Ads by Google Ads by Google

Tala I Vaifanua


[ata: SN]

FA'AAOGA SIM CARD BLUE SKY AMERIKA SAMOA I SAMOA

 

I le taimi nei, ua ta'utino mai e le Bluesky i Amerika Samoa nei, o lo ua mafai nei ona e fa'aaogaina lau simcard na fa'atau mai ma lau telefoni i Amerika Samoa i Samoa fo'i. O le isi lea matati'a fou ua ausia e le Blusky iinei, ma ua avea ma se mea fo'i e tatau ona lau silafia e le mamalu o le atunu'u aua, o lo'o to'atele i latou e malaga i Samoa.

 

O le aso Gafua na tatala aloa'ia ai lenei matati'a fou i le tautua a le Bluesky.

 

"Ioe o lea ua agava'a nei le Bluesky e fa'alauiloa lenei matati'a matagofie ua mae'a ausia, ma o se fesoasoani tele fo'i i o tatou tagata femalaga'i, aua e totogia lava iinei lana pili telefoni fe'avea'i, ona malaga lea, ae fa'aaoga mai lana telefoni i Samoa,” o se tali le a le Bluesky, ma o lea e fa'aigoaina o le "Prepaid Roaming" po'o le "Fealua'i Mae'a Totogi!"

 

E na'o le 22sene i le minute pe afai e vala'au mai lau telefoni Bluesky i le telefoni bluesky iinei, po'o lau telefoni bluesky mai Samoa i le telefoni fale a le tou aiga. Peita'i e si'i teisi le totogi pe afai e te vili mai lau Bluesky i le telefoni ASTCA iinei.

 

Pe afai e fia maua uma totogi mo lou silafia, ae maise o fa'amatalaga uma lava i lou o'o atu i Samoa ma suia loa lau telefoni i le "Fealua'i Mae'a Totogi" e mafai ona e muamua taga'i ane i le Upega Tafa'ilagi a le Kamupani Telefoni a le Bluesky - bluesky.as, kiliki i le "Mobile," kiliki lea i le "Menu" ma kiliki sa'o loa i le "Prepaid Roaming!".

 

Ma e te alu fo'i i le Upega Tafailagi online.blueskypacificgroup.com ma fa'aulu ai le tupe i lau telefoni.

 

Pe afai e te le fia fa'aaogaina lea fo'i auaunaga pe afai e te alu ma ave lau telefoni Bluesky i Samoa, e tatau ona e tago e ki i le OFF lau Roaming  luga o lau telefoni, ae fa'aaoga lava pei ona masani ai le auaunaga i Samoa pe afai e sili lea ia te oe.

 

O lenei suiga, ua le toe tau suia ai se isi SIM card e fa'atau i Samoa i totonu o lau telefoni, ma e na'o se suiga lava o lau telefoni ona fa'aaoga lava lea o lau numera e pei  ona manatua e tagata uma, ma e talanoa mai i ai, e foliga mai e te le o tafao i Samoa.

 

Afai fo'i e fa'atumu lau telefoni i le seleni fa'atele lau echarge ina ia lava mo le umi o le a e tu'ua ai le tatou malo.

 

AMATALIA TAITOLU MALAGA HAWAIIAN AIR I LE VAIASO

 

O le vaiaso lona lua lenei ua mafai ai ona ta'itolu malaga a le Hawaiian Airlines i le vaiaso e tasi ma ua fa'aopoopo mai le malaga i le afiafi o le aso Lulu e tulaueleele mai ai ma toe taliu atu i Honolulu.

 

E mafua ona faia lenei suiga i tausaga ta'itasi i ona vaitaimi pisi o le tausaga ona e to'atele ai i latou e femalaga'i i le vaitau lenei o le Kerisimasi ma le Tausaga Fou.

 

Ua mautinoa lava ua tutumu uma malaga a le Hawaiian Air i aso Lulu nei, Tesema 27, 2017 ma Ianuari 3, 2018. O lona uiga, afai e le toe tumu le va'alele o le isi aso Lulu e soso'o mai Ianuari 11, 2018, ailoga la e taunu'u lea malaga.

