Ua i ai se polokalame fou ua sauni le Matagaluega o le Puipuiga o le Saogalemu Lautele, e fa’atinoina mo ni isi o ali’i pagota o lo o tuli a latou fa’asalaga i le toese, ina ia mafai ai ona maua ni isi auala e maua ai ni a latou vaega tupe e fesoasoani ai i le tausiga o latou aiga, atoa ai ma le totogiina o a latou salatupe i le fa’amasinoga.

E pei ona fa’ailoa e le afioga i le ali’i Komesina o Leoleo i le Samoa News i le vaiaso nei, o ni isi o ia polokalame e aofia ai le fa’aaogaina o ni isi o fale tuai o lo o taofia ai pagota i le taimi nei, e fa’atino ai aoaoga mo pagota, e a’oa’o ai i latou i le fa’atinoina o isi ituaiga matata e pei o le fa’a kamuta, fai eletise, palama ma le anoanoa’i lava o isi galuega fa’apena, e a’oa’oina ai i latou i metotia eseese e mafai ona saili ai ni a latou galuega e tausi ai aiga ma totogi ai a latou salatupe.

Saunoa le afioga a Save Liuato Tuitele e fa’apea, e to’atele naua ni isi o ali’i pagota e i ai le tomai fa’apitoa i matata eseese e pei o le fai eletise, kamuta, palama ma isi lava ituaiga galuega fa’apitoa, ma ua ia manatu ai e fa’aaoga tomai ua maua e i latou nei e fa’atino ai ni isi galuega lelei mo latou aiga i le lumana’i.

“O lenei fuafuaga ua leva ona fa’ataoto mai e le Pulega a le Ofisa o Leoleo, ae o lea ua manatu e amata aloaia lona fa’atinoina, pe a mae’a le tatalaina o le falepuipui fou i le vaiaso lenei, ona avanoa ai loa lea o se tasi o fale e mafai ona fa’atinoina ai lea polokalame”, o le saunoaga lea a Save.

Sa ia saunoa fo’i e fa’apea, ua mae’a ona faia a latou fesootaiga ma ni isi o kamupani ma pisinisi tua, mo ni avanoa e avatu ai pagota o lo o i ai agava’a faapitoa nei latou te fa’a faigaluegaina, ae maua ai totogi e tausi ai o latou aiga ma totogi ai a latou salatupe.

Na fa’amanino atili e Save e fa’apea, o le fuafua o lenei polokalame fou, na alia’e mai i le taimi tonu lea na ia taofia ai le fa’aauauina o le polokalame e mafai ai ona tatala pagota i tua e faigaluega ma toe fo’i atu i le toese (work release), ina ua ia maua e le o lelei le fa’atinoina o lea polokalame, ona o ni isi o taimi, e soona tu’ufau ai lava pagota e tatala i le polokalame e aunoa ma le puipuia malu o i latou, aemaise ai fo’i, ua ia maua e le o totogiina pagota o lo o ave e fa’atino galuega a tagata o le malo.

O se tasi o itu na mafua ai ona taofi e Save le polokalame e tatala ai pagota i tua e faigaluega, ina ua vaaia le ta’avale a ni isi o pagota e paka lava i luma o le toese, pei lava o lo o saoloto nei ali’i pagota, e aunoa ma le malupuipuia o soo se taimi latou te tuua ai le toese mo galuega ma toe fo’i atu i totou.

“O lea la ua ou toe tatalaina le polokalame e tatala ai pagota i tua e galulue ma toe fo’i atu i totonu o le toese, ina ua mae’a ona fa’amautu ni isi o tulaga sa moomia le fia fa’aleleia, ma e to’alua ali’i pagota ua agava’a i le taimi nei i le polokalame, ina ua mafai ona fa’asa’o le auala e fa’atino ai le polokalame, ma maua ai le avanoa e totogi ai pagota o lo o fa’atinoina galuega tua”, o le saunoaga lea a Save.

O le polokalame e tatala ai pagota e faigaluega e pei ona taua e le ali’i komesina, o le polokalame lava lea a le ofisa o Leoleo, e ese mai i le polokalame lea o lo o fa’atautaia ma pulega a le fa’amasinoga, lea o lo o i lalo o le vaavaaiga a le Pule o le toese, e mafai ai ona tatala pagota i tua e faigaluega ma toe fo’i atu mo le tuliina o a latou fa’asalaga.