Ads by Google Ads by Google

Onosa’i I Mea Tiga

Vaega: 114

 

Fa’atalofa atu ma fa’afeiloa’i atu i le mamalu o le atunu’u i lenei taeao fou, ae alo maia, o le a toe fa’aauau atu la tatou tala e pei ona masani ai. Na muta mai la tatou tala, ina ua tapena nei le malaga a Ali’ioaiga Alfred, mo lana malaga atu e auai i Vaega A’u a le Malo Tele.

 

O lava fa’alogona ma mafaufauga o si ona tina o Filipina i le alu ‘ese atu o si ana tama, ae ua malie lava lona loto, e fai pea le mea o lo’o mana’o i ai Ali’ioaiga, ma ua fa’apea lava ona fai. O le taimi fo’i lea, o lo’o tuitui pea Lilo, si ona tuagane, e fai le mea o lo’o loto i ai Ali’ioaiga, aua e alu aso, sau fo’i aso, e sa’ili lava e le tamaititi lona lumana’i.

 

O le tele o taimi e talatalanoa ai Lilo ma nai ona tuafafine o Filipina ma Luisa. Ua toe mafaufau i nai o latou matua, ae maise lava o si o latou tina o Malia, e ui lava ina ua fai i lagi le folauga, ae e le mafai ona galo. Ua talatalanoa fa’atasi nei, ma’imau e, mafutaga pe ana le se anoa le oti, se manu, ua molimau nai o latou matua i le tulaga ua tula’i mai ne si o latou aiga.

 

Fai mai, e i ai fo’i taimi e talatalanoa ai nao Filipina ma Luisa, ua toe fa’amanatu uiga o si o la tina, e ui foi ina fa’apea e le o se tina moni o Luisa, ae ua avea lava Malia ma ona tina, ina ua maliu si ona tina, le tuafafine lea o Mose.

 

E i ai lava taimi e fa’ape ane ai tala a Luisa i si ona uso, “Pina, ua e le toe mana’o e fai sou to’alua, ua e fa’asolosolo matua fo’i, e tatau lava ona fai sou to’alua lelei e alofa ia te oe, ma fesoasoani ia te oe.” Ae sau le tali a Filipina e fa’apea, a lea ua matua si a’u tama, ua lava Ali’ioaiga mo a’u, atonu lava ua silafia e le Atua. E sau se taimi, ae e le o le taimi lenei, ua matua Ali’ioaiga. Na uma ai i’ina le toe talanoa o Luisa i lona uso, e uiga i sona to’alua. Ua tapena nei le malaga a Ali’ioaiga, fai mai, e fai ma loimata o Filipina mea uma, e le gata ia Filipina, ae ua fa’apea fo’i Lilo ma Luisa. Ua le ‘asa ma le o’o ane o Mataniu e asi ane i latou.

 

O taimi uma lava e alu ane ai le teine, fai mai, e fai lava ma fetagisi ma Filipina, ona o le tulaga o le a o’o i ai Ali’ioaiga. O le tele o taimi e le tautala Filipina, ae e fai uma e Mataniu fa’atonuga o mea uma o le aiga. O si ona tina fo’i o Loleta, ua matua fo’i, ma o le tele o mea, ua fa’atino lava e Mataniu, ona o ia e ulumatua i le fanau a Lilo ma Loleta.

 

Ina ua alu ane Ali’ioaiga i se tasi aso, na fa’ailoa ai loa i lona tina, le aso tonu e alu ai le malaga a tama ua ma’ea ona fa’atauto e ulufale i Vaega ‘Au a le Malo Tele. O lea la ua nofo lava Filipina ma faufau loloto i le tulaga lea. Ua ma’ea fo’i ona fa’ailoa e Filipina i lona tuagane ma lona to’alua, fa’apea fo’i si ona uso o Luisa ma lona to’alua.

 

Na alo nei Filipina mo le ‘aiga e fa’amavae ai ma si ana tama, fai mai, na taofi lea fuafuaga e lona tuagane, peita’i, sa va’ai fo’i Lilo i se isi itu, e to’atasi lava le tama a si ona tuafafine. O lea na malie ai loa Lilo i le mea ua loto i ai Filipina, ia fai se ‘aiga ma ia fai fo’i se sauniga lotu e talosia ai le malaga a si ana tama o Ali’ioaiga.

 

Ua fa’apea lava ona fai, sa auai uma Fa’afeagaiga fa’apea o latou Faletua, o aiga uma na auai i le aso fiafia. E mo’i lava o se fiafiaga, ae i le loto o Filipina, o lo’o tagi lava, i le alofa i si ana tama e to’atasi, o le a alu ‘ese atu ma ia.

 

E faia pea...