LAFI MUELU

E ui o lea ua tatala i tua e le fa’amasinoga le ali’i o Lafi Muelu e fa’atali ai le isi ana iloiiloga lea ua fa’atulaga e fofogaina i le aso 25 o Novema, peita’i ua fautuaina o ia e le fa’amasinoga ina ia aua ne’i ona toe tu i le fanua o le aiga lea na tula’i mai ai le fa’alavelave lea ua mafua ai ona molia o ia e le malo i le moliaga o le fa’aoolima i le tulaga tolu atoa ai ma le fa’atupu vevesi i nofoaga faitele.

O se vevesi na tula’i mai i Iliili i le amataga o le vaiaso nei i se inugapia sa faia a Muelu ma ni isi o ana uo, na tula’i mai ai loa se vevesi i le va o Muelu ma se tasi o ana uo, ma i’u ina tupu ai ma se fusuaga, lea na manu’a ai le ali’i na a’afia ina ua tu’i e le ua molia ona foliga.

O ni isi o tuutuuga o le tatala ai i tua o Muelu e aofia ai le fa’asa lea ona ia toe tagofia le ‘ava malosi, fa’asa ona ia toe fa’atupu se vevesi i le va o ia ma le ali’i na a’afia, a ia avea o ia ma tagatanu’u lelei e tausisi ma usita’i i tulafono a le malo.

NOFOVAAVAAIA LE ALI’I NA FA’AO’OLIMA I LONA TO’ALUA

O le ali’i lea na tu’uaia e le malo i lona fa’ao’olima lea i lona to’alua, e ala i lona tu’i o ia ma una’i, ua faanofovaavaaia o ia mo le 12 masina i lalo o poloaiga e ao ona ia usita’i i ai. O ni isi o ia poloaiga e aofia ai le fa’asa lea ona ia toe faia ni uiga tau fa’amata’u i lona to’alua, fa’asa ona ia toe tagofia le ‘ava malosi, a ia avea o ia o se tagatanu’u e tausisi i tulafono a le malo i soo se taimi.

O le vevesi na mafua ai ona taofia e leoleo le ua molia i le toese i Tafuna i le masina na te’a nei,  ina ua logo e aiga tuaoi Leoleo mo se fesoasoani, i le mae’a ai lea ona fa’alogoina e aiga tuaoi o le alaga leotele mai o le fafine i le fia maua o se fesoasoani.

Na taua e le fafine na a’afia i Leoleo le manava atu o lona to’alua i le fale e ‘ona, ma amata loa ona fa’amisamisa atu ia te ia, seia oo lava i lona fa’ao’olima ia te ia, ma mafua ai loa ona ia alaga i luga mo se fesoasoani.

Ua poloaina fo’i e le fa’amasinoga le ua molia ina ia auai i se aoaoga e fesoasoani ai i le tulaga o le ita fa’apea ai ma le ‘ava malosi, ina ia mafai ai ona fesoasoani i le fa’afitauli o le ita ma le ‘ava malosi o lo o a’afia ai o ia.