O le aoauli o le aso Faraile na te’a, sa fa’atasia uma ane ai faia’oga i a’oga uma a le Malo fa’apea ma aufaipese a aoga maualuluga uma ma aufaipese fo’i a a’oga tulaga muamua mo le latou Fa’aaliga Pese i le Matagaluega o Tupulaga ma Tina i Pago Pago, ma ua avea lea fo’i fa’aaliga ma se sao e fa’afiafia ma fa’amalo atu ai i faia’oga uma o lo’o faigaluega i afoga uma a le Malo.

Na tatala fa’apitoa le fa’atasiga tele na matua fa’atumulia atoa le faleta’alo atoa i PagoPago i le vasega o faia’oga o Aufaipese a a’oga maualuluga e fa, Samoana, Leone, Fagaitua ma Tafuna ae ese ai aufaipese a agog tulaga muumuu a Tafuna ma Pavaiai, fa’apea fo’i le vasega o matua sa fia molimauina lea aso tuupoina.

Ina ua tutula’i le tama’ita’i Fa’atonusili o A’oga Ruth Matagi Tofiga, sa ia fa’ailoa lona agaga fiafia ina ua aufa’atasia le vasega o faia’oga, fanau a’oga ae maise o matua e fa’afofogaina taleni pese a le fanau, ae maise o lo’o fa’atatau fatuga uma i le alofa fa’atina o faia’oga ma le latou galuega fita o lo’o nafa taulima ai lo latou olaga a’oa’oina.

I le saunoaga a le Fa’atonusili sa ia fa’afetaia ai le galuega a faia’oga i aso ta’itasi, ae maise o pule aoga ma latou pulega ta’itasi ona o le galuega o lo’o fa’atino e i latou, o le lumanai lea o le atunu’u ae maise o le olaga o le fanau o lo’o a’oa’oina. “Fa’afetai aua e tusa pe o le a le tulaga o i ai le taumafaiga a le Matagaluega, ae o lo’o outou tu’i le mulipapaga ma fa’aauau pea lava le galuega i aso ta’itasi. O lo outou naunau ina ia manuia olaga o le fanau, ae maise o le lumpna’i lea o le malo o Amerika Samoa, o lo’o tatou fa’atauaina i le taimi nei. Le fanau a’oga, fa’afetai tele i lo outou sogasoga i nei taleni, e talenia tele o tatou tagata i Pesega, ma e le o valetu’ulima lea ia te outou le fanau, ua iloga le matagofie o tapenaga o le tausaga ua te’a, ae o lea fo’i ua fa’ateleina i tatou ua fa’atasi mai i lenei tausaga. Malo le onosa’i, ia outou tinou i a’oa’oga ma ia outou fiafia e fa’aleleia atili a outou taleni pese.”

Ina ua mae’a sa fa’alauiloa mai loa le Pule A’oga ua mauaina le fa’ailoga “Pulea’oga o le tausaga 2017” ma sa mauaina lea e le pulea’oga i le a’oga tulaga muamua i Tafuna. Na mae’a ona taua’aoina lona lea fa’ailoga, ona soso’o loa lea ma le aufaipese muamua sa tatalaina ai pesega e le Aufaipese a Samoana e ta’ita’ia lea e Pati Pati Jr. E tolu a latou pese, Le Fanau e, He’s God, ma le latou pese mulimuli na fa’afiafia ai faia’oga o le “Proud Mary.”

Na soso’o ma Leone High i a latou fo’i pese na tapena mai lea na muamua mai lava Moana, Singing the Praise ma le latou pese faîtaga mulimuli lava, “Just my Imagination” o nei pese fiataga e matua oso ai lava le nene’e o faia’oga ma tutu i luga fa’alavelave ai i le taimafaiga a nai taitaipese e taimi latou pesega, ae ua fa’asiva e i latou nei faia’oga o e musika.

Ina ua mae’a Leone ona soso’o mai lea o Fagaitua na toe fa’afo’ia le mataupu i tua i peseta fa’a-capella. E le taina i ni piano ae na’o leo lava e fa e usu matagofie ai pese, ma na mua lava i le “Fa’afetai i le Atua.” O le isi pese na soso’o ai o le Fa’atalofa ma e fai ai fo’i a latou taga, ae mulimuli i le pese Aualofa mo Tina uma lava, “Fa’afetai Tina.”

 Na soso’o ma pese fa’asalamo a le A’oga Tulaga Muamua i Pavaiai lea sa latou usina ai le pese na tusia ma fa’anota e le susuga le ali’i Faipese o Namulauulu Paul Pouesi, “Matou te Vivi’i atu ia te Oe.” Peita’i o le latou pese lona lua ma na faia ai fo’i latou taga o le vi’i mo faia’oga uma, “Faia’oga e.”

O le aufaipese lea na matua patipatia le matagofie o le fa’anotaina o pese sa latou peseina, e faigata fo’i, sa matua au lelei leo o le fanau, o le vasega 8 atoa a le Laumua o le Falcons lea faia le aufaipese atoa mai Pavaiai Elementary. O le ta’ira’i pese, o le susuga Mekiafa Tapopo Vaofanua.

Na tula’i mai fo’i lea o Tafuna Elementary ma le latou aufaipese to’atele ma le latou sao matagofie fo’i mo lea aso iloga. E matua iloga fo’i le latou tapenaga i le pese mo Tina uma, “Mothers Day Medley” ae fa’ai’u i le latou “Saafiafiga mo Faia’oga!”

O le vaega mulimuli na tomuli i ai le aso, o le Laumua o le Toa, Tafuna High ma sa toe fa’atepa ai e Tafuna le fa’apotopotoga uma i pesega i aso ua mavae - “Fonuea” oso atu ai ma le latou “Atogi” o le suifefiloi e faia ai ma taga, ae faaiu i le pese fa’apitoa mo faia’oga uma, “E Tagi ai le Fatu!”

I lenei tausaga ua matua fa’ato’ateleina atile fanau a’oga ma faia’oga fa’apea matua, ua oo atu i lea fa’aaliga tele, ma ua fai fo’i ma se ta’iala i le matagaluega lea sa nafa ma lenei fa’amoemoe, aua e le’i taitai ona lava pe so’o le mea’ai ma le faguvai mo le mamalu na poto i lea aso fa’apitoa mo faia’oga ae maise o le fanau a’oga ma latou aufaipese.

Matagofie le siitaga ua i ai nei le tomai i peseta ae maise fo’i o fatuga e fiafia le fanau e pepese ai, tainane le tomai o ali’i faipese mo a’oga ta’itasi ua auai i lenei tausaga. O Pagaiai lava lea e fai mai lava lo latou sao mo le taleni, ae o lea fo’i ua fa’aopoopo atu i ai ma Tafuna Elementary.