I le avea ai o fualaau fa’asaina o se tasi o fa’afitauli numera tasi i totonu o le atunu’u i le taimi nei, atoa ai ma le mamafa o le fa’asalaga o lo o fa’atulaga mai i totonu o le tulafono o lo o lima ta’ita’iina ai galuega a afioga i ali’i fa’amasino, na fautuaina ai e le Loia Fautua ia Douglas Fiaui sui o le Komiti o Mataupu tau Fa’amasinoga a le maota o sui, mo se avanoa latou te toe iloiloina ai ni suiga i lea tulafono.

Na fa’amanino e Fiaui i luma o afioga i faipule e fa’apea, e lua auala eseese o lo o fa’asala ai e le fa’amasinoga i latou e ta’usala i moliaga o le umia fa’asolitulafono o vaega o fualaau fa’asaina, e le gata o le fa’asala i le vaega o le tulafono lea e fa’amalosia ai le tulafono o se fa’asalaga fa’a falepuipui, ae o lo o i ai fo’i le vaega lona lua, lea e mafai ai ona fa’anofovaavaaia le tagata ua nofosala, ae poloaina lona tuliina o se vaega o lana fa’asalaga i totonu o le toese.

Na manino i le saunoaga a Fiaui e faapea, o le fa’afitauli o lo o tula’i mai i le tulafono o fualaau fa’asaina a Amerika Samoa, ona o ni isi o fualaau fa’asaina o lo o fa’asa i le teritori, mo se fa’ata’ita’iga o le laau fa’asaina o le mariuana, o lo o mafai ona fa’atagaina e avea ma fualaau togafiti ai ni isi o gasegase i ni isi o setete i Amerika.

“O le fa’asalaga fa’a falepuipui mo se tasi e nofosala i le umia fa’asolitulafono o fualaau fa’asaina, e fa’amalosia lea tagata na te tuliina le fa’asalaga fa’a falepuipui e le itiiti ifo i le 5 tausaga le umi, e aunoa ma se avanoa e mafai ai ona agava’a o ia i le palola, po o le tu’uina mai fo’i o se avanoa e fa’anofovaavaaia ai o ia”, o le saunoaga lea a Fiaui.

I le fesoasoani ai o loia mai le ofisa o le Loia Sili e ala i le ofo atu o fa’asalaga mama mo ni isi o lo o molia ma ta’usala i solitulafono o le umia o fualaau fa’asaina, na taua e Fiaui le matua tatau lava lea i le fono faitulafono ona latou toe vaavaai i le tulafono o lo o i ai, ina ia mautinoa e tatau ona vave fai i ai se suiga ma maua ai e tagatanu’u o le atunu’u se fa’amama avega i tulaga o fa’asalaga a le fa’amasinoga.

Na fesili le afioga i le ali’i faipule ia Toeaina Faufanu Autele, o ia fo’i lea o le ta’ita’ifono o le Komiti o Fa’amasinoga a le maota, pe fia ituaiga fa’asalaga o lo o fa’aaoga e le fa’amasinoga e fa’asala ai i latou o loo molia atu i le umia o fualaau fa’asaina, ae na fa’amanino e le loia fautua e 3 vaega o le Ulutala 13 o le Tulafono o lo o fa’aaoga a le fa’amasinoga e fa’asala ai tagata o lo o molia i le umia o fualaau fa’asaina.

“O le vaega muamua o le tulafono, o lo o fa’atulaga mai ai le fa’asalaga e le silia i le 20 tausaga mo se tasi e fa’amaonia i lona umia fa’asolitulafono, sosoo ai le fa’asalaga lea e le itiiti ifo i le 5 tausaga e fa’asala ai se tasi i le toese pe afai ae tausala i le umia o fualaau fa’asaina, ma le vaega lona tolu o lo o fa’aaoga e e fa’amasinoga, lea e fa’asala ai se tasi i le toese mo le umi e le sili atu i le 5 tausaga, pe afai e ta’usala se tasi i le vaega D o le solitulafono mamafa, o le umia fa’asolitulafono vaega o le laau fa’asaina o le mariuana”, o le saunoaga a Fiaui.

A o le i fa’aauau le molimau a le ali’i loia, na fa’auilavea le afioga i le ali’i faipule ia Toeaina ma saunoa e fa’apea, o le isi lea mafua’aga e ala ai ona faigata ona fa’atino galuega a le fa’amasinoga, o leai lea o se avanoa e tu’u atu e le tulafono e fuafua ai e ali’i fa’amasino a latou fa’aiuga.

Saunoa atili Toeaina e fa’apea, o le taua o le fausiaina o le tulafono, o le galulue lea o le Fono Faitulafono e fau le tulafono, ae tu’u le avanoa ma le faitalia i le fa’amasinoga latou te vaavaai ai i le ituaiga fa’asalaga e talafeagai mo le tagata ma lana solitulafono ua faia.

“E le talafeagai le fa’asala o se tagata e tuli tausaga e 5 i le toese, ina ua ta’usala o ia i se vaega laititi o le fualaau fa’asaina, lona uiga, e tatau ona matua manino lelei vaega o le tulafono ina ia mautinoa e le toe pau le mamafa o fa’asalaga i tagatanu’u”, o le saunoaga lea a Toeaina.

Na fa’amanino e Fiaui i le komiti a faipule e fa’apea, e le tasi se itu e ala ai ona fa’aletonu le tulafono o lo o i ai, afai e ta’usala se tasi i le umia fa’asolitulafono o vaega o le laau fa’asaina o le mariuana po o le pauta oona fo’i o le aisa, e tasi lava le fa’asalaga e tuli, o le taofia lea i le toese mo le umi e le itiiti ifo i le 5 tausaga i le toese.

“Ae afai loa e manatu le tagata o lo o molia e fa’ataunu’u lana fa’amasinoga autu, ae uma ane e faiaina, o le a sili atu ona mamafa le fa’asalaga, aua e leai lava se isi alofaga a ali’i fa’amasino e fai, sei vagana ai le fa’asala o le tagata ua nofosala i le falepuipui mo le umi e le itiiti ifo i le 5 tausaga e aunoa ma se avanoa e palola ai pe nofovaavaaia ai fo’i”, o le saunoaga lea a Fiaui i luma o le komiti a faipule.

O le itu o lo o mafai ona fa’amama avega atu ai le ofisa a le loia sili i le ofisa a le loia fautua, o le ofo atu lea o maliliega aufa’atasi mo i latou o lo o molia i le umia o fualaau fa’asaina, latou te tali ioe ai i le moliaga mamafa e tau feololo lona fa’asalaga, ina ia mafai ai ona agava’a i latou nei i fa’asalaga fa’anofovaavaaia, ae maua ai ma le avanoa o le fa’amasinoga e mata’ituina ai i latou ua molia, po o latou mulimulita’i i tuutuuga ua mae’a ona tu’uina atu latou te usita’i ma mulimuli i ai.