Ads by Google Ads by Google

Filifilia Senatoa fou mo Itumalo o Tuala-uta ma Leasina

ausage@samoanews.com

O le fa’aiuga o le vaiaso na te’a nei na fono ai ni isi o Itumalo i le atunu’u, mo le sailia lea o ni o latou Senatoa fou e fai ma o latou sui i le maota maualuga a le Senate mo le isi 4 tausaga o lo o sosoo nei.

 

O Itumalo e tolu sa fono i le fa’aiuga o le vaiaso na te’a nei e aofia ai Tualauta ma Leasina.

 

O sui o le itumalo o Tualauta o lo o nofoia nofoa o le itumalo i le taimi nei e aofia ai le afioga i le Sa’o ia Magalei Logovi’i ma le afioga a Gaea Perefoti Failautusi. O le itumalo o Leasina o lo o nofoia e le afioga a LeAtualevao Asifoa.

 

Mo le itumalo o Tualauta, o le maota o le Fa’alupega o le Itumalo ia Fonoti Tafa’ifa Aufata na fono ai le itumalo mo le filifilia o ni o latou Senatoa fou se to’alua i le maota maualuga.

 

E lei umi ona saili le tofa ma le fa’autaga moe i le paia o le Itumalo ae tasi ai loa le fa’afitiga o aleaga, o le afioga i le Sa’o ia Magalei Logovi’i o le a toe fo’i i le nofoa, fa’atasi ai ma le afioga a Fonoti lea fo’i sa ia nofoia muamua le nofoa o le itumalo i ni nofoaiga ua mavae, o le a toe seei i le nofoa e to’alua ma le afioga a Magalei.

 

Na taua e le tofa a Paogofie Fiaigoa i le Samoa News le matagofie o le feiloaiga a le Itumalo, atoa ai ma le faigofie ona saili o le tofa ma le fa’autaga i ni isi e avea ma ana Senatoa fou.

 

“E le faigata le sailiina o le tofa i le itumalo lenei, e ave lava le fa’amuamua a le itumalo lenei i Tamali’i, po o ai lava e naunau i le tofi, e le mafai lava ona manumalo se lagona o se to’atasi, ae fuli uma lava i le itu ua tasi i ai le itumalo. E fa’apena le fono a le itumalo o Tualauta i le vaiaso na te’a nei, fiafia tagata uma ma ua ave atoa la matou fa’atuatuaga ia Magalei ma Fonoti la te fa’aleoina manaoga o le itumalo i luma o le Fono Faitulafono”, o le saunoaga lea a Paogofie.

 

Mo le itumalo o Leasina, ua filifilia ai nei le tofa i le Tama Matua ia Tuiagamoa Tavai e avea ma ona sui fou i totonu o le maota maualuga.

 

I se fa’atalatalanoaga ma se sui o le Itumalo, na fa’amaonia mai ai e le afioga a Lualemaga E. Faoa le tasi o le fa’afitiga o aleaga, o le susuga i le Tama Matua ia Tuiavamoa o le a fai ma sui o le itumalo i le maota maualuga a le Senate mo le isi 4 tausaga o lo o lumana’i nei.

 

E pei ona silafia, o le susuga i le Tama Matua ia Tuiagamoa o lo o avea nei ma Sui Failautusi o le Ofisa o Mataupu Tau Samoa.