130 FAIFE’AU TOEAIINA & TIAKONO TOEAIINA MAI MALU I LE EFKAS

O se aumalaga e to’a 130 o Toeaiina, Faife’au ma Tiakono, ina ia latou fa’amautu atili Mataupu Silisili o lo’o a’oa’oina fa’apitoa ai Faife’au o le Ekalesia Fa’apotopotoga Kerisiano i Amerika Samoa ma Samoa fo’i, ina ia autasi, ae maise fo’i o nisi tulaga uma e ao ina fa’aleleia atili i le auaunaga i le Atua ma lona finagalo i le aotelega o le Ekalesia.

O lo’o talimalo le EFKAS i lona laumua i Kanana Fou.  O fuafuaga uma mo le fa’afeiloa’iga e amata lelei i le aso, ona fa’aauau ai lea o le fonotaga i le aso Toona’i, ae mae’a loa na tala lea i tua o sui usufono ina a tofusia ai malumalu EFKAS uma i totonu o Tutuila mo le felauga’iga.

“O le aso Sa o lenei vaiaso, o lo’o fa’atulaga mo felauga’iga i totonu o le ekalesia atoa iinei, lea ua finagalo ai le fa’auluuluga o le Ekalesia iinei, e sili ai ona tu’u avanoa lea tulaga i vasega o sui masi’i mai mo lenei fa’amoemoe, ina ia utuvai fo’i ekalesia ta’itasi i ni fe’au lelei ma ni fa’aoso o le Upu ua latou malaga mai ma i latou  i lenei tausaga,” o se tala lea mai ma sui o le Ofisa o le EFKAS i Kanana Fou.

O lea fonotaga o le a soso’o atu lava ma le aso Toona’i o faia pea, ae a oo loa i le afiafi ona tapena loa lea o sui usufono mo le felauga’iga i le Aso Sa.

E malolo lelei i latou uma i le taeao o le aso Gafua, ae o’o loa i le afiafi, ona fa’ato’a alofaiva loa lea o le Ekalesia atoa i le fa’amavaega aloa’ia ma i latou uma. O aiava ua lafo nei i Ekalesia taitasi i a latou Faife’au o lauga atu mo i latou e fa’atino ai.

I lenei aumalaga, ua le na’o Faife’au Toeaiina ma Tiakono Toeaiina o Samoa o lo’o malaga mai ai, ae o lo’o aofia ai ma Toeaiina mai Niu Sila ma Ausetalia.

Ua le mafai ona oo lea avanoa lelei i Ekalesia o lo’o so’o ai afio’aga taitasi o le Manu’atele, ma ua fa’ailoa mai, “Ona ua tapena atu i matou, ae faaletonu pea tulaga o femalegaiga i le ea e tatau ai ona mautinoa le to’ai taunu’u ma le toe oo mai fo’i o sui usufono i le tatou nofoaga nei mo le fa’amavaega aloa’ia i le aso Gafua, lea ua le au ai lea fo’i mania i le Motusa.”

O le lona tolu ai lenei o fonotaga fa’apenei, peita’i, o le aumalaga lenei ua sili ona to’atele mai isi malaga mo le so’otaga i taimi ua tuana’i.

FA’ATAITAIGA NOFO UTA MO SE GALULOLO

O le aso ananafi i le itula e 12:00 i le aoauli na fa’ataitaia ai e le Aoga Tulaga Muamua a Matafao i Faga’alu le “O’o mai o se Tsunami i o latou gataifale, ma ia nofo sauni e tula’i ma sola i mea maualuluga.”

Na matua mataituina e le Matagaluega o le Homeland Security lea gaoioiga fa’avave o le fa’asaoga o le fanau a’oga mai galulolo, ma ua matauina e i latou, e ao ina vave lava le fa’atinoga o le galuega lavea’i.

O se taimi lelei tele ua fa’atino ai e lenei a’oga lea fa’ata’ita’iga o le oo mai o le galulolo, aua o lea le a’oga o lo’o i luga tonu lava o le apitagalu ona falea’oga uma lava. O loo fa’autagia fo’i i fa’ailo tusia lelei, “e tatau ona tula’i ese tagata uma ma sosola i nofoaga maualuluga pe afai o le a oo mai se galulolo i le atunu’u.”

Na fa’ailoa mai e le matagaluega o le Saogalemu Fa’alotoifale, “Matua matagofie lava le faatinoga o le fuafuaga fa’ataoto a le Aoga Matafao. Sa latou vala’au i le EMS, ina ia auai, fa’apea fo’i ma le Vaega o Leoleo, ae maise le vaega a le TEMCO ma le Homeland Security ina ia auai.

“Na auai fo’i le afioga le Lutena kovana i le matou tamoega i luga o le mauga, aua e mautinoa, e moni lava, sola i le mauga e te ola ai!”

Fa’ailoa mai e nisi o tama’ita’i faia’oga, “O le matou galuega lavea’i na iloga ona matagofie aua, ua galulue fa’atasi ma Leoleo, EMS ma le Saogalemu Fa’alotoifale, peita’i, afai e leai uma nei sui mai le taimi tonu e tupu ai se faalavelave fa’afuase’i, e matou te iloa lelei mea ua mae’a fa’anofouta i ai i matou, ia ave le fanau fa’apitoa i a matou ta’avale, tamaiti matutua o le vasega 8 ma le fit ia fesoasoani i le aveina o fanau Level K ma le level 1 i luga o le maag o fesaga’i lelei ma i matou.”

Sa soso’o mai lana fa’amatalaga, “E le tau fa’atalia i ta’avale pe afai ua vave ona oo mai le fa’aletonu, e tais’i le fanau laiti e le fanau matutua ma matou o faia’oga, ma tamomoe loa i le mauga e ola ai aua e maualuga lava.”

O le fa’ata’ita’iga lenei sa i ai le EMS aua o lo’o tulata mai le falema’i, peita’i, pe i ai pe leai se EMS, ua nofo sauni lava Matafao Elementary mo taimi fa’apenei.

I le fonotaga a Sui na malaga mai fafo ma le vasega o Taitai o le tatou Malo e tusa ai o tapenaga fa’apitoa mo taimi fa’aletonu fa’apea, sa fa’ailo ai le lagona o nei sui mai fafo, “E tatau lava ona faia fa’ata’ita’iga fa’apenei, ia mautinoa ua nofouta tagata uma i mea e ao ina latou faia, oso tatau i ai, i taimi e tutupu ai fa’alavelave fa’afuase’i, ina ia le felavasa’i tiute fa’atino o sui ta’itasi uma ua aofia i le aufaigaluega e fa’atinoa tiute i taimi fa’apenei.”

I le tele o manatu fa’aalia, na lagona ai fa’amatalaga mai nisi o ta’ita’i, “Ua tatou iloa o tatou tiute e faia, ae ia nofo lelei le ta’ita’i ma to’a lelei i le taimi o fa’afitauli, ma fa’asolo lelei le fa’atautaiga o tiute o lana matagaluega, ia talafeagai ma tiute e fa’atino mai e le isi matagaluega, ae le o le felavasa’i o tiute, ae avanoa isi tiute e le fa’atinoa, i taimi ua puapuagatia uma le to’atele o le atunu’u.”