Ads by Google Ads by Google

Fesiligia ni isi Aufai Pisinisi totogi fou fa’ae’e malo i uta mai fafo


Ituaiga container ta’i 40 futu ma le ta’i 20 futu lea ua fa’aee i ai e le malo totogi i soo se taimi e siaki ai e le Ofisa o Tiute mo uta mai fafo e la’u mai ai. [ata AF]
ausage@samoanews.com

O le sainia ai e le afioga i le ali’i kovana ia Lolo Matalasi Moliga o le tulafono lea na pasia e le Fono Faitulafono i le vaiaso na te’a nei, e fa’ae’e ai totogi fou a le malo mo uta mai fafo e ulufale mai i le atunu’u, i soo se taimi e su’e ma saili ai e le Ofisa o Tiute uta mai fafo, ua fa’aalia ai finagalo fa’asea ma le le fiafia a ni isi o tagata faipisinisi to’aititi i le mafua’aga ua ala ai i le malo ona latou fa’atinoina lea tulaga.

 

I le pasia ai e le Fono Faitulafono o nei si’itaga fou e aunoa ma le fesiligia o ni finagalo mai le aufai pisinisi a le atunu’u e fa’atatau i si’itaga fou, na taua ai e ni isi o le aufai pisinisi i le Samoa News lenei fa’aiuga o se “fa’aiuga pule malosi ma le le alofa i tagata lautele o le atunu’u”.

 

“E le mafai ona nofonofo le tagata faipisinisi mo le sailiina o se isi auala e maua ai sana tupe fa’asili, pe afai e oso le malo e si’i maualuga totogi o ana tautua, e tatau fo’i ona vaavaai le tagata faipisinisi i auala e maua ai sana tupe mama”, o le saunoaga lea a le ali’i faipisinisi mai Asia ia Kim Zin Kuo o lo o ia pulea ni faleoloa se 3 i le atunu’u o lo o fa’atau ai oloa eseese.

 

Ina ua fesiligia e le Samoa News le susuga a Kuo po o a la auala na te fa’aaogaina e saili ai sana tupe fa’asili pe afai ua maualuga tele totogi o tautua a le malo, na luelue le ulu o le ali’i Asia mai fai mai, “e leai lava se isi auala, ua na o le si’i lava i luga o le tau o a’u oloa ina ia mautinoa e maua sa’u tupe fa’asili, afai fo’i la e si’i le tau o a’u oloa i luga, lona uiga o le a mafatia ma pologa tagata fa’atau o le atunu’u i le maualuga o le tau o oloa, ae le o se sese na mafua atu ia te a’u po o isi tagata faipisinisi, o le filifiliga na faia e le malo”, o le isi lea saunoaga a Kuo i le Samoa.

 

Ae na taua e le susuga a Passi Mata’utia, o se Tama faipisinisi mai le afioaga i Aua e fa’apea, e le talafeagai i le malo lo latou soona si’i maualuga o le totogi e saili ai uta mai fafo, ona o se taumafaiga e fofo le fa’afitauli o le aumai fa’anana o fualaau fa’asaina poo a’upega mata’utia i totonu o containers mai fafo.

 

“Ou te fa’aigoaina si’itaga fou a le malo o se tui oona mo nisi o le aufai pisinisi, ae o se faiga le alofa mo tagata lautele o le atunu’u. E mafua lea tulaga ona o lea ua aloaia nei e avea ma tulafono siitaga fou nei o totogi o uta mai fafo, e aunoa ma se fesiligia o ni manatu mai le aufaipisinisi, poo tagata lautele fo’i o le atunu’u”, o le saunoaga lea a Mata’utia.

 

Na taua e le Pulesili o le Ofisa o Tiute ia Moetulu’i Sipili Fuiava i luma o le Fono Faitulafono, ina ua fesiligia o ia e uiga i si’itaga fou nei o le sailia o uta mai fafo e fa’apea, o se tasi o mafua’aga ua ala ai ona manatu le malo e aumai masini fa’ata mai fafo e su’e ai uta ma fa’amomoli o loo ulufale mai i le atunu’u, ona o lo o masalomia le tele o oloa o loo aumai fa’anana e aunoa ma le iloa e le malo, e aofia ai fualaau fa’asaina ma a’upega mata’utia.

 

Ina ua fesiligia e le Samoa News ia Mata’utia i lea tulaga, na taua ai e le ali’i faipisinisi mai Aua e fa’apea, “E le o se fa’afitaul lena a le faipisinisi poo le tagata fa’atau po o ai lava, o le fa’afitauli lena a le Ofisa o le malo o lo o latou fa’atinoina le galuega, o le latou tiute i lalo o le tulafono, ia mautinoa e matua saili uma uta mai fafo ina ia mautinoa e le o i ai se oloa o lo o aumai fa’anana mai ai i totonu”.

