Ads by Google Ads by Google

Manuia le Kerisimasi 2017 - vave maua totogi o le malo

fili@samoanews.com

Talu ai ona o le aso Gafua o le vaiaso o lo’o muamua ia Tesema 25 o le aso malolo mo le Kerisimai o le 2017, o lea ua vave maua ai siaki totogi o tagata faigaluega a le malo o Amerika Samoa, e pei ona fa’amonia mai e le Ofisa o le Teutupe a le malo.

 

O le aso totogi o le malo e pa’u tonu lava ia Tesema 25, ma ua fa’amonia mai e le susuga ia Keith Gebauer, le sui Teutupe a le malo, e faapea o le aso lenei e maua ai siaki totogi o tagata faigaluega a le malo ona o le aso 25 o Tesema o le aso malolo mo le Kerisimasi.

 

Peitai ua fa’ailoa mai e nisi o tagata faigaluega, ua latou tatalo ina ia maua uma e tagata faigaluega siaki totogi, ona o nisi o vaitaimi ua te’a, e le o atoa ma e i ai nisi e le maua totogi, fa’atoa maua i le isi aso o i luma.

 

“Talosia ia, ua manuia le tala o le tupe a le malo, ma ua lelei foi ona faia pepa fa’amaumau mo totogi ina ia maua uma e i matou siaki totogi,” o le tala lea a se tasi o tagata faigaluega i le malo.

 

O le aso ananafi na fa’alauaitele ai se saunoaga fa’apitoa a le Kovana Sili, Lolo Matalasi Moliga, mo le Aso Kerisimasi.

 

“O lo’o avea pea le Kerisimasi ma aso e sili ona taua mo le ‘au Kerisiano, ona ole aso e fa’amanatu ai le soifua mai ole Ali’i Fa’aola o Iesu Keriso, ma fa’ailo ai le fa’amamaina o fanau a le Atua mai le agasala,” o se vaega lea o le saunoaga a Lolo.

 

“Ma ua talafeagai ma fetaui lelei lo tatou fa’afeiloa’i atu i le Kerisimasi ma le loto olioli atoa ai ma ona fiafiaga uma aua o lo’o afifi mai ai le meaalofa sili a le Atua mo le tagata, o le mautinoa lea o lo tatou sao atu i le malo ole lagi.”

 

Sa talosaga foi le kovana ina ia, “Tatou manatua fo’i Toa o Samoa o lo’o tautua i vaega’au a le Malo, o lo’o lamatia le soifua mo le puipuiga o lo tatou sa’olotoga ae maise o se filemu o le lalolagi; ma ia sa’oloto mai pulega saua ma le le amiotonu.”

 

“E ui lava o le Kerisimasi ua fa’atatau i meaalofa, ae ua sili atu ona taua se mea lelei e fai mo lou tua’oi, o se galuega lelei mo se tasi o mo’omia se fesoasoani, o se upu mafanafana mo se tasi o mafatia, po’o le fa’aali fo’i ole agalelei. O le a avea ia faiga lelei e momoli atu ai le agaga fiafia o le Kerisimasi i tagata uma,” o le saunoaga lea a le kovana.

 

Ona o fa’atauga o aso fiafia, o le a pisi fo’i luga o le alatele, ae maise lava i Nu’uuli i le nofoaga o le Laufou Shopping Center, fa’apea ma le taulaga i Fagatogo. O le a fa’ateleina le pisi o le auala i le aso To’ana’i.

 

Talu ai ona o le aso malolo le aso Gafua, o lea o le a tapunia ai uma ofisa o le malo ae maise le tele o pisinisi i Amerika Samoa, e aofia ai faletupe.

 

I le kamupani a le StarKist Samoa, o le a tapunia galuega mo le tolu vaiaso, e amata atu i le fa’aiuga o galuega i lenei aso, Tesema 22, ae fa’ato’a toe amata galuega i le aso 15 o Ianuari, 2018.

 

O le itula e 6 i le afiafi nei, e amata ai poloka a leoleo aua le puipuiga o le atunu’u ina ia manuia nei vaitau o aso faifia. O poloka a leoleo e oo atu i le aso 5 o Ianuari 2018.

 

Ua fautuaina le mamalu lautele ina ia fiafia fa’alelei ae maise lava i latou o lo’o fiafia i le ava malosi ma le pia.

 

Ma o le po o le aso Lulu o le vaiaso lenei sa fa’amea ai pesepesega o le Kerisimasi i le Fale Laumei i Utulei i lalo o le vaaiga a le Ofisa o le Arts Council a le malo.

 

Ona o le aso 25 o Tesema o le Kerisimasi o le a leai se lomiga a le Samoa News i lea aso faapea ma le aso 26 o Tesema.

 

Ia Manuia le Kerisimasi ia Amerika Samoa ae maise Toa o Samoa i so’o se itu o le lalolagi.