae’a le polokalame sa agava’a ai Amerika Samoa, peita’i o lo o taumafai pea i se isi auala e toe tatala mai ai le polokalame lea, ona o le aoga tele i le atunu’u.

 

Na fa’ai’u le iloiloga i le fautuaina lea e sui o le Komiti So’ofa’atasi o le ali’i fa’atonu, ina ia silasila toto’a i auala e mafai ai ona tu’uina atu se isi talosaga i le feterale mo le polokalame e pei ona fesiligia e senatoa ma faipule, ona o le tele o le aoga o lenei polokalame i nu’u ma afioaga o lo o moomia le fesoasoani i auala e fa’aleleia ai totonu o nu’u.