Ads by Google Ads by Google

GAOTEOTE: Manuia lava le Paketi a le Fono Faitulafono

 Le Peresetene o le Senate, le afioga Gaoteote Palaie Tofau  [ata AF]
ausage@samoanews.com

Na avea le saunoaga a le Peresetene o le Senate e fa’atatau i le tulaga o lo o i ai le paketi a le Fono Faitulafono, ma auala na leai ai ni fesili mai afioga i Senatoa ma Faipule e fa’atatau i le tupe fa’asoasoa a le Fono mo le tausaga tupe fou 2017.

 

Ina ua mae’a le saunoaga fa’ai’u a le Ta’ita’ifono o le Komiti So’ofa’atasi o le Paketi a le Fono Faitulafono, afioga Laolagi Fonoti Savali Vaeao e fa’amuta aloaia ai iloiloga o paketi a ni isi o Ofisa a le malo i le taeao ananafi, na maua ai loa le avanoa o le afioga i le Tama’ita’i o le Ao ia Gaoteote Palaie Tofau e saunoa ai e fa’atatau i le paketi a le Fono.

 

Saunoa Gaoteote e fa’apea, e leai ni molimau e tau valaauina i le paketi a le Fono Faitulafono, o laua lava ma le afioga i le Fofoga Fetalai e tatau ona molimau.

 

“Afai tou te fesili mai i le tulaga o lo o i ai le paketi a le Fono Faitulafono, pau la ma tali ma le Fofoga Fetalai, o lo o manuia lava tatou, o lo o ma taumafai malosi pea ma le Fofoga Fetalai e tau saili mai ni nai tupe o lo o totoe e fa’atino ai manaoga a le Fono o lo o i ai”, o le saunoaga lea a Gaoteote.

 

Na toe fa’amanatu e le afioga i le ali’i peresetene tala sa fai i le tausaga ua mavae e fa’atatau i le le atoa o le aofa’iga o le paketi sa talosagaina e le Fono Faitulafono, i le aofa’i e $7 miliona, ma le vaega lea sa tu’uina mai e le faigamalo i le $6.9 miliona, ina ua fa’aitiitia le 10% mai paketi uma a le malo e aofia ai ma le Fono.

 

Na fa’amanino atili e Gaoteote e fa’apea, e le o faigofie le la pito laau ma le afioga i le Fofoga Fetalai o lo o taumafai i le taimi nei, i le tau sailiina lea o ni isi vaega tupe e fesoasoani ai e fa’atupe manaoga a le Fono Faitulafono ua le mafai ona fa’atino, ina ua fa’aitiitia lana paketi sa talosagaina.

 

“O le mafua’aga lena e fa’apea atu ai se manatu, e le tatau ona i ai ni fesili i la tatou paketi, aua o lea e le o atoa le aofa’iga o le tupe sa tatou talosagaina, ae afai e i ai se isi e fia fai sana fesili, ia fesili muamua oe ia te oe poo a mai oe ma au mea o lo o fai, a mae’a ona e tali ia te oe lava, ona fa’atoa e fesili mai loa lea e fa’atatau i le tatou paketi”, o le saunoaga lea a Gaoteote na mafua ai ona leai ma se senatoa po o se faipule na fesili e fa’atatau i le paketi a le Fono Faitulafono, e ui e to’atele ni isi o faipule o lo o latou fesiligia le to’atele o ni isi o tagata o lo o galulue i le Fono Faitulafono, ae le o iloa po o a tonu a latou galuega o lo o fai.

 

Na fa’atula’i e le afioga i le ali’i senatoa ia Soliai Tuipine Fuimaono se fautuaga, ina ia talosaga i le faigamalo e toe fa’afo’i atu le 10% a le Fono Faitulafono lea na aveese mai i lana paketi o le tausaga tupe lenei, ina ia mafai ai ona fa’atino ana galuega o lo o fuafua e fa’ataunu’u.

 

E na o le afioga i le ali’i faipule ia Toeaina Faufanu Autele na ia talosagaina ta’ita’ifono o le Komiti So’ofa’atasi o le Paketi a le Fono Faitulafono, mo se avanoa e maua ai ni alauni mo faipule ma senatoa mai Manu’a, e totogi ai a latou pasese e toe malaga ai e asiasi i le itumalo.

 

Na taua e Toeaina e fa’apea, e ave lana fa’amanuia i le tama’ita’i faipule i le Konekeresi ia Aumua Amata, ona o lo o maua ana alauni mai le Konekeresi a le malo tele, e fa’atupe ai ana malaga e asiasi mai ai i Amerika Samoa.

 

O le taeao ananafi lea na fa’ai’u aloaia ai galuega a le Fono Faitulafono mo le fesiligiaina o paketi a ofisa ma vaega ta’itasi a le malo, ma ua fa’amoemoe e tatau ona faia sa latou fa’aiuga fa’asaga i le paketi ao lei mae’a le vaiaso lenei.