Ads by Google Ads by Google

Solofua moliaga fa’asaga ia Mamona Unasa

ausage@samoanews.com

Ua solofua nei e le Fa’amasinoga Maualuga moliaga mamafa e 4 na tu’uaia ai e le malo ia le Tama matua ia Mamona Unasa, ina ua le mafai e le itu a le malo ona latou fa’amaonia tu’uaiga fa’asaga ia te ia e aunoa ma se masalosaloga tatau.

 

O moliaga mamafa na tu’uaia ai e le malo ia Unasa e aofia ai lona faia o uiga mataga fa’asotoma, faia o gaioiga mataga fa’afeusuaiga, atoa ai ma moliaga e lua o lona tagofia lea o itutinosa o se teineititi e laititi i lalo o le tulafono.

 

O ia tu’uaiga e pei ona taua e le malo i le pepa o tagi sa latou fa’aulu i le fa’amasinoga, na afua mai i ni fa’alavelave se lua sa tutupu i le fale o le aiga o le teineiteiti i Fogagogo, i le masina o Tesema 2015 ma Fepuari 2016, a o nofo ai le ua molia i le aiga o le teineititi na a’afia ma lona Tina, a o avea ai o ia ma paaga a le Tina o le teineititi.

 

O le mae’a ai o le molimau fa’atauto a le teineititi na a’afia, na toe talosagaina ai loa e le itu a le malo le fa’amasinoga maualuga ina ia solofua le tagi sa latou fa’aulu fa’asaga ia Unasa, lea fo’i na talia e afioga i ali’i fa’amasino.

 

Ina ua fesiligia e le loia a le malo ia Jerard Murphy le teineititi o lo o tu’uaia na a’afia pe tago atu le ua molia i lona itutinosa, na tali le teineititi e le i tago atu leai se taimi na tago atu ai le ua molia i lona itutinosa.

 

O lea molimau mai le teineititi na a’afia ua le mafai ai ona fa’amaonia tu’uaiga ua faia e le malo fa’asaga ia Unasa, i lona tagofia lea o itutinosa o le teineititi, atoa ai ma lona faia o uiga mataga fa’afeusuaiga mataga aemaise ai o amioga fa’asotoma.

 

I le ulua’i folasaga a le itu a le malo e fa’ataoto ai le alafua o le tagi fa’asaga ia Unasa, na finau malosi ai le ali’i loia ia Murphy i ali’i ma tama’ita’i iloiloga e fa’amanino le matuia o gaioiga sa faia e le ua molia, e aofia ai lona tagofia lea o itutinosa o le teineititi na a’afia.

 

O le masina o Aperila 2016 na faila ai e le malo le latou tagi fa’asaga ia Unasa, ma amata taofia mai ai loa o ia i le toese i Tafuna seia o o mai lava i le aso ananafi na toe tatala ai i tua ua sa’oloto, ina ua le mafai ona ia totogiina le tupe e $30,000 sa fa’atulaga e tatala ai o ia i tua.

 

Na molimauina e le Samoa News le umi o se taimi o talanoa Unasa ma lana loia i le ulua’i taeao na amata ai le iloiloga autu o lana mataupu, lea sa ia fa’amatalaina ai tulaga uma e uiga i le mea sa tupu, aemaise ai o lona teena o lona faia o ni uiga mataga i le teineititi na a’afia.

 

O le afioga i le ali’i fa’amasino sili ia Michael Kruse na iloiloina lenei mataupu, fa’atasi ai ma le lagolagosua a afioga i ali’i Fa’amasino Lagolago ia Mamea Sala Jr ma Fa’amausili Pomele.