Ads by Google Ads by Google

Manana’o Aufai Faiva toe fai se isi aso faapitoa mo fagotaga

ausage@samoanews.com

Ua fa’aalia e ni isi o le aufai faiva a le atunu’u lo latou talosagaina o le Ofisa o lo o Fa’auluulu i ai Puipuiga o le Gataifale ma le Vaomatua (DMWR), mo se avanoa e fa’aauau ai pea aso fa’apitoa mo fagotaga a le aufai faiva fai va’a alia, e pei o le latou aso fa’apitoa lea sa fa’ataunu’uina i le masina o Setema na tea nei, ona o le tulaga mataina ma le lelei o le fa’aiuga o lea fa’amoemoe.

 

Na taua e Tanu Vaega o Aua e faapea, e ui e le i to’atele naua sui o le aufai faiva na auai e lagolago lenei fa’amoemoe, peita’i sa iloga ona lelei ma matagofie le polokalame, sa fa’a’manuiaina fo’i i latou uma sa mafai ona fa’alauiloa i’a na maua mai i a latou fagotaga.

 

“E le mafai ona iloa le lelei o se polokalame pe afai e na o le tasi lava lona fa’atinoina ona taoto ai lava lea, ae o le talosaga i le Ofisa o le DMWR, manaia ae fa’aauau lenei polokalame i masina ta’itasi, atonu o se auala lelei fo’i lea e maua ai le avanoa o le atunu’u ma ta’ita’i o le malo e malaga atu ai e lagolago ma maimoa i galuega a le aufai faiva”, o le saunoaga lea a Vaega.

 

Na taua atili e Vaega e fa’apea, o le tupe na maua mai le fa’atauina o i’a o lana fagota i le fa’aaliga sa faia i le aso 10 Setema, 2016, sa mafai lea ona fa’aaoga e fa’aleleia ai isi vaega o lana va’a alia, ma ua ia manatu ai, o se polokalame aoga ma taua lea polokalame i le atina’e a lona aiga.

 

E to’alua fo’i isi ali’i faiva i le atunu’u sa la taua i le Samoa News lo laua fa’anaunauga o lo o i ai, ina ia fa’aauau pea le polokalame a le Ofisa mo le fa’atulagaina lea o se isi aso faapitoa mo le aufai faiva, e fa’alauiloa ai i’a o a latou fagota, ma ia mafai ai ona maua le avanoa o le atunu’u latou te molimauina ai a latou galuega o lo o fa’atino, ma ofo mai ai la latou lagolago.

 

Na taua e le Faatonusili o le Ofisa o le DMWR ia Ruth Matagi-Tofiga i le vaiaso na sosoo ma le vaiaso na fa’ataunu’u ai le ulua’i fa’amoemoe a le aufai fa’atoaga, o le a fa’amautuina i se isi fonotaga a le Ofisa ma le aufai faiva le fautuaga ua mae’a ona tu’uina atu e ni isi o le aufai faiva, ina ia fa’aauau i masina ta’itasi lenei fa’amoemoe.

 

O le aso, Oketopa 14, 2016 ua fa’amoemoe e usuia ai le fonotaga lona 168 a le Komiti Fa’afoe o Faiga Faiva a le Pasefika i Honolulu, Hawaii, mai le itula e 8:30 e oo atu i le itula e 5:00 i le afiafi, ma ua fa’amoemoe fo’i e talanoaina ai ni isi o mataupu e fa’atatau i le atina’eina atoa ai ma le fa’aleleia o tulaga tau faiga faiva i le Pasefika.

 

Ae mo le ulua’i fa’aaliga a le aufai faiva a le atunu’u sa fa’ataunu’uina i le masina na te’a nei, na galulue fa’atasi ai le ofisa a le DMWR ma le Matagaluega o Fefa’atauaiga ma Alamanuia mo le fa’ataunu’uina, lea na mafai ona fa’atauina ai se vaega tele o i’a na maua i fagotaga a le aufai faiva, ma maua ai le vaega tupe e silia i le $1,000 mo se tasi o le au fai faiva..

 

O le autu o lenei polokalame, o le fa’alauiloaina lea o galuega o lo o fa’atinoina e le aufai faiva o lo o fa’aaogaina va’a alia e fagogota ai, ma ia mafai ai ona maua le avanoa o le atunu’u lautele ma ta’ita’i o le atunu’u e malaga atu ai e lagolago ma maimoa i galuega a le aufai faiva.

 

Na taua atili i le ripoti mai le Ofisa o le DMWR e fa’apea, o le to’atele o tagata e maimoa ma latou silafia galuega fa’atino a le aufai faiva, o le tele fo’i lena o le manaoga mo i’a, ma unaia ai le aufai faiva e toaaga e fagogota ma fa’atau atu a latou i’a i le atunu’u.

 

O le taimi nei, o lo o galulue pea le aufaigaluega a Ofisa e lua a le malo mo le fa’amautuina o fuafuaga uma, mo le fa’ataunu’uina o le moemitiga e mafai ai ona fa’atino lenei polokalame i vaiaso ta’itasi.