Ads by Google Ads by Google

Sauni malo tali atu talosaga apili a le NOAA fa’asaga fa’aiuga fa’amasinoga


Le Loia Sili a le malo ia Talauega Eleasalo Ale. [ata AF]
ausage@samoanews.com

Na taua e le afioga i le Loia Sili o le malo ia Talauega Eleasalo Ale le sauni o le malo e tali atu i se talosaga apili a le vaega o le Puipuiga o le Gataifale ma le Vaomatua a le feterale (NOAA), fa’asaga i le fa’aiuga a le Fa’amasinoga Feterale lea na tu’uina mai i le vaiaso ua te’a e lagolagoina ai le tagi a Amerika Samoa ina ia taofia suiga ua faia e le NOAA i ogasami fagota (LVPA) a le teritori.

 

Ina ua maua le avanoa o le Loia Sili e fa’amalamalama ai i luma o le Kapeneta le tulaga atoa e uiga i lenei mataupu, sa ia taua ai le taua tele o le faaiuga ua mae’a ona tuuina mai e le fa’amasinoga feterale, atoa ai ma le aofia ai o le vaega o le Feagaiga sa osia i le va o Tutuila ma Aunu’u fa’apea ai le Iunaite Setete i le 1900, lea ua atagia mai ai le i ai o le aia o Amerika Samoa e fesiligia ai fa’aiuga e faia e le malo tele e a’afia ai le soifua manuia o tagatanu’u o le teritori.

 

E pei ona manino i le saunoaga a Talauega, na oo lava i loia sa galulue mo Amerika Samoa i lenei mataupu i Uosigitone, faatasi ai ma lana aufaigaluega, sa latou fautuaina malosi o ia ina ia taofi le tagi i le ulua’i taimi na fuafua mai ai, ona e i ai lo latou talitonuga e tele le avanoa e le mafai ai e Amerika Samoa ona faila se tagi fa’asaga i le malo tele o Amerika.

 

“E ui i le finau mai o la’u aufaigaluega fa’apea ai ma loia mai Uosigitone e taofi le tu’uina atu o le tagi, ae sa fautuaina malosi a’u e le ali’i kovana ia Lolo ina ia fa’aulu le tagi ma saili le auala e finauina ai lenei mataupu i luma o le fa’amasinoga, lea ua i’u ina manumalo ai Amerika Samoa, ma taofia ai loa e le fa’amasinoga feterale suiga sa fuafua le NOAA e faia i o tatou ogasami”, o le saunoaga lea a Talauega.

 

O ali’i loia e to’alua mai le Ofisa o le Loia Sili na taua e Talauega na galulue malosi i le sailiina o fa’amatalaga atoa ai ma fa’amaumauga e fesoasoani malosi ai i le tagi sa tu’uina atu, o le susuga ia Alema Leota ma Tony Sunia, lea na fa’afetaia fa’apitoa e le loia sili le sao taua o nei alo o le atunu’u, i le taumafai e tu’u fa’atasi le talosaga sa tu’uina atu i le Ofisa Loia i Uosigitone sa tula’i mo Amerika Samoa i luma o le fa’amasinoga.

 

“O se ulua’i taimi lenei ua mafai ai ona fa’aleo mai e se fa’amasinoga feterale a le malo tele le i ai o le aia o tagatanu’u o Amerika Samoa, i lalo o le Feagaiga sa osia ma le Iunaite Setete, e finauina ai mataupu fa’apenei, lona uiga i lo’u talitonuga, e le mafai e le malo tele o Amerika ona latou faia se faaiuga e soli ai tuutuuga uma o le Feagaiga a Amerika Samoa ma i latou.”

 

Sa ia taua atili le taumafai o lona ofisa e ao solo mai o mataupu mai isi atunu’u e pei o le Feagaiga sa sainia i le va o tagata Maori ma Niu Sila i le “Treaty of Waitangi”, atoa ai ma le mataupu i le va o tagata Initia Amerika, e tau fesoasoani ai i le latou talosaga sa tu’uina atu.

 

Na fa’afetaia e Lolo i luma o le Kapeneta le galuega fita sa fa’atinoina e Talauega ma lona Ofisa, lea ua mafua ai ona manuia le tagi sa tu’uina atu i le Fa’amasinoga. Saunoa le ali’i kovana e fa’apea, ua aoga le talosaga sa tuuina atu atoa ai ma le faaiuga ua tuuina mai e le fa’amasinoga ua manino mai ai, o loo i ai lava le avanoa o Amerika Samoa e finauina ai faaiuga o loo tuuina mai e le malo feterale o loo aafia ai soifua o tagata lautele.

 

I le fa’aiuga o le talanoaina o lenei mataupu, sa tu’uina atu ai e le afioga i le Maoputasi ia Mauga Tasi Asuega, o ia fo’i lea o le Failautusi o le Ofisa o Mataupu Tau Samoa sana fautuaga i le Loia Sili, ina ia aua nei fefe e finau i mea lelei mo le manuia o Tutuila ma Manu’a.

 

Saunoa Mauga e fa’apea, tusa lava poo le a le faigata o mataupu faapenei, ua uma ona fa’ataoto e le Atua lana polokalame e fa’aaogaina ai tama fanau a le atunu’u, e fai ma sui o le atunu’u i luma o le malo tele o Amerika.