Na fautuaina e le afioga i le ali’i senatoa ia Magalei Logovi’i molimau a le malo i le taeao o le aso Tofi, i le taimi na iloilo ai e le maota maualuga le pili sa talosagaina e le faigamalo e tu’u atu ai le malosi i sui o le Ofisa o Tiute e saili ai uta ma oloa mai fafo, aemaise ai o le fa’ae’eina atu lea o totogi mo pisinisi kamupani mo le su’eina o a latou uta ma oloa, e le tatau ona taumafai le malo e fa’ae’e ni tulafono e penefiti ai na o le malo, ae mafatia ai tagata lautele ma pisinisi.

“E matua lagolagoina e le fono faitulafono le finagalo o le malo e tusa ai o lenei tulafono, peita’i o le agaga o afioga i senatoa o lo o taumafai e fa’ailoa atu, aua ne’i tatou naunau e ola na o le malo, ae oti ai tagata lautele ma pisinisi, ae lelei pe a fai siitaga e gafatia e tagata ma mafai e pisinisi ona totogi”, o le saunoaga lea a Magalei.

O le sui teutupe a le malo ia Tina Onosa’i ma le pulesili o le Ofisa o Tiute a le malo ia Moetulu’i Fuiava, o i laua ia sa molimau mo le malo i le iloiloina o lenei tulafono taufa’aofi i le taeao ananafi.

Na taua e Moetulu’i i luma o le komiti e fa’apea, afai ae taunu’u mai masini ia ua fuafua e su’e ai containers ma uta mai fafo, o oloa uma sa masani ona aumai fa’anana i Amerika Samoa i totonu o containers ma ni isi o uta, o le a le toe sao lea tulaga, ae o le a maua uma i le taimi e fa’aaoga ai masini.

“O le agaga atoa o le malo, o le puipui lea i le saogalemu o ola ma fanau a le atunu’u, ua molimauina le tele o fualaau faasaina, fana ma isi lava ituaiga o loo ua fa’aulufale mai i Amerika Samoa, ma ua le mafai ona taofia lea tulaga, o tagata o lo o tuleiina fualaau fa’asaina, ua aga’i atu i nofoaga e to’atele ai fanau aoga mo le fa’amoemoe e tasi, o le tuleiina atu lea o mea leaga nei i fanau, lea la ua fuafua le malo e auina mai masini nei, o le a mafai ai loa ona tali le fa’afitauli e pei ona tula’i mai”, o le saunoaga lea a Moetulu’i.

Na faauilavea le afioga a Magalei i le saunoaga a Moetului ma ia fa’ailoa i ai e fa’apea, o le tulaga e pei ona ia atugalu i ai, o le tulaga fo’i lena o lo o atugalu i ai le fono, ona o le saogalemu o fanau ma le atunu’u atoa.

“Ae le avea le naunau e puipui le saogalemu o le atunu’u ma auala e soona si’i maualuga ai fua i luga totogi mo le siakiina o uta ma containers mai fafo. Ou te malamalama lelei lava i le tulaga lena e te saunoa mai ai, sa ou i ai fo’i i le nofoa lena, 4 tausaga o avea a’u ma teutupe, o le agaga lea e taumafai atu i ai le fono, ua mamafa tele totogi fou nei ua fuafua le malo e fa’aee i kamupani ma tagata lautele”, o le saunoaga lea a Magalei.

Saunoa atili Magalei e fa’apea, afai e silia i le $3 miliona le tupe sa maua e le malo mai totogi o le silia i le 110,000 containers i le tausaga ua mavae, lona uiga o le a matua ova atu le tupe e maua e le malo mai tau fou ua fuafuaina nai lo le tupe o loo moomia mo le fa’atupeina o le $2 miliona lea ua fuafua e avea ma tupe e fa’afetaui ai le tupe o le a tu’uina mai e le Ofisa a le feterale e pulea malae va’alele i totonu o le malo tele, le FAA.

Na lagolagoina e ni isi o afioga i senatoa sa i ai i le taimi o le iloiloga le saunoaga a Magalei, i le maualuga tele o totogi lea ua fuafua i ai le malo e fa’ae’e atu i pisinisi ma kamupani tua.

Na fa’afetaia e le afioga i le ali’i senatoa ia LeAtualevao Asifoa le fuafuaga a le malo e fa’atau mai masini scanners e fa’aaoga e su’e ai oloa ma uta mai fafo, ina ia taofia ai le fa’aulufaleina mai o fualaau ma a’upega fa’asaina i le atunu’u, aemaise ai lava uta o oloa o loo aumai fa’anana i le atunu’u, ona misi ai lea o tupe sa tatau ona maua e le malo.

I le avea ai o LeAtualevao o se tasi o tamali’i faipisinisi i le atunu’u, sa ia taua ai le tele o oloa mai fafo o loo aumai fa’anana i totonu o containers e ni isi o tagata faipisinisi Asia, aemaise lava i pusa pia ma sikaleti, aua o oloa ia o loo pito sili ona mana’omia e le atunu’u.

Na fesili LeAtualevao ia Moetului pe mafai e masini (scanner) nei ona su’e ai oloa e pei o pusa pia ma pusa sikaleti o lo o aumai fa’anana i totonu o container, ae na taua e Moetulu’i, “e mafai.”

Na fesili le afioga i le ali’i senatoa ia Uti Petelo ia Moetulu’i, po o mafai e lona Ofisa ona taofi lisiti pepelo o lo o fa’aaoga e ni isi o le aufai oloa Asia, e fa’amaonia ai a latou uta ma tau o oloa mai fafo, ae na tali le pule o le Ofisa o Tiute, “Ua maea fo’i ona saili e le matou ofisa le tulaga i lisiti pepelo mai fafo, ma ua matou taofia le toe faia o lea tulaga, ua i ai fo’i pisinisi ua matou fa’asalaina, i lo latou aumaia lea o lisiti pepelo e fa’ailoa mai ai tau maualuluga i oloa, ae le o lisiti moni ia e tatau ona i ai”, o le saunoaga lea a Moetului.

Na taua e le afioga a Laolagi Fonoti Savali Vaeao o le ta’ita’i fono o le komiti o le paketi sa iloiloina lenei mataupu, o le a toe talanoa le komiti mo le faia o sa latou fa’aiuga e uiga i lenei tulafono, atoa ai ma suiga e faia i totogi o tautua ia ua fuafua le malo e fa’ae’e i pisinisi ma tagata lautele.