Ads by Google Ads by Google

Onosa’i I Mea Tiga

Vaega: 9

 

Tatou fa’afetaia pea le alofa ma le agalelei o lo tatou Tapa’au oi le lagi, ona o Lana tausiga alofa ma lona agalelei mo i tatou e le mavae, aua o lea ua va’aia atata o manuia i si o tatou atunu’u e ala i le maleifua mai i fanuga lelei i lenei taeao fou. E ao ai ona o tatou fa’apea ifo, “Le Atua mamana e, o Au afioga, o le sulu lea i o matou vae ma le malamalama i o matou ala, o a lava mala ma faigata o lo’o foufou mai, ia e alofagia i matou uma i Lau tausiga alofa, a’o le vi’iga ma le fa’afetai matou te fa’afo’i atu i Lau Afio e fa’avavau, fa’avavau lava, amene.

 

Ia manuia le alo atu i faiva ma tiute o lenei aso, ae alo maia, o le a toe fa’aauau atu la tatou tala fa’asolo, “Onosa’i i Mea Tiga”. Na muta mai la tatou tala, ina ua le toe sau le afu malulu o Vesi, ae ua sau lona afu mafanafana, aua o lea ua ia mautinoa nei, e le o ita le toeaina o Mose i a te ia, ae e i ai le mea o lo’o fia malamalama ai. Ua le toe tautala le tamaloa fai ava i lea taimi ae ua na o le tilotilo ane nei i le toeaina.

 

“Vesi, o e manatua lau tala lea na fai i le nofotaga a le nu’u, lea na e lafo ai e le tala e fa’apea, “O a’u o le tautua, a ou ta’oto i lo’u moega i le po, e le afai ona ou moe, ona o lo’o o’u mafaufau, pe a mago lo’u ieie, pe o lo’o lelei a’u ‘ato’ato, pe ua ma’ai fo’i la’u aga’ese (sapelu). Aua a ou fai atu lava i la’u sapelu e alu e au mai uma uluulu o la’au tetele ma la’au laiti e fai lava e lau sapelu.” E mafai ona e fa’amalamalama mai i a te a’u le uiga o lau tala lea.

 

Ua nofo Vesi, ua te’i, ona sa i ai lona manatu pe o i ai se mea o tupu ae na te le o iloa, pe a tonu fo’i o lo’o i ai se mea o tiga ai le loto o le toeaina, ae ua na o ia e mafai ona tufa ane i ai. Ua nofo Vesi ma tilotilo ane i le toeaina o Mose.

 

“Mose, fa’afetai atu lava, e moni na lafo la’u tala i le po lea, ae ona o lo’u le malie tele ia Vailepa, lea na tali ane ia te oe, o le mea lea na ou le malie ai, ma o le mafua’aga lea o lo’u oso atu pe maua so’u avanoa.

 

“Ae fa’afofoga mai oe le tama, o le tala ma upu na lafo e lo’u tama i le fonotaga a le Pule’aga atoa na fai i totonu o Savai’i. O le mafua’aga o lea fonotaga, o le tau sa’ili o se Ta’ita’i Fono, ma na palota uma lava e avea lo’u tama ma ta’ita’ifono, peita’i, na toe tula’i lava se tasi o tamali’i ma fa’ailoa lona manatu e le mana’o e ta’ita’ifono lo’u tama. O upu la ia na tali i ai lo’u tama i luma o le Fonotaga a le Puleaga aoao, ae o le upu na lafo e lo’u tama e fa’apea, “A ou fai atu lava i la’u sapelu e sau ma au mai le ulu o le tagata e loto leaga i a te a’u, e fai lava e la’u sapelu, e usita’i lava la’u aga’ese i la’u fa’atonuga.” Na manumalo lo’u tama i le tofi Ta’ita’i Fono o le Puleaga atoa i lea fonotaga.

 

Ua le tautala le toeaina o Mose i lea taimi, ae ua na o le lulu o lona ulu, “Vesi, ua ou iloa lou tama, e le o se tagata fa’atauva’a, ma ua ou iloa fo’i uiga o lou tama, e le fefe lava i se tagata, e le fefe fo’i e tautala i le mea sa’o ma mea e tatau ona fai, ae fa’afetai atu i a te oe si o’u atali’i, o lea ua ou malamalama i le uiga tonu o le tala.

 

Na toe fa’apea ane Vesi, “Tama, o le tala fo’i lea na lafo e lo’u uso o lo’o avea ma Patele, i le fonotaga na auai le Palemia, ina ua lafo le upu a le Palemia, o Patele, o tautua i totonu o le Ekalesia. Na tula’i ai lo’u uso ma lafo ie tala lea, ona ua tiga ina ua saunoa le Palemia i tulaga ia.” Ua ‘ata le toeaina o Mose ma lulu lona ulu, oi e a ea?” Ua alu nei le tali e, a Mose ma Vesi, ua toe fa’amatalatala nei e Vesi i le toeaina o Mose ia mea uma lava, ua pei e ‘ene e se isi le toeaina i lea taimi.

 

Ua nofonofo nei ma talatalanoa, ua toe fa’aosofia manatu lelei i lea taimi i le toeaina, ae o le mea o lo’o tupu, e le o iloa e Vesi, se manu ia e ‘afu i le sapelu a le toeaina i lea aso. Ua lagona le fiafia o le loto, ua le toe manatu i ia tulaga vaivai, ae ua talatalanoa ma fetufa’ai i mea lelei, aua le aga’i i luma o aiga. Na fa’ate’ia le talatalanoaga a Mose ma Vesi ina ua fa’alogologo atu o sau le tau vala’au, “Mose, Mose, Vesi, Vesi, o fea ea oulua?, ta fe fe ai ua toe titi uma ona oulua ilia uma la’au, o maia, o lea ua o mai Luisa ma tamaiti, agusa ua pei oulua o fafine faitatala, o maia.”

 

E faia pea…..