 

O le taimi masani lava e pei o isi malaga a le Hawaiian Air e tulaueleele mai ai le va'alele ma toe tuuva'a ese atu ai i lea lava afiafi. Peita'i, e ao lava ina matauina, e vave lava ona siakia atopa'u ma fa'amomoli a'o le'i taitai ona po le aso o nei malaga, mo pasese uma e siakia ai latou pauna.

 

MANAOMIA SAMOA NOFOAGA KOLENIA TAMA TINEIAFI

 

Mai le fonotaga a Samoa na Lua sa faia i le masina nei, sa fa'alauiloa ai e le tama'ita'i Fa'atonu sili o Uafu ma Malaeva'alele Taimalelagi Claire Salafai Tuia Poumele ua ma’ea fa'atuina i Amerika Samoa se nofoaga fa'apitoa e koleni fa'apitoa ai le au tinei afi a malaeva'alele i tomai ma agava'a i lona fa'aaogaina mo fa’alavelave e afaina ai vaalele.

 

Na talosaga Samoa ua latou fia asia lea nofoaga. Fa'ailoa e Taimalelagi, "O se fiafiaga le mafai ona fefa'asoa'i ma Samoa e ala i le tomai o le galuega, ae o le nofoaga latou, o lo'o ua mae'a fa'atuina, e mafai lava ona so'ofa'atasi ai ma isi atumotu o le pasefika i lea itu. O se fiafiaga le maua o avanoa fa'apenei, e mafai ona fa'asoa ai i mea ua gafatia e tatou Malo fa'ateritori ma atumotu, aua e le tofusia ma ni alamanuia tetele e fa'atupe ai nofoaga fa'apenei."

 

O le tau o le nofoaga e $15miliona sa fa'atupe e le FAA lea e vaaia malae va’alele a Amerika.

 

O le susuga Magele Hoe Viali, le COE o le Samoa Airport Authority, lea sa ia talia ma le fiafia lenei vala'aulia ma o lea ua toe vala'au mai mo le fa'amaoniga o le taimi tonu e to'ai taunu'u mai ai le latou asiasiga o le nofoaga fa'apitoa lea, ma maimoaina fo'i se fa'aaliga o lea galuega fa'atino e fa'aaogaina ai le tomai ma auupega ua mua'i pasia mai e le FAA.

 

E le’i mautu le aso e asiasi mai ai Samoa mo lea fa’amoemoe.

 

12 AUFAIPESE PO LONA TOLU O PESEGA KERISIMASI

 

O le afiafi lona tolu o Pesega o le Kerisimasi a le malo na i le Fale Laumei i Utulei, na tapena i ai aufaipese to'a 12 na fa'aalia i lea afiafi.

 

E afua mai le matagofie o pesega ae tomua mai lava le lalelei o toniga ma teuga eseese ua fa'aalia e aufaipese ta'itasi ina ia fa'afiafiaina i latou uma sa maimoaina latou sao mo lenei tasuaga i le fa'amanatuina o le Kerisimasi.

 

O le aufaipese a Mapusaga Fou 3rd Ward na tatala ai pesega o le afiafi soso'o lea ma le aufaipese a Amanave CCCAS, ae lona tolu ai le aufaipese Metotisi mai Pavaiai. Soso’o ai Alao Catholic Choir,  Masefau CCAS, Ma'ama'a CCCAS i Tafuna ma le Malaeloa Metotisi lea sa matua iloga ona fa'afiafiaina le to'atele e maimoaina aua e faia taga o latou pese sa usuina, ma atili ai ona ola le fa'aaliga i lea afiafi.

 

O Leone Metotisi na soso'o ai, fa’apea ma Vaitogi CCCAS na matua lanumeamata ai ma le mumu le Fale Laumei i Utulei, aua e to'atele na'ua le autalavou lea. Atuu CCCAS na tula'i ai Danielle Mose e taimi lo latou sao ma na iloga le matagofie o a latou pesega sa usuina, matagofie fo'i a latou sei mumu ma le la'ei pa'epa'e e fa'ailo ai le sinasina o le lagi lea tatou e aga atu i ai.

 

Fiangalo Pa'ia o Iesu mai le Fatuoaiga sa soso'o ai ma sa saunia e i latou vi'iga matagofie ma faia fo'i latou skids mulimuli lea sa matua mata tioata uma ai i latou. Ae tomuli loa lea afiafi i le pesega a le Aua Catholic Choir.