Ads by Google Ads by Google

Tala otooto o Fa’amasinoga

ausage@samoanews.com

SOLOMONA TEOFILO

 

O le ali’i lea o lo o tu’uaia e le malo i lona fa’ao’olima lea i lona tuafafine (sister-in-law), e ala i lona ta tu’i o ona foliga, tu’u le tama’i naifi i lona ua, atoa ai ma lona fa’alala i ai o se samala e fa’afefe ai o ia, ua molia nei o ia e le malo i le moliaga mamafa o le fa’ao’olima i le tulaga lua.

 

O tu’uaiga ua tu’uaia ai le ali’i o Solomona Teofilo, 55 tausaga le matua o lona soifua, na afua mai i le afioaga o Tula, e mafua mai i se vevesi lava i le lotoifale o le aiga, ae fa’ai’u ai loa i lona fa’ao’olima i le lona ‘sister’-in-law, e 51 tausaga le matua.

 

I fa’amaumauga a le fa’amasinoga o lo o taua ai e fa’apea, o le vevesi na tula’i mai ina ua alu atu le ua molia i lona ‘sister-in-law’ e fa’anoi i ai le ta’avale a lona uso matua se’i ona fa’aaogaina, ae fai i ai le na a’afia e tago e vili lona uso matua i Arizona e fa’anoi i ai le ta’avale, ona o ia (sister-in-law) lea na tu’u atu i ai le vaavaaiga o meatotino a le ali’i o lo o i Arizona e aofia ai ma lana ta’avale.

 

A o taumafai le tina na a’afia e tau fa’aola le ta’avale, ae fa’afuase’i loa ona tago atu lima o Solomona ma se’i ese le ki o le ta’avale mai ia te ia, sosoo ai loa ma lona toe savali atu ma se tama’i naifi ma fa’alala i lona ua ma fefe ia te ia.

 

Na oso i fafo le tina na a’afia ma le ta’avale, ae ona vaaia ai fo’i le ua molia ua toe savali atu ia te ia ma se samala i lona lima, ma fa’aauau pea ona lafo atu e le ua molia upu masoa ma le mataga ia te ia.

 

Na aga’i atu leoleo ma latou maua atu ai le ua molia i lona fale, ona latou malaga atu ai loa lea i le Ofisa autu o Leoleo i Fagatogo mo isi su’esu’ega, lea na ia fa’ailoa ai i Leoleo lona malamalama atoatoa i ona aia tatau fa’aletulafono, peita’i e le i finagalo o ia e faia sana fa’amatalaga i Leoleo.

 

A o fa’agasolo ai taualumaga o le mataupu e pei ona tu’uaia ai Teofilo e le malo, ua poloaina o ia e le fa’amasinoga e aua ne’i ona toe solia se tulafono, aua fo’i ne’i ona toe taumafai e fa’afeso’ota’i le tina na a’afia i lana solitulafono, a ia avea o ia ma tagatanu’u lelei e tausisi i tulafono a le malo, aua fo’i ne’i ona toe fa’atupuina se vevesi i totonu o le nu’u poo lona aiga.

 

O le amataga o le masina fou lea ua fa’atulaga e le fa’amasinoga e toe valaau ai le mataupu a Teofilo i luma o le fa’amasinoga maualuga, i le mae’a ai lea ona ia tula’i ma teena tu’uaiga o le fa’ao’olima i le tulaga lua fa’asaga ia te ia.

 

O le moliaga o le fa’ao’olima i le tulaga lua, o se solitulafono D i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i se salatupe e le silia i le $5,000, po o le fa’asala fo’i i fa’asalaga uma ia e lua.

 

MARTIN SEGA

 

I le toe a’afia ai o le ali’i o Martin Sega i le tulafono ae o lo o fa’aauau pea ona fa’anofovaavaaia o ia e le fa’amasinoga fa’aitumalo, na taua ai e le afioga i le ali’i fa’amasino o le Fa’amasinoga Fa’aitumalo ia Fiti Sunia i le taeao ananafi, le faigata i le fa’amasinoga ona toe talitonuina o se tagata sa solitulafono muamua ma tu’u atu i ai avanoa e salamo ai, ae mulimuli ane toe aga’i atu fo’i i luma o le fa’amasinoga ona o se isi fo’i solitulafono sa ia faia.

