Ads by Google Ads by Google

Molia se Tina talavou i le fa’ao’olima i le tulaga muamua


Fa’anenefu Hall ua tu’uaia i lona fa’aaoga o se fasi tioata ta’e e ta tui ai lona tausoga. [ata AF]
ausage@samoanews.com

Na teena e le afioga i le ali’i fa’amasino ia Fiti Sunia le talosaga e fa’aitiitia ai le tupe e tatala ai i tua le Tina talavou mai Leone, lea ua tu’uaia e le malo i le moliaga mamafa o le fa’ao’olima i le tulaga muamua, e mafua mai i le fa’alavelave lea na manu’a ai se isi tama’ita’i ina ua ia fa’aaoga se fasi tioata ta’e e ta tui ai lona lima ma ona foliga i le vaiaso na te’a nei.

 

O le moliaga o le fa’ao’olima i le tulaga muamua, o le vaega A lea i le fa’atulagaina o solitulafono mamafa, lea e mafai ona fa’asala ai se tasi i le toese mo le olaga atoa, po o le taofia fo’i i le toese mo le umi e le itiiti ifo i le 10 tausaga ae le silia ma le 30 tausaga.

 

O le aso Lua na te’a nei ina ua fa’atoa tula’i Fa’anenefu Hall i luma o le fa’amasinoga fa’aitumalo, na poloaina ai e le fa’amasinoga le toe taofia o ia i le toese i Tafuna e aunoa ma se tupe e tatala ai o ia i tua, e fa’atalitali ai moliaga fa’aopoopo na fuafua le malo latou te faila fa’asaga ia te ia.

 

O le aso Tofi na te’a nei na faila ai loa e le malo le moliaga mamafa o le fa’ao’olima i le tulaga muamua, e o fa’atasi ma le moliaga mama o le fa’atupu vevesi i nofoaga faitele na ulua’i tu’uaia ai o ia, ma fa’atulaga ai loa e le fa’amasinoga le tupe e $50,000 e tatala ai o ia i tua i lalo o tuutuuga e ao ona usita’i i ai.

 

O ni isi o ia tuutuuga e aofia ai le fa’asa lea ona ia toe soli se tulafono, aua ne’i ona toe tagofia le ava malosi poo fualaau fa’asaina, aua fo’i ne’i ona toe fa’afeso’ota’ia le tama’ita’i na a’afia i le fa’alavelave lea ua mafua ai ona taofia o ia i le falepuipui.

 

Sa poloaina fo’i e le fa’amasinoga le tu’uina atu o lona tusi folau e taofia e le Ofisa o le Loia Sili, atoa ai ma le fa’asa lea ona ia taumafai e tuua le atunu’u, sei vagana ua mae’a taualumaga o lona fa’amasinoga.

 

O le talosaga a le tama’ita’i loia fautua ia Kate Hannaher o lo o tula’i mo Hall lea sa tu’uina atu i le fa’amasinoga i le aso Tofi na te’a nei, ina ia fa’aitiitia le tupe e tatala ai le ua molia i tua e fuafua i le tau o le ta’avale a lona aiga o lo o i ai, mo le fa’amoemoe e mafai ai ona tatala o ia i tua e tausi lana fanau e to’atolu ma fafaga lana pepe e 6 masina o lo o i ai, na mafua ai ona toe fa’atulaga le isi iloiloga o lenei mataupu i le aso Faraile na te’a nei.

 

A o le i toe tolopo mai le mataupu a Hall i le aso Faraile na te’a nei, e tele ni isi o mataupu sa fia malamalama i ai Sunia, e pei o le tulaga o manu’a sa a’afia ai le tama’ita’i o lo o a’afia i lenei mataupu, ae po o fa’aauau pea ona taofia o ia i le falema’i pe leai. Sa fia malamalama atili fo’i Sunia i le tulaga o lo o taofia ai Hall i totonu o le falepuipui, po o maua ai se avanoa e avatu ai lana pepe e fa’asusu ia te ia.

 

Na fesili fo’i Sunia ia Hannaher po o fea e nofo ai Hall pe afai e mafai ona tatala i tua, a o fea fo’i e nofo ai le tama’ita’i na a’afia.

 

Sa vaaia e le Samoa News le talanoa atu o le Tama o Hall i le tama’ita’i loia ia Hannaher, ma fa’aleo ai loa e le tama’ita’i loia ni isi o mataupu o lo o atugalu i ai le fa’amasinoga, e pei o le tulaga i le tama’ita’i na a’afia, lea ua te’a i tua mai le falema’i ma ua toe fo’i atu nei o ia i lona aiga i Mapusaga Fou.

 

E tusa ai o fa’amatalaga sa tu’uina atu i le fa’amasinoga, o le tama’ita’i na a’afia o le tausoga lea o le ua molia, lea sa nofo i le aiga o le ua molia i Leone i le taimi na tula’i mai ai le fa’alavelave.

 

I le mae’a ai ona fa’afofoga o le fa’amasinoga i nei mau fa’amatalaga uma, na fa’atonu ai loa e Sunia le loia a le malo ia Gerald Murphy ina ia vaavaai i le Fale o lo o sulufa’i i ai tagata mafatia ma sauaina (shelter), pe o se nofoaga lelei lea e ono vaavaai i ai le fa’amasinoga mo sana fa’aiuga mo le ua molia.

 

I le toe valaauina ai o le mataupu a Hall i le taeao o le aso Faraile na te’a nei, na fa’ailoa ai e Sunia le teena o le talosaga a le itu tete’e mo se avanoa e fa’aitiitia ai le tupe e tatala ai le ua molia i tua, ona o atugaluga o le fa’amasinoga i le matuia tele o le fa’alavelave sa tula’i mai.

 

Saunoa Sunia e fa’apea, e ui o lo o atugalu le fa’amasinoga i le saogalemu o le fanau e to’atolu a Hall, ae maise lava i le pepe e 6 masina o lo o fa’asusu ia te ia, peita’i e talitonu le fa’amasinoga o lo o mafai lava e le aiga a Hall ona uia isi auala e auina atu ai lana pepe i le falepuipui e fafaga ai i lona Tina ma toe ave i le fale.

 

Na fautuaina e Sunia ia Hannaher ina ia fesootai ma le Matagaluega o Tautua ma Auaunaga Lautele (DHSS), e mafai ona latou fesoasoani i auala e maua ai e Hall le avanoa e fa’asusu ai lana pepe.

 

Ua toe taofia nei Hall i le toese i Tafuna, se’i vagana ua totogi le tupe e $50,000 lea ua fa’atulaga e le fa’amasinoga ona fa’atoa mafai lea ona tatala o ia i tua, e fa’atali ai lana ulua’i iloiloga lea ua fa’atulaga e faia i le itula e 1:00 i le aoauli nei.