Ads by Google Ads by Google

Polokalame e tete’e atu ai i sau’aga i totonu o aiga


Sui o le Vaega o le Toe Afua mai Matua a Tina ma Tama matutua, sa auai i le polokalame sa tu’u fa’atasia e le Matagaluega o Tautua ma Auaunaga Lautele (DHSS), e tete’e atu ai i sau’aga i totonu o aiga, lea sa fa’ataunu’uina i le Fale Laumei i Utulei i le taeao ananafi. [ata AF]
ausage@samoanews.com

O le galulue faatasi e fetufaa’i auala ma metotia e tete’e atu ai i sau’aga i totonu o aiga, o le autu lea o se polokalame sa fa’ataunu’uina i le Fale Laumei i Utulei i le taeao ananafi, lea sa fa’atautaia e le Matagaluega o Tautua ma Auaunaga Lautele a le malo (DHSS), ina ia maua ai se fofo o le fa’afitauli o sauaga i totonu o aiga ua fa’atupulaia i le taimi nei.

 

O se sauniga lotu na ta’ita’ia e le susuga Rev. Ioane Evagelio na tatala aloaia ai lenei polokalame, sosoo ai loa ma le saunoaga autu o le aso, lea na saunoa i ai le Tina o le atunu’u, le faletua ia Cynthia Moliga, lea sa ia saunoa ai i le taua o le galulue fa’atasi o ta’ita’i o le atunu’u, nu’u, itumalo ma aiga, e saili se fofo o le fa’afitauli ua vaaia le fa’atupulaia i le taimi nei.

 

E 9 vaega eseese o le malo sa mafai ona maua le avanoa e fa’asoa ai a latou metotia i auala e foia ai le fa’afitauli o le faatupulaia lea o sauaga i totonu o aiga, ma le vaega e 10 i ai vaega na fa’alauiloa a latou ta’iala e foia ai lenei fa’afitauli, o le vaega o le Samoa Victim Support Group (SVSG) mai Samoa, lea na fai ai le faletua ia Mareta Savusa ma o latou sui.

 

Na taua e le fofoga o le polokalame, le faletua ia Dr. Celestine Faumuina-Nix e fa’apea, o le taua o lenei polokalame, o le a mafai ai ona tu’u fa’atasia ni auala eseese e fesoasoani ai i tagata o lo o a’afia i sau’aga i aiga, atoa ai ma le taumafai e fesoasoani ia i latou o lo o fa’atinoina sau’aga i totonu o aiga, ina ia mafai ona foia ma taofia lona fa’aauauina.

 

Na taua e ni isi o sui sa maua le avanoa e fa’asoa ai manatu ma lagona e fa’atatau i lenei polokalame, o le saoasaoa ua i ai le fa’atupulaia o sauaga i totonu o aiga i le taimi nei, e le gata o sauaga o lo o faia fa’asaga i Tina ma fanau, ae ua o o lava fo’i i tagata matutua ua a’afia ai fo’i i latou i nei auga, e le gata o sau’aga i le tino ae fa’apea fo’i ma upu malolosi e lafo ma fa’aaoga i taimi e tutupu ai fa’aletonu i totonu o aiga.

 

Na taua e le faletua ia Meala’i Laumoli mai le Ofisa o le DHSS e fa’apea, o le fa’amaumauga ua mafai ona latou mauaina i le taimi nei, o ni isi o Tina o lo o tele ina a’afia i sau’aga i totonu o aiga, “o Tina mai Upolu”, ma o lo o latou galulue pea lava ma i latou o lo o a’afia i sau’aga ina ia ave i ai fautuaga ma toe fa’amalosia i latou ina ia aua ne’i solomuli pe vaivai ai lo latou fa’amoemoe ona o fa’afitauli ua tutupu mai.

 

O ni isi o fa’amatalaga ma fa’amaumauga sa mafai ona fetufaa’i e sui sa maua le avanoa e saunoa ai i le taimi o le polokalame, sa fesoasoani malosi lea i le to’atele o le atunu’u na maua le avanoa e fa’atasi atu ai i le polokalame, ina ia mafai ai ona latou galulue e fa’asoa atu auala eseese e taofia ma fa’amuta ai loa le fa’aauauina pea lea o saunoaga i totonu o aiga.