Ads by Google Ads by Google

Tala i Vaifanua

Ua fa’alauiloa le amataga o le Liki Basketball a le Asosi o lea ta’aloga aua fo’i le fa’amanatuina o le Fu’a 2017.

 

O ta’aloga a le Vaega o Tama matutua ua fa’atulaga e faia i le Faleta’alo o Tupulaga i Pago Pago, ma e amatalia ta’aloga muamua i le aso, Fepuari 28, 2017.

 

O le fa’asologa o nei ta’aloga e amata le ta’aloga muamua i le itula e 5:30pm ae soso’o ma le ta’aloga lona lua i le itula e 7:00 i le afiai lava.

 

Na tatalaina le liki i ta’aloga a le fanau talavou 18 tausaga ma tama’ita’i, ae amatalia i lenei vaiaso tatala le Liki a Tama Matutua.

 

“O le taumafai lava ina ia mautu muamua nofoaga e fa’atautaia ai ta’aloga o le Liki, ma ia fa’amauina nei mea, e ese mai fo’i i liki a le fanau talavou, lea e fa’amoemoe e mautu ai nisi e fiafia i lea fa’agatama aua se taumafaiga mo se tatou ‘au fa’avaomalo i le lumana’i,” o se tala lea sa faailoa mai e se tasi o le laulauatofi a le Asosi Basketball a Amerika Samoa.

 

O liki a fanau talavou tama e i lalo o le 13 tausaga le matutua, na amatalia i le aso 25 Fepuari, 2017 ma sa faia lea i le Fale Ta’alo Paulo 11 i Malaeloa. Fa’apena fo’i ma le Fanau Talavou e 18 ma lalo ane tausaga le matutua. E ese mai lea sa faia le liki a tama’ita’i fa’atasi ai ma le vaega ova le mamafa o Pauna ua fa’aigoaina  o le Liki a le Heavyweights.

 

O le a maua atu se fa’ai’uga matagofie mai ta’aloga o le amatalia o lea liki i se tala mulimuli, ae o le a fa’alauiloa fa’atasi atu ma le fa’ai’uga o fetauiga tatala malae a le ATR fetaui ma le Kings i le Pool A a Tama Matutua i le itula e 5:30nanei, fa’apea ma le fetauiga a le Aua Men vs Air Ballers mo le Pool B i le ta’aloga mulimuli o le afiafi nei i le itula e 7:00.

 

Fa’aauau lava ta’aloga ua fa’atulaga i le Paulo ll ae fa’atautaia ta’aloga a tama matutua i Pago Pago i afiafi lautogia ta’itasi.

 

50 TAUSAGA A’OGA MAUALUGA FAGAITUA

 

Ua amatalia tapenaga o le fa’amoemoe o le vasega o Tama ma Teine Tuai sa a’oa’oina mai i tausaga e 49 talu ona fa’atuina le A’oga Maualuga i Fagaitua, mo le fa’amanatuina o le 50 tausaga o lenei aoga.

 

O le asosi o tama ma teine tuai ua tula’i mai ai Tuimavave Tauapa’i Laupola, o le Peresetene; Carol Ma’afala Baqui o le Sui Peresetene; Rodney Malauulu Fuimaono i le tofi Failautusi ma Jeanette Vasai i le tofi Teutupe.

 

O le ulua’i taumafaiga sa fa’atinoina i le afiafi o le aso Faraile i le Gov. Lee Auditorium ma sa fa’alauiloaina o le “Valentine Fundraiser” ma sa iloga ona fa’afiafiaina i latou uma sa auai.

 

I le fa’amoemoe lea sa auai le afioga le Lutena Kovana, Lemanu Peleti Mauga  ma avea o ia ma Sui Tautu Uaina mo le mamalu sa fa’ailoga o latou “Ao o Manamea” ma fa’aali ai lo latou alofa naunau i a latou pa’aga i lea afiafi matagofie.

 

“O lenei fa’amoemoe ua vave ona tapena i ai, aua e le faigofie fo’i le alo atu o le Vikings i le fa’amanatuga o le 50 tausaga o le Laumua sa utuvai i ai mo le atamai lautele, ua tuu fo’i i ai le fa’amuamua ina ia mafai ona fa’atino se polokalama o le a fa’ataoto i le fa’ai’uga o lenei tausaga, i se matou fonotaga o le a matua fa’asalalauina fa’alaua’itele, ina ia auai sui o vasega ta’itasi mo le 49 ai lenei o tausaga a’oga talu ona tutula’i le Laumua i Fagaitua,” o se tala aloa’ia lea a Tuimavave, o ia foi o le fa’atonusili o le Ofisa o Fa’asalalauga a le malo - KVZK-TV.

 

O lenei taimi e le’i mafai ona maua tonu se aofaiga o le seleni mama, aua e i ai pili mo lea fa’amoemoe e ao ina to’esea mai se tu’ufa’atasiga o le seleni na maua.

 

“O le vaitau ua fa’amoemoe le aoga maualuga i Fagaitua e fa’amanatu ai le latou 50 tausaga o Iulai 1-se’ia oo ia Iulai 5, 2018. Ia tuupoina lea aso ia manuil, ae o tapenaga lava latou e ao ina matua lava ma totoe,” o a Tuimavave lea.