Ads by Google Ads by Google

Tala I Vaifanua


[ata: archive]

LE A’AFIA ASPA FA’AITIITIA O ITULA FAIGALUEGA

 

Ua fa’ailoa e le pule sili o le ASPA, Utu Abe Malae, e le a’afia itula faigaluega o le aufaigaluega atoa a le ASPA i le fa’aitiitia o itulaga faigaluega a le malo e pei ona faatulaga e le kovana.

 

Peita’i, ua ia fa’ailoa mai, “O le masina o Aukuso o le tausaga ua te’a, na amatalia ai ona fa’avasega e i matou le faiga e ao ina sologamalie ai lea tulaga ua alia’i mai nei ma ua fa’aitiitia ai itula faigaluega. Na taumafai fa’aitiitia muamua lava nisi o peimeni o totogia e le ASPA fa’apea fo’i ma nisi o tagata faigaluega ua oo i le taimi e litaea ai, ae maise i latou ua tele tausaga o faigaluega, ma nisi fo’i ua totogia latou penefiti ma ua manana’o ai e fa’amuta a latou tautua i le ASPA.”

 

O le aofai o tagata faigaluega a le ASPA i le fa’aiuga o le tausaga 2013 e silia i le 500, ae o le taimi nei e na o le 417.

 

Ua fa’ailoa mai, e le o mafai ona a’afia le ASPA ona ua vave tapena nei tulaga uma ma o lo’o fa’aauau mai ona va’ai toto’a i le tupe maua ma le tupe fa’aalu i aso ta’itasi, ia tumau ai le matagaluega i lona tulaga saogalemu i le taimi nei.

 

ULUA’I FA’AALIGA OLOA GAOSIA A’OGA MAUALULUGA A LE TERITORI

 

A’o le’i tu’uina atu Oloa gaosi a le Vocational Technical High i le Fa’aaliga o Oloa a A’oga Maualuluga lea faia i le Lee Auditorium i Utulei, 22 Aperila, ae ua mae’a ona fa’atauina e nisi o matua ma e na maimoaina nei oloa gaosi, o seti laulau ma nofoa mo aiga, o pusA tu ma isi lava ituaiga o meafale sa tu’ufa’atasia e le vasega o tomai tau Kamuta i lea aoga o matata eseese a le malo.

 

Ona o lenei le ulua’i tausaga ua tu’ufa’atasia uma ai afoga i lenei fa’aaliga o Oloa Gaosi ona o tomai o lo’o a’oa’oina i totonu o a’oga maualuluga uma lava, ae peita’i ua masani le Vocational Technical High i lea matafaioi e maua ai o latou maka mulimuli fa’aletausaga mo a latou matata o tau’avea i le potu a’oga.

 

Na mua’i faia le latou fa’aaliga lea i o latou laufanua i Tafuna, a’o le’i oo mai le aso o le fa’aaliga tele lea mo aoga maualuluga. Ma ua taumafai lava ona sefe mai a latou oloa mai le fa’atauina e matua ma e ua masani ona asia lenei fa’aaliga a le VocTech High i tausaga ta’itasi ina ia faatauina a latou oloa.

 

O nisi o oloa ua iloga ona alumia o ituaiga oloa e fausia e le ‘au Uela, lea e maua ai Oso, Koloa, Nofoa Siisii U’amea mamafa, Moega u’amea, mea ua aoga tele i faifa’ato’aga ma fa’amatagofie ai lumafale o aiga.

 

O le itu o kuka eseese ma isi tomai mo tina i le fatuaiga, sa matua fa’ateleina mai isi a’oga uma, aua o lo’o matele ina a’oa’oina le fanau teine i tomai tau Home Economics.

 

I le tausaga fou, ua fa’ailoa mai e le vasega o faia’oga, o le a matua tapena lelei mea uma mo latou vasega e fa’ao’o mai i lea fa’aaliga taua.

 

I se tala a le ali’i faia’oga o le Vasega Kamuta, Kenneth Jagon, “O le tupe aofai na koleti mai i meafale uma ua fa’atau atu a le matou vasega e latalata i le $1,000 ma ua fa’aaoga fo’i mo le fanau, ae maise o le toe fa’atau mai ai o nisi laupapa mo matou meafale o le tausaga a’oga fou.”

 

MAIMOA TURISI ATA O LE GATAIFALE A LE ‘OKEANOS EXPLORER’

 

O le vasega o turisi na asiasi mai i meli e lua na taula a’o i ai pea le Okeanos Exporer i le teritori, sa maua lo latou taimi e maimoa ma fa’afofoga ai i le ali’i o David McKinnie, lea e va’aia atoa le sailiiliga ma fa’amaumauga o malaga mo suesuega fa’amaumau a le Okeanos Explorer, o se va’a a le NOAA, e sailiilia i le gataifale, i o tatou vaega sami loloto ma motu tu’ufua lea e aofia i le tatou sone e tuu fa’atasi ai Rose Atoll, Swains ma tafatolu ua avea ma National Marine Sanctuary.

 

Ua oo mai McKinnie ina ia toe tapena se ripoti e aofia ai manatu fa’aalia mai ta’ita’i iloga o le atunu’u ae maise i motu ia ua aofia i lenei Fa’asao o le Gataifale, ma ia fa’ailoa fo’i ma maimoaina, fa’amaumauga matagofie ua mae’a faia ma tu’ufa’atasia e i latou ua fa’aigoaina: “Suesuega o le Moana o Amerika Samoa!”

 

O nisi o nei tapenaga uma ua mae’a faia sa fa’atautaia mai atu motu o le Manu’atele, Ta’u ma Swains. Ua fa’ailoa mai le maofa tele o le to’atele o tagata o le lalolagi atoa ua mae’a maimoaina Suesuega ua mae’a fa’ailoa i ala fa’ainiteneti a le Okeanos, ona o le tele o ‘amo ma meaola o le sami ua fa’ato’a va’aia i nei fa’amaumauga a le NOAA mai le tatou malo.

 

FEAGAIGA A SAMOA MA KAMUPANI VA’A FAGOTA SAINA

 

Ua mae’a ona fa’atulaga le feagaiga i le va o Samoa ma le Kamupani I’a a Saina, Huanan Fisheries ina ia avea le Uafu tele i Samoa ma le nofoaga e fa’amautu mai i ai pusa oloa e fuafua e fa’ae’e ma avatu i atunu’u i fafo.

 

Ua fa’ailoa mai o lenei Kamupani Saina ua fai si leva o taumafai e saili se nofoaga e fa’amautu ai se latou Fale Gaosi I’a Tu’uapa.

 

E le’i fa’amautuina e le malo o Samoa se nofoaga mo se latou Falei’a, peita’i, ua asiasia pea e le Hunan Fisheries le uafu i Satitoa, Aleipata, i le itu i saute o le motu o Upolu mo lea fa’amoemoe.