Ads by Google Ads by Google

Popole Komiti e Fa’amaonia Foma’i i aveese le malosi o loo latou uuina


Sui o le Soifua Maloloina ma le Falema’i i le taimi na molimau ai i luma o le maota o sui i le taeao ananafi. [ata AF]

Le Peresetene o le Asosi o Tausima’i i Amerika Samoa ia Tofiga Tufele. [ata AF]
ausage@samoanews.com

Na taua e le Ta’ita’ifono o le Komiti e Fa’amaonia Foma’i e galulue i le falema’i i Fagaalu ma le Soifua Maloloina (Health Regulatory Board) ia Motusa T. Nua, o ia fo’i lea o le Fa’atonusili o le Matagaluega o le Soifua Maloloina, atoa ai ma le Foma’i Sili ia Dr. Iotamo Saleapaga, o ia fo’i o se totino o le Komiti i luma o le maota o sui i le taeao ananafi e fa’apea, la te lagolagoina le tulafono taufa’aofi lea ua taoto i luma o le maota o sui e fa’avae ai le Asosi a Tausima’i i Amerika Samoa, pau le popolega o loo i ai, ina ne’i avea le fa’avaeina o lea Asosi i lalo o le tulafono atoa ai ma le tofiaina o lana Komiti Fa’afoe, ma auala e aveese mai ai le malosi o loo umia e le Komiti o loo latou galulue ai e fa’amaonia ai foma’i ma tausima’i i le atunu’u.

 

O le iloiloga  lea sa valaauina e le Komiti o le Soifua Maloloina ma le LBJ a le maota o sui ananafi, i lalo o le taitaiga a le afioga i le ta’ita’ifono ia Vesi Talalelei Fautanu Jr, na mafua mai ina ua talosagaina e ni isi o faipule le toe taofi o le tulafono mai lona pasiaina i le faitauga fa’alua i le aso Lulu na te’a nei, ae se’i fesiligia sui o le Komiti e Fa’amaonia Laisene o Foma’i e galulue i le atunu’u atoa ai ma se manatu mai le pulega a le LBJ, e tusa ai o le tulafono lea ua fa’aulufale e fa’avae ai se Asosi o Tausima’i i Amerika Samoa.

 

Na fa’amanino e Tofiga Tufele, peresetene o le Asosi o Tausima’i i Amerika Samoa, i iloiloga e lua ua mae’a ona fa’ataunuuina ma le maota o sui, na pau le galuega a le Komiti Fa’afoe a Tausima’i e pei ona taua i totonu o le tulafono, latou te fa’amaonia laisene o Tausima’i, ae le mafai e le Komiti ona fa’a faigaluega ni Foma’i. Sa ia taua atili fo’i e fa’apea, e le fa’aleaogaina e le Komiti Fa’afoe a Tausima’i le malosi o loo umia e le Komiti e Fa’amaonia Foma’i ua tele tausaga o i ai.

 

Na fa’amalamalama e Dr. Saleapaga i luma o le maota o sui e fa’apea, e tatau i le komiti a le maota o sui ona silasila toto’a i le malosi o loo umia e le Komiti e Fa’amaonia Foma’i i le atunu’u, ina ne’i fete’ena’i ma le Komiti Fa’afoe a Tausima’i pe afai ae pasia le tulafono.

 

“Afai o le tulaga lea e tatau ona i ai, e tatau ona fa’amuamua se gaioiga e fa’aulu ai se tulafono e fa’aleaoga ai le malosi o loo umia e le Komiti e Fa’amaonia Foma’i, ona fa’atoa mafai ai loa lea ona fa’aauau le tulafono lenei, aua e foliga mai i le agaga o le tulafono lenei, o le a aveese ai le malosi o loo i le Komiti tuai o loo matou galulue ai e fa’a faigaluega ai foma’i”, o le saunoaga lea a Dr. Saleapaga.

 

Sa ia taua atili fo’i e fa’apea, afai o le a tu’u atu le malosi i le Komiti Fa’afoe a Tausima’i latou te faatinoina ai galuega e pei ona taua, e tatau fo’i la ona tu’u atu le malosi i isi fo’i vaega o le falema’i ma le soifua maloloina e fa’atulaga ai a latou Komiti Fa’afoe e fa’amaonia ai e latou laisene a latou foma’i.

 

“O le aano moni lava o le tulafono lenei ua taoto i luma o le Fono, e aveese ai le malosi o loo umia e le Komiti e Fa’amaonia Foma’i, e le toe i ai se malosi o latou e fa’amaonia ma fa’a faigaluega ai Tausima’i, ae tatau ona silafia e le maota, pau lea o le Komiti o loo fa’atulafono e mafai ona latou fa’a faigaluegaina Foma’i mai fafo”, o le isi lea saunoaga a Dr. Saleapaga.

 

Na taua e Motusa lona lagolagoina o le agaga o le tulafono e pei ona taoto nei i luma o le maota o sui, pau lona popolega, o lea ua fa’aopoopo i ai ma le manaoga ina ia fa’avae se Komiti Fa’afoe a Tausima’i, peita’i i lona talitonuga o loo i ai, e i ai le mafua’aga na ala ai ona fa’avae e tuaa i tausaga ua mavae le Komiti e Fa’amaonia ma Fa’afaigaluegaina Foma’i mai fafo.

 

“Afai o le agaga o le tulafono lenei e aveese mai ai le malosi mai le Komiti o loo matou galulue ai, ona tuu mai lea o se taimi se’i matou toe fetufaa’i ma Tausima’i e uiga i lenei tulafono e fa’amanino tulaga e pei ona atugalu i ai le Komiti, ona e i ai popolega afai e manuia le fa’amoemoe o Tausima’i, e ono tagi mai fo’i le vaega a Foma’i nifo ina ia fai fo’i sa latou Asosi ma se Komiti Fa’afoe, ae mo a’u lava ia, ou te lagolagoina le agaga o le tulafono”, o le saunoaga lea a Motusa.

 

Na toe fa’amanino e Tofiga e fa’apea, e to’atele naua i latou sa latou galulue ma fesoota’i e uiga i lenei tulafono e aofia ai ma Sui o le Komiti e Fa’amaonia Foma’i, sa latou galulue fo’i ma ni isi o loia matutua i le atunu’u, ma ua tuuina mai la latou fa’amanuiaga ina ia manuia la latou taumafaiga, aua o lenei tulafono, e fesoasoani ai i le fa’aleleia atili o le tautua a Tausima’i i le atunu’u.

 

O le a taoto atu lava i le komiti a le maota o sui mo sa latou fa’aiuga e tusa ai o lenei mataupu.