Ads by Google Ads by Google

Onosa’i I Mea Tiga

Vaega: 12

 

Fa’atalofa atu i lou alafa’i mai i le manuia i lenei taeao fou, i le alofa ma le agalelei o lo tatou Matai oi le lagi, e i ai le fa’amoemoe o lo’o aoina pea le masina i le soifua laulelei o le atunu’u. E ao ai ona o tatou fa’apea ifo, “Le Ali’i, o a lava faigata ma tiga o lo’o feagai ma i matou i lenei lalolagi, matou te tu’i pea le mulipapaga ma o matou tapua’i faiva, e ala i lo matou fa’atalitali atu ma le loto maualalo mo Lau fesoasoani, ae matou te fa’afo’i atu lava le vi’iga ma le fa’afetai i Lau Afio e o’o i le fa’avavau, amene.”

 

Na muta mai la tatou tala ina ua matutua Mose ma Malia, o a fo’i uiga fa’amaualuluga ma le fia tagata na o’o i ai lenei ulugali’i, o lea ua o’o i le lagoto o le soifuaga, ina ua matutua. Fai mai le tala, a o’o ina fa’asolosolo matua le soifuaga o le tagata, ua suiga malie fo’i uiga ma amioga. Atonu e sa’o lea manatu, ae o le isi fo’i manatu, o le isi tagata tiga lava ona va’ai ifo ua tau fuli i le lua, ae le tu’ua ai lava le amio fa’atamaititi, ma le toe fia la’ititi, ae ua leaga lava mea faigaluega.

 

Ia o tatou nofo uta i ia tulaga, aua po’o ai lava e fai mai ua toe fai ta’otoga e sui ai ona foliga ma lona tino, e o’o lava i le pala o ivi ma lalo o le tu’ugamau mea uma o le olaga lenei. Ae ia o tatou fa’amoemoe pea i le Atua o ia o le Ola, o ia o lo tatou ‘olo maualuga ma lo tatou malosiaga i mea uma.

 

Fai mai ua iloa lelei e tagata o le nu’u ia suiga ua o’o nei i ai le toeaina o Mose ma le lo’omatua o Malia, ina ua ma’i Malia ma ua maua i le gasegase faigata o le kanesa. Fai mai, fa’atoa iloa mulimuli ane e le toeaina o Mose ma lana fanau le ma’i ua maua ai si o latou tina. Ae ua uma taulasea, uma fofo, uma fo’i so’o se vai Samoa ona fai ai togafitiga o Malia e leai lava.

 

Na i’u ina o’o i le foma’i Samoa fai mai ai ua ulufia e se aitu. O lea fo’i la na o i ai le si’iga ma’i ona o le tau sailiga lava o se mapusaga mo Malia. ina ua o i le foma’i Samoa lea, fai mai, na lagona le fefe o le tama o Lilo ma le teine o Lesina, ona ua  ‘ese mea ia ua va’ai atu nei i ai. O le si’iga ma’i na o, o le toeaina o Mose ma le isi matai o lo latou aiga, ma le uso o Malia, fa’apea ma lana fanau. Fai mai, ua fa’atautala nei e le lo’omatua foma’i ia Malia i lea taimi. “Malia, fa’asaga sa’o mai lava ia te a’u, ou te iloa lou tigaina, ae se su’e mai lava le auali’i ia e fa’asoesa nei i a te oe, talofa e, Malia, fa’asaga mai, se’i iloga lava e fai i le vai lea, ona fa’atoa o ‘ese lea o le auali’i lenei, ta inoino e, ua le o e tata’a sa’o, ae o mai e fai fua tagata, fa’asaga sa’o mai i a te a’u.”

 

Ua tu a’e nei i luga le teine o Filipina ma tau fa’asa’osa’o le nofo a si ona tina e fa’asaga atu i le itu o lo’o nofo mai ai le lo’omatua foma’i. Fai mai, na ona velo mai lava o le lo’omatua foma’i o le vai o le matalafi, me’i solo Malia. Toe sasau mai le isi velo a le lo’omatua foma’i, ae maoga a’e i luga ma le tala a le matai lea na o e si’i mai.

 

“Se o nei pogaua se, ua le o mai e velo a’e i luga ni ato tupe se i fai ai le mau fa’alavelave ua sau mai tua sau mai luma, ae o mai toe fai nei mea valea i tagata, velo i ai le vai.” Na ona liliu ane lava o le lo’omatua o Malia, atigu ane ona nifo i le matai lea, ma fa’apea ane, “E, ta inoino i lou le mafaufau, ua toeitiiti ou alu atu gali oe, e, fa’amaga a’e i luga le gutu, le mafaufau, a’o fela ea la.” Fai mai, na ona tu a’e lava i luga o le toeaina o Lefefe alu loa i le atoa e le i toe fa’atali.

 

E faia pea...