 

E ui o lea ua mae’a ona fa’aalia le finagalo o le Fono Faitulafono e ala i lo latou pasiaina o lenei tulafono, lea fo’i ua mae’a ona sainia e le kovana e avea ma tulafono, peita’i sa i ai lava ni isi o Senatoa ma Faipule sa latou fesiligia le mafua’aga ua manatu ai le malo e si’i maualuga totogi e saili ai uta mai fafo.

 

 E pei ona taua e le afioga i le ali’i senatoa ia Magalei Logovi’i i le aso o le iloiloga e fa’apea, na te lagolagoina le finagalo o le malo ina ia aumai masini fa’ata nei e saili ai uta o lo o aumai fa’anana mai fafo, aemaise ai lava fualaau fa’asaina ma a’upega mata’utia, peita’i i lona talitonuga, e le tatau ona naunau le malo ia ola latou ae fasioti ai fua pisinisi ma taata lautele.

 

“O le taua o le fuafuaga lenei, e le gata ia maua sina tupe mo le malo, ae tatau fo’i ona maua sina tupe e ola ai le tagata faipisinisi, ae aua ne’i oti le faipisinisi toe oti atu ai ma le tagata fa’atau”, o le saunoaga lea a Magalei.

 

Saunoa atili fo’i Magalei e fa’apea, e le afaina lava i lona taofi aiga o lo o malosi le tamaoaiga i totonu o le atunu’u, o aiga ia latou te gafatia soo se maualuga e oo i ai tau o oloa i le atunu’u, ae sili atu ona popole lona loto i aiga lima, ona o i latou ia o le a sili ona pagatia pe afai ae si’i maualuga totogi tau o oloa a ni isi o pisinisi i le atunu’u.

 

Na taua e le Tama matua ia Valaau Tanielu, 64 tausaga le matua o Fagasa e fa’apea, o le tulaga lea ua i ai tau o oloa i le taimi nei, ua le toe gafatia e lona aiga, e fai o le maualuga o le tau o oloa, ae o lo o tumau pea le maualalo o totogi o lo o maua mai i lana galuega ua 20 ma ona tupe tausaga o galue ai.

 

“Afai loa e toe si’i i luga tau o oloa, o le mea moni lava, o le a le toe gafatia e le tupe maua a lo’u aiga o lo o i ai lena tulaga, ae talosia e alolofa le aufai oloa ma fa’atumau ai pea i le tulaga o lo o i ai tau o a latou oloa, e ui i siitaga fou a le malo lea ua aloaia i le taimi nei”, o le saunoaga lea a Tanielu.

 

E pei ona taua e le afioga a Moetulu’i i luma o le Fono Faitulafono e fa’apea, o le fa’aiuga o le masina na te’a nei na malaga atu ai tagata faigaluega e to’a 6 a le Ofisa o Tiute, mo le a’oa’oina o i latou i auala e fa’aaoga i ai masini ia ua fa’amoemoe le malo e fa’atau mai e siaki ma su’e ai uta mai fafo.

 

O le amataga o le masina lenei o Oketopa na taua e le afioga a Moetulu’i i lana molimau i luma o le Fono Faitulafono, e taunu’u mai ai le masini muamua, ae o isi masini e 3 ua fa’amoemoe e taunu’u mai i se taimi o le fa’aiuga o le masina. E tusa ma le $6 miliona le tupe lea ua fa’aalu e le malo e fa’atau mai ai masini nei e fa’aaoga mo le sailiina o oloa ma uta mai fafo.

 

O totogi na fuafua e le malo mo le fa’aaogaina o a latou masini fou, e aofia ai le $350 mo uta e aumai i totonu o container e ta’i 40 futu le uumi pe sili atu fo’i, peita’i o lea ua suia e le Fono Faitulafono i le $200, lea fo’i ua malilie i ai le malo.

 

E $250 le totogi na fa’ae’e e le malo mo le siakiina o uta e aumaia i container e i lalo o le ta’i 40 futu le uumi, e aofia ai ma container ta’i 20 futu, peita’i o lea ua suia e le Fono Faitulafono i le $200, lea fo’i ua talia e le malo.

 

Mo uta e aumai i pailate, e $100 le totogi na fa’ae’e e le malo, ao lea ua suia e le Fono Faitulafono i le $50, e fa’apena fo’i i uta o ta’avale poo isi mea faigaluega mamafa, lea fo’i na manatu le malo e totogi le $75 e saili ai, peita’i ua suia e le Fono Faitulafono i le $50, lea fo’i ua malilie i ai le malo.