O le aso Faraile na te’a nei na tatala aloaiaina ai se tautua fou tau Falema’i i le afioaga i Matu’u, e fa’apitoa lea mo i latou e i ai a’afiaga poo le fa’afitauli o le moe, e aofia ai ma le moe ta’agulu, aemaise lava i latou ua a’afia i le fa’afitauli o le puta o le tino.

Na taua e le ali’i o lo o fa’auluulu i ai le falema’i fou lenei o le Pacific Sleep Care ia Ferdie Salvador e fa’apea, o su’esu’ega sa faia ua fa’amaonia ai, soo se tasi e i ai le fa’afitauli i le taimi e moe ai, e aofia ai ma i latou e le umi lava ona nofo ae moe, e mafua mai ia fa’aletonu ona o a’afiaga i lona soifua maloloina, e tatau ai ona saili se fofo i se taimi vave.

“Afai e te a’afia i ‘auga e pei ona taua, o le nofoaga lelei lava lenei e te afio mai ai, o le a matou sauni fo’i e tautua oe i soo se taimi e mana’omia ai la matou fesoasoani”, o le saunoaga lea a Salvador.

O se sauniga lotu puupuu na tatalaina ai lenei auaunaga fou, lea na saunia e le susuga a Rev. Fouvale Asiata, o le Feagaiga o le Ekalesia EFKAS mai Matu’u/Faganeanea, na fa’apaiaina ai le amataina o lenei tautua fou ma le aoga mo le atunu’u.

Saunoa Rev. Asiata e fa’apea, soo se tautua e tatalaina i le atunu’u, e mafua mai ona ua i ai le manaoga ua tula’i mai i tagata. Sa ia faafetaia lenei auaunaga fou ua tatalaina i totonu o lona afioaga, o le a mafai ai ona fesoasoani i ni isi o lona nu’u o lo o i ai lenei a’afiaga.

O le Faletua o le ali’i kovana na saunoa i le saunoaga fa’apitoa o le aso, atoa ai ma le ootiina o le lipine e fa’apaiaina ai le galuega fou.

Na taua e Cynthia i lana saunoaga le taua tele o le ofoina atu o meaalofa ma agava’a e fesoasoani ai i soo se tasi o lo o moomia le fesoasoani, aua o tulaga ia e atagia mai ai le galulue fa’atasi o tagata o se atunu’u.

E ui e le o se nofoaga tele le nofoaga lea ua avea nei ma nofoaga autu a le Pacific Sleep Care, peita’i sa molimauina e le aofia na asia totonu o le fale le atoatoa o mea faigaluega e mafai ona fa’aaogaina i soo se taimi e sulu atu ai se tasi i lona fia maua o se fesoasoani.

Na taua e le ali’i pule ia Salvador e fa’apea, soo se taimi lava e taofia ai se tasi i le latou falema’i mo togafitiga, e fa’aola uma ai masini pu’eata ina ia mafai ai ona silafia atu i le potu i luma togafitiga o lo o faia, ma ia mautinoa ai fo’i o lo o aoga ma sologa lelei togafitiga o lo o faia mo le tagata ua a’afia.

Saunoa le Fa’atonusili o le Soifua Maloloina ia Motusa Tuileama Nua e fa’apea, o le taua o le polokalame a le Pacific Sleep Care ua tatalaina nei, o le a mafai ai ona ofo atu le isi tautua mo tagatanu’u o lo o latou mana’omia le fesoasoani.

E to’atele sui o le Matagaluega o le Soifua Maloloina sa auai i le tatalaina o lenei auaunaga fou.