16 KONEKARATE FAIFA’ATOAGA O LE S.L.P

E to’a sefulumaleono le aofai o sui ua fa’amanuiaina a latou talosaga e sapalaia le polokalama o meataumafa a le fanau a’oga, e ala i fua o latou fa’aeleeleaga i totonu lava o le tatou atunu’u. O lona uiga, e le mafai ona latou fa’atauina mai fafo ni fua o fa’ato’aga ma auina atu e fua mo le polokalama lenei, ae o mea’ai lava na toto ma selesele mai i a latou fa’ato’aga i Amerika Samoa.

O i latou nei ua lisia mai e aofia ai:

American Samoa Farmer’s Cooperative; Andrew Vaimili; Dick Koko; Fa’amumu E. Tangelo; Fiatele Avegalio; Helen Young; Jeanette Ting; Kolio Lea’e; Peleiupu Niko; Pine Lauoletolo; Pyo Hak Yoel; Sheila Tupua Sulu; Sosene Leau; Talaleu Asifoa; Tanya Ma’o Aab ma Xiabing Nie.

Ua mae’a paisa fo’i ma tau o le a totogi e le School Lunch Program mo ituaiga mea taumafa eseese ua faatagaina mo le Polokalama o Meaa’i a le Fanau A’oga.

Mo le Fa’i Pula e $2.60 i le pauna o le a fa’atau ai. O le Esi Pula ua fa’atauina i le $2.60 i le pauna. O le Fala Pula ua fa’atauina i le $2.50 i le pauna. O le Fa’i e le’i pula ua fa’atauina lea i le $2.25 i le pauna. Talo ua fa’atauina nei i le $2.25 i le pauna. Pateta Suamalie ua fa’atauina i le ta’i $2.15 i le pauna. Maukeni ua fa’atauina i le tau e $2.10 i le pauna. Kukama ua fa’atauina i le $2.15 i le pauna. Lakisi ua fa’atauina i le $4.50 i le pauna.

O le toatele o nei faifa’ato’aga ua lisia i luga, ua matele ina ta’i fa, lima pe ono fo’i ituaiga o fua o fa’aeleeleaga ua mafai ona latou sapalaia, ma ua lautogia fo’i i latou i ai, ua taua’aoina fo’i latou tusi e fa’amaonia ai lo latou agava’a e faatau atu i le polokama meaai a le fanau a’oga i ona aso ua fa’atulaga e fuaina ai pauna.

Peita’i, ua fa’atulaga fo’i se fonotaga taua lava e fa’atasi uma atu ai le vasega o faifa’ato’aga ina ia auai fa’atasi ma le komiti fa’afoe o lea tauofoga ma o matagaluega fo’i o lo’o sofia i lenei tauofoga o le a auai fautasi o tatou ta’ita’i i lea fonotaga i le taeao nei i le Potufono o le Matagaluega o Fa’ato’aga i Tafuna, itula e 9:00.

O le aoga fo’i o lea  fonotaga, aua o lo’o loma fo’i le isi tausaga atoa mo lenei lava tautua.

O le tapenaga fo’i o talosaga e taua’aoina mo le tauofoga, e mafai ona fa’afesiligia ai le aotelega o lenei fonotaga i ta’ita’i uma o le a aofia fa’atasi.

Ua fa’ailoa mai, o le a faateleina le lisi o mea taumafa e ao ina sapalaia e le aufaifa’ato’aga i le tatou atunuu i le tausaga fou.

TAPUNIA MALUMALU E.F.K.A.S I A’ASU?

To’atele le mamalu o le atunu’u ua fesiligia le tulaga e tapunia ai le malumalu o le Ekalesia Fa’apotopotoga Kerisiano i Amerika Samoa i Aasu ona sa autova’a atu i latou i le toe sauniga o le afioga le Tama a Aitu ma Tagata Lualemaga E. Faoa, ma latou iloa ai lea tulaga.

Ina ua fa’afesiligia le Pulega EFKAS i Kanana Fou, sa fa’ailoa mai, “Na tapunia aloaia lea malumalu i le tausaga ua te’a e le Ekalesia...ina ua fa’amaonia e i ai ni mea sa solituina e le Fa’afeagaiga sa galulue ai i lea Ekalesia. Ona ua o’o fo’i lea mataupu i le fa’amasinoga, o lea ua tapunia ae se’i tatalia pea se i’uga patino mai le fa’amasinoga maualuga.”

Ua le mafai ona faalauailoa atili mea ua faamaonia ua solituina. Ina ua fesiligia nai tagata sa tautua i lea fo’i tovine, ona e tau lava ona va’ai toto’a fo’i i le agaga tapua’i o i tatou, pe a tua i fea, ae fa’ailoa mai, “O nisi o lo’o mulimulita’i pea i le Fa’afeagaiga ma le aiga, ma o lo’o fa’atautaia a latou sauniga masani ae le mailloa e le Laumua po’o fea.”

Peita’i o nisi fo’i ua o ane i malumalu tulata ane i Aoloau ma nisi lava ekalesia o le EFKAS e lolotu ai i lenei vaitaimi, se’ia tatalia faiva o tama a le malo. Mo le toe sauniga o le afioga Lualemaga, sa toe tatala ma tapena lenei malumalu mo lea fa’amoemoe, ae ina ua mae’a, sa toe tapunia le malumalu, ma toe loka lona pa.

E le o mautinoa tonu pe o afea o le a toe tatala ai lea malumalu.