SAVE: Tele se suiga ua i ai pagota o loo taofia i le toese
Na logo itu e fa o le lotoa o le toese i Tafuna i le feei ma le alalaga fiafia o ali’i pagota, ao fa’aleo e le afioga i le ali’i Komesina o Leoleo ia Save Liuato Tuitele i le Kovana ma sui o le malo na fa’atasi atu i le asiasiga i le vaiaso nei, le tele o suiga ua molimauina i olaga o ali’i ma pagota o loo taofia i totonu o le nofoaga.
O ni isi o ia suiga e aofia ai le to’atele o pagota ua amata ona fo’i atu i tua ma fa’aaoga taleni eseese sa mafai ona latou a’oa’oina mai totonu o le falepuipui, o isi fo’i ua vaaia suiga i o latou olaga, ua vaaia fo’i le fiafia o pagota e galulue fa’atasi ma isi pagota i totonu o le falepuipui.
“Tele naua suiga ua vaaia i totonu o lenei nofoaga i olaga o ni isi o fanau, o le ali’i o lo’u aiga lea na magalo i tua i le amataga o le tausaga lenei, ua fa’amoemoe e a’e i le Aoga Fa’a Faifeau i Kanana Fou i le tausaga fou”, o le saunoaga lea a Save na fa’alogoina ai le tau fai pati o tagata na auai i le asiasiga masani a le kovana ma le faigamalo, lea e asia ai le nofoaga o le toese i taimi fa’ai’u o le tausaga.
“E ui e na o le pilikaki ma le moa o loo tausi ai pagota, ae o meaai ia ua fa’aaoga e le Atua e aumai ai le malosi i o latou tino ma le mafaufau, ina ia mafai ai ona maua le malosi e tuli ai fa’asalaga ma maua ai fo’i le malosi e mafaufau ai i isi mea lelei mo le lumana’i”.
E ese mai i suiga ua molimauina i olaga o ni isi o pagota, o loo fa’aauau pea isi fa’agaioiga i totonu o le toese e fa’aaoga i ai taleni ma agava’a o pagota e pei o le ta’aloga Volipolo atoa ai ma le a’oina o siva fa’aleaganu’u.
Na taua e Save e fa’apea, ua uma ona taoto sana fautuaga i le pulega o le toese i Tafuna aemaise lava i ali’i pagota, ina ia amata ona tapena ni a latou au volipolo e koleni ma fa’amasani, e tau fuafua ai se au volipolo a pagota e lesitala i le liki volipolo i le tausaga fou.
I le tulaga o le matagofie o ausiva a ali’i pagota, sa ia taua ai fo’i le i ai o se fuafuaga e tau saili ni fale talimalo e fa’afiafia ai ausiva a pagota, ina ia mafai ai ona fa’aaoga le tomai ma le taleni ua latou maua.
“O fuafuaga uma nei e mafai lava ona fa’ataunu’u pe afai e talafeagai ma polokalame fa’ataoto a le matagaluega”, o le saunoaga lea a Save na fa’alogoina ai le tau fai feei i luga o pagota e fa’ailoa mai ai lo latou agaga fiafia.
“Fa’afetai tau fo’i i lau afioga i le ali’i kovana ma le faigamalo ona o lo outou amanaiaina o lenei nofoaga i tausaga e 4 ua mavae atu, e ui i le tele o lo outou tuatuagia i feau ma tiute, ae ua outou manatu mai lava i alo ma fanau a le atunu’u o loo taofia i lenei nofoaga”.
Na fa’afetaia atili e Save le afioga i le ali’i kovana i le tele o atina’e ma suiga lelei ua faia e le malo mo le Ofisa o Leoleo aemaise ai le nofoaga i le toese, lea ua molimauina ai le siitia i luga o le tulaga o le toese i le taimi nei.
O taimi o fa’afiafiaga a ali’i pagota, sa latou fa’atinoina ai siva faaleagaga e momoli mai ai le agaga o le kerisimasi i le malo ma ona ta’ita’i sa auai i le asiasiga.
Na fa’alogoina i ni isi o taimi o tala fa’aevagalia a pagota lo latou alalaga ma fa’afetaia le ali’i kovana e tusa ai o lona amanaiaina o le nofoaga i le toese.
“Lolo ma Lemanu, fa’afetai i lo oulua amanaiaina o i latou o tagata agasala, e pei o la Iesu, e pei ona e faia i se tasi aupito itiiti o o’u uso nei, o Ia lava lena ua outou faia i ai”, o le alaga lea a le ali’i o Maeli Pitoitua poo Isumu fo’i e pei ona iloa ai o ia e le to’atele, lea sa taitaia le isi ausiva a pagota i le taimi o le latou polokalame.
O le mae’a ai o le polokalame, na molimauina ai le aga’i ane o ni isi o pagota ma feiloa’i i ta’ita’i o le malo ma faia a latou pu’ega ata.