Ads by Google Ads by Google

Pasia Senate i’ugafono fa’aopoopo ai nofoa mo Manu’a i le Senate

ausage@samoanews.com

E 14-0 le palota na pasia ai e le maota maualuga i le taeao ananafi la latou i’ugafono so’ofa’atasi, e talosagaina ai suiga i le Fa’avae Toe Teuteu a Amerika Samoa, ina ia mafai ai ona fa’aopoopo nofoa e 2 mo le Manu’atele i totonu o le maota maualuga e pei ona i ai i i le tele o tausaga ua mavae.

 

I le mae’a ai ona faitauina o le iugafono soofaatasi i lona faitauga fa’atolu i le taeao ananafi, na tula’i ai loa e afioga i le ali’i Senatoa ia Laolagi F. S Vaeao ma fa’atula’i le mau, ina ia tu’uina mai loa le i’ugafono so’ofa’atasi mo lona pasiaina.

 

Saunoa Laolagi e fa’apea, o lo o manino lava le agaga o le i’ugafono, e le o talosaga mo ni nofoa fou mo Manu’a, ae ia toe fa’aatoa nofoa e 5 a Manu’a sa i ai i totonu o le maota maualuga i tausaga ua mavae, e ala i le toe fa’aopoopo o nofoa e lua sa aveese.

 

Na fa’amanino atili e le afioga i le Fa’atui ia Laolagi e fa’apea, o lo o manino le Fa’avae, afai e mae’a ona pasia e le maota maualuga lenei i’ugafono, ona ave fo’i lea i le maota o sui mo sa latou fa’aiuga, afai ae pasia ai, ona tu’uina atu loa lea i le afioga i le ali’i kovana, ma fa’atonu ai loa e le kovana le Komesina o le Ofisa o Palota a le malo, ina ia tu’u atu le mataupu lea e fa’atatau i suiga o le Fa’avae i le palota tele e le atunu’u e soso’o ai.

 

Saunoa le peresetene o le Senate ia Gaoteote Palaie Tofau e fa’apea, e le fou le mataupu lenei, ae o le itu taua, o lea ua mae’a ona lalafo i ai afioga i Senatoa ma ua tasi i ai lo latou fa’amoemoe.

 

Sa ia fa’amanatu i afioga i Senatoa e fa’apea, tusa lava pe pasia atu i le maota maualuga le iugafono soofaatasi, e tatau fo’i ona ave i le maota o sui mo sa latou fa’aiuga, ae talu ai o lea ua toe 2 aso fono o lo o totoe i le tauaofiaga lona 4 lenei o le nofoaiga lona 34 a le Fono Faitulafono, ona tapunia aloaia loa lea o galuega a le Fono, ae i ai lona talitonuga e fai aso le Atua.

 

“Pau le itu taua, ua mae’a ona faia sa tatou galuega, o lea fo’i ua taunu’u ia tatou le tala a Pilato (Fa’amasino sa ia faia le fa’amasinoga o Iesu le Fa’aola), ua fafano atu lava ona lima i lenei mataupu, o le itu taua ua mae’a ona fa’atino la tatou galuega”, o le saunoaga lea a Gaoteote na tali e ai isi afioga i Senatoa.

 

Sa ia taua atili fo’i e fa’apea, e leai se eseesega o le Falelima o le Manu’atele e 5 ona nu’u mavae, ma le itumalo o le Vaifanua-tele e 5 fo’i ona nu’u mavae, peita’i o le a vaavaai i ai i se taimi o i luma mo lea fa’amoemoe.

 

I le taimi na talanoaina ai e le Senate lenei iugafono, sa tele suiga na manatu i ai ni isi o afioga i Senatoa mo a latou itumalo, e pei o le afioga ia Magalei Logovi’i lea fo’i sa ia taua le tatau lea ona fa’aopoopo se isi nofoa mo lona itumalo o Tuala-uta, o le afioga ia Soliai T. Fuimaono lea na ia talosagaina se nofoa e toe fa’aopoopo mo lona itumalo o Ituau, fa’apea ai fo’i ma le afioga a Gaoteote lea fo’i sa ia talosagaina se nofoa e toe faaopoopo mo lona itumalo o Vaifanua-tele.

 

Ae i le fa’aiuga o felafolafoaiga, na tasi ai le fa’afitiga o aleaga i afioga i Senatoa, ina ia tu’u pea le talosaga a le itumalo o Manu’a e fa’aauau, e o o mai lava fo’i le taimi e fa’aulu ai suiga a itumalo ta’itasi mo ni a latou nofoa fa’aopoopo.

 

O Senatoa na palota ioe i lenei i’ugafono soofaatasi e aofia ai Galea’i M. Tu’ufuli, o ia fo’i lea na fa’aulufaleina le i’ugafono soofa’atasi, Laolagi F. S Vaeao, Fuiava Avaloa, Mata’utia Afonotele, Tialavea Misualapa, Tuaolo M. Fruean, Afoa M. Lutu. Uti Petelo, Soliai T. Fuimaono, Alo Fa’auuga, Gaea P. Failautusi, LeAtualevao Asifoa, Avegalio Aigamaua ma le afioga i le Peresetene, Gaoteote P. Tofau.