Ads by Google Ads by Google

Onosa’i I Mea Tiga

Vaega: 18

 

Fa’atalofa atu i lou alafa’i mai i le manuia i lenei taeao fou, ua o tatou fa’alogoina le tausagi mai o manulele, ma le oso a’e o le la, ua fa’ailoa mai ai le alofa ma le agalelei o le Atua e ala i Lana tausiga alofa mo i tatou e le mavae. E ao ai ona o tatou fa’apea ifo, “Le Atua e, e tumau atu lava le vi’iga ma le fa’ane’etaga i Lau Afio e fa’avavau, fa’avavau lava, Amene.”

 

Alo maia mo le toe fa’aauauina o la tatou tala, ae ia manuia le alo atu o le atunu’u i faiva ma tiute o le a feagai ai i lenei aso. Na muta mai la tatou tala, ina ua fa’amatalatala e le toeaina o Mose i a Lefefe ma Vesi le amataga o le ma’i o le lo’omatua o Malia. Fai mai, ua na o le tu o Vesi ua le tautala, ae ua oso a’e le tala a le toeaina o Lefefe, “Oi ta fe fe Mose, o lona uiga o le mea le na na tupu, a’o ai sa i ai i le fono a le aulotu, aua ta te le iloa e ta ita latou le na fono.”

 

Na tali le toeaina o Mose, sa i ai uma lava tina, fa’apea ma le Faletua o le Fa’afeagaiga, ae fai mai, ua fiu le faletua e taofiofi le lo’omatua nei, ae ua le mafai, ua tu i luga ma savali atu i le pito o lo’o nofo mai ai Lonisi. O le mea lea na tuli mai ai loa e le faletua le tamaititi e avatu a’u. Oe, se ou te taunu’u atu, o mea masei mea na ou va’ai i ai, ua tatala le ie o le lo’omatua ua telenoa ma sino atu i le itu o lo’o nofo mai ai Lonisi, ae o talane tonu lava o Lonisi o lo’o i ai le faletua.”

 

Fai mai, ua le mautonu Lefefe i lea taimi, ae ua na o le lu lu o lona ulu, ma tilotilo i lalo, a’o Vesi, ua o’o i tuapa o ieresalema mafaufauga o Vesi e uiga i le lo’omatua o Malia. Na fa’apea mafaufauga o Vesi, “Talofa e, i le vaivai o le mafaufau o lenei lo’omatua, talofa e, i uiga fia tagata ma uiga fa’amaualuga o Malia, ia o fea nei la, o lea ua toe tagi ma ua toe salamo, ae ua leai se aoga, ua masa’a le ipu vai.”

 

Ina ua ma’ea le talatalanoaga a Mose ma Lefefe ma Vesi, na o latou va’ai atu ai, ua sau le solo fa’anitu a tina. Na fa’atalitali nei Mose ma Lefefe se i va’ai po’o ai, ae va’ai atu, e ta’imua mai e le Faletua o le Fa’afeagaiga ma isi tina, ma o lea o lo’o sau ai ma Lonisi, le lo’omatua lea na misa ma Malia i le fonotaga a le aulotu.

 

“Oi se talofa lava tina, ia ua ta’u tina atu lava oe le Faletua, ia afio maia ma tala mai a’ao i totonu o le fale.” Na fa’atopetope nei le la’a a Vesi e agai atu i le fale, ma fa’atonu loa Luisa ma Lesina e tapena fa’avave le fale, ona o lea ua o’o atu le Faletua o le Fa’afeagaiga ma tina o le aulotu. Ua fa’apea lava ona fai, aua e fetaui lava le o’o ane o Vesi ma le ma’ea loa ona fafaga e Luisa ia le lo’omatua o Malia.

 

Na musumusu ane nei le teine o Filipina i lona tina, e ta’u i ai le savali a le Faletua ma tina o le Aulotu lea ua taunu’u ane. Fai mai, e musumusu ane i ai, ae fa’apea le tala a le lo’omatua, “Oi e a?, fa’atoa o latou iloa lava lea o le auala e o’o mai ai i le fale, ai ana o mai ua ou oti, ai se talie.” E tomumu lava le lo’omatua o Malia ma a’apa ifo i lona ie ‘afu ma ufiufi ai lona tino. Ae fai mai, ua matua’i matagofie le mea e taoto ai le lo’omatua, ua matua’i mama lelei, e leai se manogi ma’i o i ai, ona o le tapenaga a le teine o Luisa.

 

Ua ulufale le Faletua ma tina o le Aulotu i totonu o le fale, ma na savali sa’o atu lava le Faletua ua feiloa’i i a Malia. “Malia, ua a mai oe, ia e onosa’i, e au mai e le Atua Lana fa’amalologa mo oe.”

 

Ua le tautala le lo’omatua, ae ua auaua’i atu nei tina o le aulotu ma o latou feiloa’i.  Ae fai mai, ina ua o’o ane le lo’omatua o Lonisi, fai mai, na fusi mau e Lonisi ia Malia ma tagi, ma saofa’i ifo loa i talane o Malia. O le tala fai mai, o la’ua lava ia, e fa’afetoai lava e le tasi le isi, o le isi fo’i itu, e tau fa’alili Lonisi i a Malia, ae o le lo’omatua o Malia, e le mana’o lava i se tagata na te seua sana tala.

 

Ina ua uma le asiasiga a le Faletua ma tina, na tu’umuli uma lava, ae ua nofo nei Lonisi e eva ma moe i le fale o Malia. O Lonisi, o se tina e fa’akomikomi ana amio, fai mai, a i ai ni mea e tutupu i totonu o le nu’u, ae maise o le itupa o tina, o Lonisi lava e fa’amama avega, e ala i ona uiga malie ma uiga fiafia. O lea la ua mana’o nei e momoe ma Malia, ma fai a la tala, ia se i tatou fa’atalitali, po’o ai o le a o’o i ai tala uaea moso’oi lea o le a fai nei e Malia ma Lonisi.

 

E faia pea...