 

Mo le ali’i o Martin Sega, e le gata sa ta’usala o ia i ni isi o solitulafono i luma o le faamasinoga maualuga, ae o lea fo’i ua toe molia o ia i le solitulafono o le fa’atupu vevesi i nofoaga faitele, e ui o lo o fa’anofovaavaaia o ia i luma o le faamasinoga fa’aitumalo, e mafua mai i ni isi o solitulafono na ta’usala ai o ia e le fa’amasinoga fa’aitumalo i le amataga o le tausaga nei.

 

O mataupu fou lea ua toe aafia ai Sega fa’apea ai ma le mataupu muamua e pei ona fa’anofovaavaaia ai o ia, o lo o taua ai i ripoti a leoleo le a’afia ai o le ‘ava malosi, peita’i na saunoa le afioga i le ali’i fa’amasino ia Sunia i le taimi na toe fofogaina ai le mataupu a Sega i le taeao ananafi e fa’apea, e faigata i le fa’amasinoga ona toe tu’u atu se avanoa i se tagata ua uma ona tu’u atu i ai le ulua’i avanoa, pe afai ae toe a’afia o ia i le tulafono.

 

O le aso 18 Oketopa lea ua toe tolopo i ai le mataupu a Sega, lea o le a iloiloina ai le moliaga fou e pei ona tu’uaia ai o ia, atoa ai ma le mataupu e fa’atatau i le talosaga a le Ofisa Faanofovaavaaia ua i luma o le fa’amasinoga, mo sana poloaiga e fa’aleaoga ai tuutuuga o le nofovaavaaia a le ua molia, ae poloaina loa o ia e tuli fa’amae’a aso fa’a falepuipui na fa’amalumalu e le fa’amasinoga.

 

O lo o taofia pea Sega i le toese i Tafuna e fa’atali ai le aso lea ua fa’atulaga e toe valaau ai lana mataupu.

 

AFATIA LOGO

 

Ua teena e le ali’i o Afatia Logo tu’uaiga a le malo fa’asaga ia te ia, e mafua mai i le fa’alavelave lea na ia fa’ao’olima ai i le ali’i na fasia lona atali’i i taimi o ta’aloga Volipolo a tupulaga o le nu’u. E le gata ua molia Logo i le fa’ao’olima i le tulaga tolu, ae o lo o tu’uaia fo’i o ia i le moliaga o le fa’atupu vevesi i nofoaga faitele.

 

O le fa’alavelave na tula’i mai ina ua mae’a ta’aloga Volipolo i le isi afiafi, ae tula’i mai ai se vevesi i le va o tupulaga o le afioaga o Petesa, ma fa’ao’olima ai loa le isi ali’i i le atali’i o Logo ma manu’a ai se vaega o lona foliga.

 

Na tagi le ali’i a Logo ma toe fo’i atu i lo latou fale, ae fa’afuase’i ai ona fetaui ma Logo o lo o sau lana ta’avale i luga o le auala, ma fesili ai loa le ua molia i lona atali’i i le mafua’aga ua tagi ai, o le mae’a ai ona fa’amatala e le atali’i i lona Tama o le fa’alavelave na tula’i mai, na alu atu sa’o ai loa ma le ua molia i le vaega o lo o i ai le malae Volipolo, ma maua atu ai le ali’i na ia fa’ao’olima i lona atali’i, ma ia fa’ao’olima ai loa e ala i lona tu’iina o ona foliga. Na taua fo’i e tagata na i ai i le taimi lea i Leoleo le fa’aumuumu o Logo i luga ma lafo upu masoa.

 

Ua poloaina e le fa’amasinoga le ua molia ina ia aua ne’i toe alu i le malae Volipolo o lo o faia ai ta’aloga a le tupulaga, pe toe taumafai fo’i e fa’afeso’ota’i molimau a le malo e aofia ai ma le ali’i na a’afia, a ia avea o ia ma tagatanu’u lelei e tausisi i tulafono a le malo, aua fo’i ne’i ona toe solia se tulafono.

 

Ua poloaina le taofia o pepa malaga a le ua molia ina ia mautinoa ai, e le mafai ona ia toe tuua le atunu’u a o fa’agasolo ai taualumaga o lana mataupu.