Ads by Google Ads by Google

Tala otooto mai le Fa’amasinoga


[ata: archive]
ausage@samoanews.com

BRIAN BENJAMIN LOMA

 

Na fa’ailoa e le afioga i le ali’i fa’amasino sili ia Michael Kruse i le ali’i o Brian Benjamin Loma, tulaga faaletonu (disadvantage) e oo ia te ia pe afai e manatu na te finauina lana mataupu i luma o le fa’amasinoga e aunoa ma se loia e fautuaina o ia e tusa ai o le tulafono.

 

O le taeao ananafi na toe valaau ai le mataupu a Loma i luma o le fa’amasinoga maualuga, ina ua fia iloa e ali’i fa’amasino le tulaga o loo taoto ai lenei mataupu. Na fa’ailoa e le ali’i loia ia Gerald Murphy le avea o ia ma sui o le malo, ae o Loma na tula’i lava o ia mo ia, ona e le i auai lana loia fautua ia Mark Ude.

 

Na fesili Kruse ia Loma pe ua mae’a ona ia totogi le tupe mo lana loia ia Ude, lea fo’i na tali le ua molia ioe, ma vaaia ai le lulu o le ao o le ali’i fa’amasino sili ma tilotilo sa’o mai i le nofoaga o loo nofo atu ai le ua molia.

 

Ina ua fesili Kruse i le tulaga o loo taoto ai le mataupu a Loma, na taua ai e le loia a le malo ia Murphy le fa’atali o le malo i le toe fesootai atu o le loia a le ua molia, ae na fa’aalia e le ua molia lona le toe gafatia ona totogi o se isi loia tua e tula’i mo ia, ona e le o i ai sana galuega e mafai ona maua ai se tupe e totogi ai se isi loia.

 

Na taua atili e Loma le i ai o avanoa faigaluega sa ofo atu mo ia, ae na avea le mataupu o lo o tu’uaia ai o ia ma auala na toe misi ai ia avanoa lelei mo ia. Na faailoa e Kruse ia Loma e fa’apea, na pau le ofisa loia e mafai ona tofia e le fa’amasinoga e fesoasoani mo ia, o le ofisa Loia Fautua mo tagata lautele, peita’i na taua e le ua molia e fa’apea, sa tauave muamua e le Ofisa Loia Fautua mo Tagata Lautele lana mataupu, peita’i na ia musu ma ia filifilia ai loa le ali’i loia tua ia Ude na te tauaveina lana mataupu.

 

Ua toe tolopo le mataupu a Loma seia mae’a ona latou toe talanoa ma le itu a le malo, peita’i ua fautuaina o ia e le fa’amasinoga ina ia saili sana loia, poo lona manatu fo’i e tula’i lava o ia mo ia lava.

 

O Loma o lo o tu’uaia i le fa’alavelave lea na tula’i mai i le 2015, ina ua malaga mai i le va’alele o le Hawaiian Air i le masina o Oketopa 2015, ae maua ai e sui o le Ofisa o Tiute vaega o fualaau fa’asaina i ni isi o oloa sa ia tauaveina.

 

O lo o fa’aauau pea tuutuuga o loo tatala ai Loma i tua e fa’atalitali ai taualumaga o lana mataupu.

 

TAVITA TUISALO’O

 

E 6 masina lea ua tu’u atu e le Fa’amasinoga Maualuga i le ali’i o Tavita Tuisalo’o e totogi mai ai se vaega o lana salatupe, atoa ai ma lona usitaia o isi uma tuutuuga o lana faanofovaavaaia sa tu’uina atu i le 2011, ina ua ta’usala o ia i le moliaga o le umia fa’asolitulafono o vaega o fualaau fa’asaina.

 

O ananafi na fa’atulaga e tu’uina atu ai le fa’asalaga a le fa’amasinoga maualuga fa’asaga ia Tuisaloo, ina ua fa’amaonia tu’uaiga o lona le usitaia lea o tuutuuga o lana nofovaavaaia, e pei o lona le alu e vaai le Ofisa Faanofovaavaaia i masina ta’itasi, atoa ai ma lona le fa’amaoni e totogi lana salatupe e $2,000.

 

Na fa’atoese Tuisaloo i le fa’amasinoga e tusa ai o lona le usitaia o tuutuuga o lana nofovaavaaia, ma ia talosagaina ai se avanoa e fa’aauau ai ona alu i tua e tausi lona to’alua ma lana fanau, ma saili se galuega e totogi ai lana salatupe.

 

Na fa’ailoa e le afioga i le ali’i fa’amasino sili ia Michael Kruse i le loia a Tuisaloo o Michael White e fa’apea, e tatau ona malamalama le ua molia, e i ai le malosi o le fa’amasinoga e poloaina ai le toe fa’afo’i o ia i lona atunu’u na malaga mai ai, aua e le o ia o se tagatanu’u o Amerika Samoa poo se sitiseni fo’i o le malo tele o Amerika.

 

O faamaumauga sa tu’uina atu e le Ofisa Faanofovaavaaia i le fa’amasinoga, o loo taua ai le fa’asala e le fa’amasinoga o Tuisaloo i le 2011 i le toese i Tafuna mo le 5 tausaga, peita’i sa fa’amalumalu lona tuliina o lea fa’asalaga, ae faanofovaavaaia o ia mo le 5 tausaga i lalo o tuutuuga e tatau ona usita’i i ai.

 

O ni isi o ia tuutuuga e aofia ai lona tuli o ni nai masina i le falepuipui, alu e vaai le ofisa faanofovaavaaia i masina ta’itasi, aua ne’i ona toe solia se tulafono, atoa ai ma lona totogi o le salatupe.

 

Na fa’ailoa e Kruse ia Tuisaloo e faapea, talu ai e le to’atele tagata faigaluega a le Ofisa Faanofovaavaaia, o se tulaga faigata tele ia latou le tau o e saili mai tagata e le o faamaoni i tuutuuga o a latou nofovaavaaia e pei o le ua molia.

 

O le faaiuga a le fa’amasinoga e pei ona tuuina atu mo Tuisaloo, o le faaopoopo lea o le isi tuutuuga fou i lana nofovaavaaia, o lona tuua lea o le teritori ma aumau ai i fafo atu mo le umi o loo totoe o lana nofovaavaaia, peita’i o le a taofi le faamalosia o lea tuutuuga, ae o le a tu’u atu masina e 6 e vaavaai ai le faamasinoga pe usita’i le ua molia i poloaiga ua tuuina mai.

 

Ua poloaina fo’i le tatala o ia i tua mai le toese, ae ua lava aso e 44 ia na taofia ai o ia e faatalitali ai se faaiuga o lana mataupu e fai ma ana faasalaga i lona le usitaia o poloaiga o lana nofovaavaaia.

 

“O le taimi lava e toe maua ai oe ua e le usitai i poloaiga a le fa’amasinoga, o le taimi fo’i lena e tatau ai loa ona e tuua le atunuu ae toe foi atu i lou atunu’u na e malaga mai ai”, o le saunoaga lea a Kruse ia Tuisaloo.

 

A o le i tuua e Tuisaloo le potu faamasino, na faatonu e le faamasino sili le sui o le Ofisa Faanofovaavaaia ina ia faia se suega i le tino o le ua molia, ina ia faamaonia ai na te le o tagofia fualaau fa’asaina.