Na fa’atonu e le afioga i le ali’i Fa’amasino ia Fiti A. Sunia se ali’i Leoleo e galue i le Toese i Tafuna i le aso Faraile na te’a nei, ia mautinoa e tutusa le auala e tausia ai pagota uma o lo o taofia i le toese, e aofia ai ma le ali’i Amerika lea na sola mai Tonga i le vaiaso na te’a nei.

O lea saunoaga mai ia Sunia, o sana tali atu lea i le talosaga na fa’aulu e le loia a le ali’i o Dean Fletcher ia Mathoni McCormick, e fa’atatau i le fia maua lea e le ua molia o se avanoa e fa’aaoga ai se telefoni e vili ai lona aiga i Amerika, peita’i e le o mafai ona fa’ataga o ia e Leoleo o le toese e fa’aaoga se telefoni.

Na umi se taimi o fetalia’i le afioga a Sunia ma le ali’i Leoleo o le Toese, ina ua fesiligia e le ali’i fa’amasino le Leoleo e tusa ai o ta’iala e fa’atatau i le fa’aaogaina e pagota o telefoni e vili ai a latou aiga, ae i le fa’aiuga o lea fetaliaiga, na alia’e ai ni isi faamaumauga na fa’ateia ai le fa’amasinoga, e fa’atatau lea i le mafai ona fa’atau e le pagota lana card fai telefoni, ae fa’aaoga ai le telefoni feavea’i ai so o se Leoleo lava e tiute i le taimi e fia fa’aaoga ai e le pagota le telefoni.

Saunoa Sunia e fa’apea, atonu o se faiga masani lava lea a le Toese peita’i i le silasila a le fa’amasinoga e le taitai ona talafeagai, aemaise lava pe afai e $20 le card fai telefoni lea ua fa’atau mai e le pagota e fai ai lana telefoni i lona aiga, ona tu’u lea o le card fai telefoni lea i totonu o le telefoni feavea’i a le Leoleo, ae emo ane e na o le $5 le tupe e fa’aaoga e le pagota e fai ai lana telefoni, lona uigao le paleni e $15 o le pepa fai telefoni o le a maua uma e le Leoleo o le toese.

A o fa’agasolo le iloiloga o le mataupu a Fletcher i le aso Faraile na te’a nei, na finau lana loia ia McCormick e fa’apea, talu ai o le ua molia sa taofia i le falepuipui i Tonga, lea fo’i ua toe taofia i le falepuipui i Amerika Samoa nei, e tatau ai ona fa’atinoina aiaiga masani fa’aletulafono mo iloiloga e agava’a ai o ia, ona o ia o le sitiseni mai Amerika.

Saunoa le afioga a Sunia e fa’apea, “o le tulaga muamua e tatau ona e silafia, e le taua i le fa’amasinoga le mataupu e fa’atatau i le sitiseni Amerika o le ua molia, e tutusa uma lava aia tatau e maua e le sitiseni Amerika ma Nesionale o le Iunite Setete o lo o taofia i le toese i Tafuna e fa’atalitali ai taualumaga o a latou mataupu i luma o le fa’amasinoga”.

Na faitau e Sunia le vaega o le tulafono o lo o fa’amanino mai ai le mafua’aga e tatau ai i le fa’amasinoga ona teena le fa’atulagaina o se tupe e tatala ai se tasi, aemaise lava pe afai o ni moliaga matuia ma le ogaoga o lo o tu’uaia ai lea tagata e aofia ai ma le moliaga o le fasioti tagata.

O Fletcher o lo o tu’uaia e le malo o Tonga i le moliaga o le fasioti tagata, e mafua mai i le fa’alavelave lea o lo o tu’uaia ai o ia i lona fasiotia lea o si ona faletua a o la i ai i le motu o Vava’u i Tonga.

Na finau le loia a le malo ia Gerald Murphy ina ia taofia pea le ua molia i le toese e aunoa ma se tupe e fa’atulaga e tatala ai o ia, ona o le matuia o le moliaga o le fasioti tagata o lo o tu’uaia ai o ia.

“O le mataupu lenei, o lo o tu’uaia ai le ali’i o Fletcher i le moliaga mamafa o le fasioti tagata i totonu o le malo o Tonga”, o le fa’afinauga lea a Murphy. Sa ia taua atili fo’i e fa’apea, e ui e na o le moliaga mama e tasi lea o lo o tu’uaia ai lenei ali’i i Amerika Samoa, peita’i o ni isi o vaega sa mafai ona maua e Leoleo i totonu o le va’a na sola mai ai, e aofia ai se tinoitupe e silia il e $4,000.

“Afai ae fa’atulaga e le fa’amasinoga se vaega tupe e tatala ai le ua molia i tua, e mautinoa lava e sola ese o ia ma le atunu’u, ona o lea fo’i sa sola mai o ia mai Tonga, e le gata i lea, e le saogalemu le atunu’u pe a tatala o ia i tua”, o le fa’afinauga lea a le itu a le malo.

I le fa’aiuga o le iloiloga, na fa’aalia ai e le afioga a Sunia le teena e le faa’masingoa o le talosagaina ina ia fa’atulaga se tupe e tatala ai le ua molia i tua.

Na taumafai McCormick e fa’aleo le isi vaega o lana fa’afinauga, peita’i saunoa Sunia e fa’apea, “ua teena le talosaga e fa’atulaga ai se tupe”, ae sa finau atu pea McCormick, o lea na toe saunoa leotele ai le afioga a Sunia e fa’apea, “ua teena le talosaga e fa’atulag ai se tupe, e i ai se i si mataupu fou, afai ua leai, ua mae’a taualumaga a le fa’amasinoga”.