Vaega: 72

Alo maia, o le a toe fa’aauau atu la tatou tala. Na muta mai la tatou tala ina ua uma nei le fa’aipoipoga a Lilo ma Loleta, ae o lea ua o’o i le masina e fanau ai le tama’ita’i. Ua le toe faigaluega Loleta, ae ua malolo mai i lana galuega, ae ua na o le Lilo o lo’o faigaluega pea. O lea fo’i ua tau i’ite tuafafine o Lilo, le teine o Filipina ma le teine o Luisa, ona ua vave tele ona fanau Loleta, a’o lea fa’atoa lima masina talu ona nonofo ma Lilo .

O le mea ua tupu, ua fai lava ma alu Filipina i le fale o si ona uso o Luisa, ua le gata i le talatalanoa e uiga i lo la tuagane, ae ua fa’ailoa fo’i e Filipina ia Luisa, ana fuafuaga mo lona lumana’i. O lea la e toso lava le ‘ili ‘afi e le i motu lava le la’au,  ae fa’alogo mai, ua tau vala’au atu lo la tina.

Na tutu a’e nei i luga teine ma tamomo’e ane i le fale tele lea o lo’o ta’oto’oto ai Loleta, a’o le taimi lea, o lo’o galulue fo’i Mose ma Vesi i le fa’atoaga. E taunu’u ane Luisa ma Filipina, ua ‘ese le tulaga ua i ai le teine o Loleta, ua na o le fa’ataitaio nei ma ta’oto. Ua aunagi ane le lo’omatua ia Luisa, e tamo’e e fai ia Lonisi ia vave ane i le fale, o lea ua i ai le mea ua tupu ia Loleta.

Na tamo’e fa’anatinati nei Luisa i le fale o le lo’omatua o Lonisi, aua o Lonisi, o se fa’atosaga i totonu o le nu’u, ae maise fo’i, o le to’atele o nisi tina, ua ola ona o Lonisi, o lea la a ola a’e se tina, o se teine, ua toatiti, so’o le nu’u atoa i le igoa o Lonisi. Na tamo’e nei Filipina ma tau vala’au Mose ma Vesi ina ia o ane o lea ua tiga le manava o Loleta. Na fa’alogo mai loa le toeaina o Mose ua alu atu le vala’au, tu a’e loa i luga ma vala’au ane i a Vesi e fo’i ane loa i le fale.

O le taimi lea, e le i manava ane le galuega a Lilo, aua o le aso tonu lea na fai ai le su’ega tusi a le faletupe o lea la e pisi ai Lilo, o le tele o aso o le na vaiaso, e manava ane le tama ua ta le valu po’o le iva i le po. O lea la ua fa’atiga Loleta, ae e le o i ai Lilo i lea taimi. Ua taunu’u ane le lo’omatua o Lonisi, na fa’ate’ia le lo’omatua i le va’ai atu i a Loleta, o mea masei mea ia ua tupu mai.

Na fa’atonu nei e Lonisi ia Luisa e tunu vave ane se ulo vai vevela, ua fa’apea lava ona fai, na fetaui lava le taunu’u ane o Mose ma Vesi, ae fai loa le fa’atonuga lea a Lonisi. Fai mai, e le i toe fa’atali le tamaloa o Vesi, e le i umi ae maua loa le vai vevela. Ua le taugata le teine o Loleta, ua na o le fa’ataitai o, nei ma tauvala’au ie igoa o Lilo.

Na tali ane i ai Lonisi, “Leta, o Lilo e le i manava mai lana galuega, ae ‘aua e te popole, o lea ua ou sau, fa’ato’ato’a mai lou mafaufau, o lea fo’i e fa’atali mai Malia ma Mose, ae onosa’i i ou tiga, ae ia ola si au tama, pau lea o le mea ou te mana’o i ai, onosa’i Loleta, a ou fai atu loa e te o’ono mai, ona fai lea, e vave ai ona e malolo.”

Ua le iloa e le lo’omatua o Malia le mea o le a fai, ua na o e va’ai ane ma le alofa ia Loleta, aua ua o’o fo’i ia i ai, i ia ituaiga tiga, i le taimi na fanau mai ai Lilo ma Filipina. Ae o le va’ai a le lo’omatua, e le i tigaina fa’apea sona ma’i, e le i umi lava, ae malolo ia, ae o le va’ai a Malia i a Loleta, e ‘ese lava tiga ia ua fa’afeagai nei ma le to’alua o lana tama.

O a fo’i mulumuluga veve a Luisa ma Filipina na fai e uiga i le to’alua o le la tugane, i le taimi lea, ua lagona le alofa, i le va’ai atu i tiga ua feagai nei ma Loleta. E leai lava se isi o tapa i ai le teine, ua na o Lilo, Lilo lava lea ua tau vala’au nei. Na iloa lelei lava e Malia, ua tatau ona a’ami mai Lilo i lea taimi, po’o a lava galuega ma tupe o lo’o maua, e le aoga pe afai e i ai se mea e tupu i a Loleta.

Na tamo’e nei Vesi i a Lefefe, manatua fo’i, o Lefefe e fai lana ta’avale, na fa’ate’ia Lefefe i le natinati atu o Vesi. E le i toe fa’atali le toeaina, na alu fa’asasa’o loa ma le ta’avale e le i toe fa’atali. Na pau le fesili a Lefefe, “Vesi, o i ai Lonisi, e tatau ona a’ami Lonisi i le taimi lenei.” Na tali Vesi, ua i ai Lonisi i lo latou fale, ma o lo’o va’aia Loleta.

E faia pea...