E to’atele afioga i Senatoa na latou fesiligia le Fa’atonusili o le Matagaluega o le Soifua Maloloina a le atunu’u, le tofa a Motusa T. Nua i le taimi o lana iloiloga i le vaiaso na te’a nei, e fa’atatau i le vaega tupe lea o loo aitalafu ai le Matagaluega i le kamupani a le Pima Prevention Partnership (PPP), po’o le PIMA.

A o lei pasia e le maota maualuga tofiga a le kovana mo le tofa a Motusa i le vaiaso na te’a nei, e toe avea ai o ia ma Fa’atonusili o le Matagaluega i le palota e 16-0, na maua ai le avanoa e fa’amanino ai e le ali’i Fa’atonu le aitalafu e pei ona to’atele afioga i Senatoa sa fia malamalama i ai.

Na faailoa e Tuaolo M. Fruean ia Motusa lona faitau i le nusipepa i se ripoti e fa’atatau i se vaega tupe o loo aitalafu ai le malo i le kamupani a le PIMA, ma o loo ia fia malamalama pe aisea ua nofo aitalafu ai le malo i lea kamupani mai fafo.

O le kamupani a le PIMA e pei ona fesiligia, o se kamupani mai le setete o Nevada e pei ona saunoa Motusa, lea sa latou ofoina mai se auaunaga mo le Matagaluega o le Soifua Maloloina i le nofoaiga ua mavae atu, ma e oo mai lava i le taimi nei, o lo o i ai pili e lei mae’a ona totogi o loo fa’aauau ai pea feutanaiga i le va o le PIMA ma le Ofisa o le Loia Sili i se auala e totogi ai lenei vaega tupe.

Na faamanino atili e Motusa e faapea, e $247,000 le vaega tupe o loo finau mai le PIMA o loo nofo aitalafu ai le Soifua Maloloina, ae ina ua mae’a feutanaiga sa faia i le va o le kamupani ma le Ofisa o le Loia Sili, na manino ai e na o le $134,000 le pili sa’o e tatau ona totogi, ae o le isi vaega tupe e $113,000 o lo’o fesiligia.

Saunoa atili Motusa e fa’apea, o pili e pei ona fesiligia sa tutupu i le taimi ae lei avea o ia ma Faatonusili o le Matagaluega.

Ina ua fesiligia e le afioga a Paepae Fai’ai ia Motusa poo a galuega na fa’atino e le kamupani a le PIMA, na taua ai e le Fa’atonusili e fa’apea, o galuega sa fa’atinoina e sui o le kamupani sa malaga mai e aofia ai le tusiaina o talosaga mo vaega tupe fesoasoani mai le feterale, ma ina ua mae’a ona fa’atino e sui o le kamupani galuega mo le Matagaluega o Auaunaga ma Tautua Lautele, na fa’asolo atu ai loa i le Matagaluega o le Soifua Maloloina, mo le tusiaina o talosaga mo vaega tupe e fesoasoani i le polokalame o Puipuiga i Fa’ama’i le pipisi, fa’apea ai ma le polokalame lea e asiasi ai i tagata matutua i tua i aiga (home visit), ma maua mai ai le vaega tupe mai le feterale e tusa am le $1 miliona.

“O le fa’afitauli ua tula’i mai, ua mae’a ona fa’atino e le kamupani le tautua mo Amerika Samoa, ae ua fetaui fo’i ma le taimi ua faia ai fesuiaiga i totonu o le Matagaluega, ma i’u atu ai lava ina le totogiina le pili a le kamupani,” o a Motusa lea.

Na toe fesiligia e le afioga i le ali’i senatoa ia Nuanuaolefeagaiga S. Nua le ali’i Fa’atonusili ina ia fa’amanino atili le mafua’aga e le tatau ai ona totogi e le malo le $113,000, ae na taua e Motusa e fa’apea, e i ai pili ua maua i su’esu’ega e le aofia ai i totonu o le konekarate sa sainia ae foliga mai ua fa’atinoina lava e ni isi o le aufaigaluega, e pei o pili o fale talimalo, pili o fale’aiga, pili o ta’avale mautotogi (car rental), fa’apea ai ma isi lava pili eseese e le tatau ona totogi e le malo, o pil la ia o loo galulue ai le Matagaluega ma tagata faigaluega sa latou fa’atinoina pili nei ina ia saili se auala e toe totogi ai.

Na fa’ailoa atili e Motusa lona fa’aeteete e soona tu’uina mai ni fa’amatalaga e uiga i lenei mataupu, ina ne’i i’u ane ua tofu i le fa’amasinoga, ae pau le tulaga e mafai ona ia fa’ailoa i luma o le maota, o loo faia pea feutanaiga ma tagata faigaluega a le Matagaluega sa i ai i le taimi na fa’atinoina ai tautua ma auaunaga a le PIMA e pei ona fesiligia, mo le fa’amautuina o se auala e totogi ai lenei aitalafu.

Saunoa atili Motusa e faapea, o tagata faigaluega e pei ona ia taua, o ni isi lava o tagata faigaluega tuai a le Matagaluega, lea fo’i o loo  fa’aauau pea ona galulue i ni isi o vaega o le matagaluega seia oo mai i le taimi nei.

E ui o lo o i ai le avanoa e mafai ai ona aveese mai siaki a tagata faigaluega o loo aafia ina ia mafai ai ona totogi lenei aitalafu, peita’i na taua e le tofa a Motusa le faigata lea ona ia faia se tulaga fa’apea, ona e vaai alofa fo’i i aiga ma fanau a i latou nei, ina ne’i avea le naunau e saili se auala e fa’amama ai le aitalafu ma le igoa o Amerika Samoa, ma auala e a’afia ai aiga ma fanau a i latou.