Ads by Google Ads by Google

Ta’ita’i atunu’u: Fa’atumau auala filifilia ai maota maualuga


[ata: archive]
ausage@samoanews.com

O se tasi o mataupu taua na mafai ona fa’asoa i ai e ni isi o Ta’ita’i o le atunu’u, o latou lagona i le aso mulimuli o galuega fa’atino a le Fono Faitulafono i le vaiaso na te’a nei, o le fa’atumauina lea o le auala fa’aleaganu’u o lo o filifilia ai sui o le maota maualuga.

 

O le tautalagia soo e le to’atele o lenei mataupu i lenei vaitau, e pei ona fesiligia ai sui tauva mo le tofi kovana ma le lutena kovana, aemaise ai o lea fo’i na aofia i le saunoaga a le ali’i kovana ia Lolo Matalasi Moliga i le taimi na tatala aloaia ai le Fale Samoa a le Fono Faitulafono, na manatu ai loa le Samoa News se’i fesiligia finagalo fa’aalia o ni isi o afioga i Ta’ita’i o le atunu’ e fa’atatau i lenei mataupu.

 

Na taua e le afioga i le ali’i Senatoa ia Tuiasina S. Esera e fa’apea, e le mafai ona tu’u eseeese tulaga tau faigamalo ma le aganu’u a Samoa, aua o le aganu’u e mamalu ai le faigamalo i soo se taimi.

 

Ina ua fesiligia e le Samoa News o ia i sona finagalo e fa’atatau i le palota lea o sui o le maota maualuga, na saunoa le afioga i le Sa’o e fa’apea, e tumau lava lona lagolagoina o le tulaga o lo o filifilia ai sui o le maota maualuga i le taimi nei, aua o iina o lo o taoto ai le mamalu ma le maulauga o le maota o le Senate, pe afai e fa’aauau pea ona filifilia afioga i Senatoa i tu ma auala fa’aleaganu’u.

 

“E pei ona taua e le ali’i kovana i lana saunoaga i lenei aso, e tatau ona malamalama lelei tupulaga talavou i le taua ma le aoga o le aganu’u i soo se taimi, aua o iina e iloa ai le aano o tu ma agaifanua a Samoa, o lana aganu’u, o le mamalu fo’i lena o le tulaga o lo o i ai le tofiaina o le maota maualuga, o lea o lo o tofia i auala fa’aleagan’uu”, o le saunoaga lea a Tuiasina.

 

Na taua e le ali’i kovana ia Lolo Matalasi Moliga i lana saunoaga a o fa’afofoga le to’atele o ta’ita’i o le atunu’u e aofia ai le Fono Faitulafono e faapea, e tumau pea lava le lagolagoina e le faigamalo o lo o i ai nei o le Fa’avae sa asa mai e Tuaa ua fai i lagi le tuligasi’a, e ala i le tofia lea o sui o le maota maualuga i ala o le aganu’u a Samoa.

 

Sa ia taua e fa’apea, tusa lava poo a foliga o Samoa ua manatu ni isi e fa’atusatusa i ai, pe le matagofie i le vaai tulaga i lona atina’e, e tumau lava lona talitonuga, o Amerika Samoa ma ona laufanua, o le tofi lea o tagatanu’u uma o Tutuila ma Manu’a, e le tatau fo’i la ona faatauagavale i ai se tasi.

 

Sa ia fa’atauaina fo’i suiga ua i ai manatu o tupulaga talavou i ona aso nei, i le fefiloi lea ma poto salalau ua televave tele mai, ae afai lava o le tama ma le teine Samoa o lo o malosi ai le toto Samoa, tusa lava poo a suiga o le olaga e alia’e mai, e tumau pea le lagolago a tupulaga talavou i le fa’atauaina lea o le aganu’u.

 

Na taua e le afioga i le Tama’ita’i o le Ao le taua tele o le puipuia e le aganu’u o tulaga fa’avaomalo i le atunu’u, aua o iina o loo atagia mai ai le mamalu atoa ai ma le malosi o le faigamalo, ona o le malosi o le sao a le aganu’u o lo o fa’atinoina.

 

Sa ia saunoa fo’i i le taua o le tulaga maualuga ua i ai a’oa’oga fa’aonaponei, lea ua mafua ai ona to’atele tama fanau a le atunu’u ua fa’amanuiaina i fa’ailoga mo matata eseese, e mafua mai i le maualuga o le tulaga ua mafai ona latou ausia i aoaoga o le poto salalau, peita’i afai e misi ma le aganu’u, lona uiga ua leai se aoga o lo latou lumana’i, aua o le aganu’u a Samoa e atagia mai ai le ituaiga tagata e i ai tatou.

 

O ni isi o afioga i senatoa sa mafai ona fesiligia e le Samoa News i lenei mataupu, e aofia ai le afioga ia Alo Fa’auuga, Gaea P. Failautusi, ma le afioga ia Mata’utia Misi, o ni isi nei o Tama o le atunu’u e seasea maua le avanoa e fa’aleo ai ni o latou lagona i mataupu eseese o lo o talanoaina e le Fono i le tele o taimi.

 

Na taua e le afioga i le alii senatoa ia Mata’utia lona lagolagoina o le tulaga o lo o i ai le filifilia o sui o le maota maualuga i le taimi nei, o le filifilia mai lea fa’aleaganu’u.

 

“E le mafai ona tatou tu’u eseeseina le aganu’u ma le faigamalo, po o le aganu’u fo’i ma le fa’akerisiano, o vaega uma nei e o fa’atasi mo le manuia o Samoa, e mamalu le fa’akerisiano i le aganu’u, e mamalu fo’i le faigamalo ona o le aganu’u, lona uiga, e taua le aganu’u ma lona sao i le faigamalo a Amerika Samoa”, o le saunoaga lea a le ali’i senatoa.

 

E talitonu fo’i Mata’utia, o le aiga lava le potu malosi e mafai ai ona a’oa’oina tupulaga talavou i le taua o le aganu’u, aemaise ai o le fa’amalamalama e matua i a latou fanau matafaioi tauave a le aganu’u i le manuia o le faigamalo.

 

Ae na taua e le afioga i le ali’i senatoa ia Gaea e fa’apea, e mafua ona i ai le matai i totonu o le aiga, ona o lo o puipuia lena aiga e le aganu’u a Samoa, e fa’apena fo’i i totonu o nu’u, itumalo ma le atunu’u atoa, e le mafai la ona alu to’atasi na o le faigamalo pe afai e le ola lauusiusi tu ma agaifanua a Samoa.