Ads by Google Ads by Google

Tala otooto o Fa’amasinoga

ausage@samoanews.com

NOFOIA LE FA’AMASINOGA O APILI I LE MASINA FOU

 

E 5 mataupu ua fa’atulaga e fofogaina i luma o le Vaega o le Fa’amasinoga o Apili i le Fa’amasinoga Maualuga a Amerika Samoa, pe afai ae tauaofia galuega a le Fa’amasinoga i le aso 27 Oketopa 2016 i le itula e 1:30 i le aoauli.

 

I se pepa o fa’amatalaga na tu’uina atu e le Failautusi o le Fa’amasinoga Maualuga a Amerika Samoa ia Terry S. Fielding, i Loia ma i latou uma o le a aofia i le fa’afinauina o mataupu ua laugotia mo lona iloiloina, o lo o fa’atulaga mai ai mataupu e 5 ua fa’amoemoe le Vaega o Fa’amasino latou te iloiloina i le masina fou.

 

O le mataupu muamua o le a iloiloga, o le mataupu lea i le va o le malo o Amerika Samoa ma David Letuli, sosoo ai le mataupu i le va o Ernest Haleck ma le malo o Amerika Samoa, sosoo ai ma le mataupu i le va o le malo o Amerika Samoa ma fanau laiti, o le mataupu tau solitulafono i le va o le malo o Amerika Samoa ma James Barlow, ae fa’ai’u ai i le mataupu i le va o le Longline Service Inc ma le Ofisa o Taui mo Fa’alavelave Fa’afuase’i.

 

E na o le tasi lava le mataupu tau solitulafono mamafa o le a iloiloina i luma o le fa’amasinoga apili, e na o le mataupu i le va o le malo ma le ali’i sa avea ma faiaoga i le Kolisi Tu’ufa’atasi ia Barlow, lea o lo o tuli sona fa’asalaga fa’a falepuipui e silia i le 20 tausaga le umi i le toese i Tafuna, ina ua ta’usala o ia e se vaega iloilo iuga i moliaga o lona faia lea o uiga mataga i ni ali’i talavou se to’atolu e laiti i lalo o le tulafono i le masina o Oketopa 2011.

 

Talu mai le taimi na lau ai le fa’asalaga a Barlow i le 2013, o lo o finau pea lana loia fautua i le fa’amasinoga ina ia toe iloilo le fa’aiuga ua mae’a ona tu’uina mai e le fa’amasinoga fa’asaga i lenei mataupu, ona o lo o i ai le talitonuga sa i ai se vaega o le fa’aiuga e le i lelei ona fa’atinoina.

 

O lo o taofia pea Barlow i le toese i Tafuna i le taimi nei e fa’atali ai le taimi e valaau ai lana mataupu i luma o le fa’amasinoga apili i le masina fou.

 

TOE TOLOPO FA’AMASINOGA AUTU O ALI’I E TO’AFA O LE AUTE

 

O le masina o Tesema 2016 lea ua toe tolopo i ai le fa’amasinoga autu o ali’i se to’afa mai le pisinisi o Le Aute, lea o lo o tu’uaia i le fa’alavelave lea na tafana ai e ni isi le ofisa o Leoleo i Leone i le masina o Oketopa 2014, i le mae’a ai lea ona talia e le fa’amasinoga maualuga o le fa’afinauga a se tasi o Loia o lo o puipuia aia tatau o se tasi o i latou nei i le vaiaso na te’a nei, mo se avanoa e toe tolopo ai lenei mataupu, ona ua masalomia le tula’i mai o ni fa’aletonu i le ulua’i ripoti sa faila e le malo e uiga i lenei mataupu.

 

Na taua e le tama’ita’i loia ia Sharron Rancourt o lo o tula’i mo le ali’i o Manu Lefatia, i luma o le afioga i le ali’i fa’amasino sili lagolago ia Lyle L. Richmond i le vaiaso na te’a nei e fa’apea, e i ai ni isi o fa’amatalaga e fesoasoani malosi i le mataupu o lo o tu’uaia i Lefatia ma isi ali’i e to’atolu, ae foliga mai taofi ma aveese e le malo.

 

Sa ia taua atili e fa’apea, o luga o le ripoti a leoleo e uiga i lenei mataupu, ua tusitusi solo ma ua faigata ai ona iloa fa’amatalaga ua aveesea mai i le ripoti, e oo fo’i i ni isi o molimau sa taua i totonu o le ripoti e ono mafai ona fesoasoani i le itu tete’e, ua le mafai ona iloa o latou igoa i le taim inei.

 

I le mae’a ai ona iloiloina e ali’i fa’amasino o le talosaga a le itu tete’e, atoa ai ma le iloiloina o nisi o fa’amatalaga e fa’atatau i lenei mataupu, na manatu ai loa le fa’amasinoga ina ia toe tolopo le iloiloga autu o le mataupu lenei sa fuafua e amata aloaia i le vaiaso nei, ina ia maua ai se taimi o le itu tete’e latou te iloiloina ai ni isi o fa’amatalaga latou te talitonu e fesoasoani i le latou mataupu.

 

O isi alii e to’atolu o lo o tu’uaia fa’atasi ma Lefatia i le mataupu lenei e aofia ai Mosegi Solia, Tuliese Taliu ma Sinapati Tu’ufa’anatu, lea o lo o tauaveina e loia mai le ofisa loia o tagata lautele a latou mataupu, lea e aofia ai Michael White, Doug Fiau ma Karen Shelly.

 

O le fa’alavelave e pei ona tafana ai le ofisa o leoleo i Leone, o lo o masalomia na alia’e mai ina ua taofia e leoleo le tuafafine laititi o Lefatia, ma alia’e mai ai loa le fa’alavelave e pei ona taua e le malo i le pepa o le tagi sa latou fa’aulu fa’asaga ia i latou o lo o tu’uaia i lenei mataupu.

 

E leai se isi na a’afia i le fa’alavelave lenei, se’i vagana ai tioata o le Ofisa o Leoleo na fa’aleagaina i pulufana.

 

O lo o taofia pea i le toese i Tafuna i latou nei e to’afa, ina ua le mafai ona latou totogiina le ta’i $100,000 sa fa’atulaga e le fa’amasinoga e tatala mai ai i latou mai le fa’amasinoga.

 

SIAUMAU SIAUMAU JR

 

I le tuana’i ai o masina e fa talu ona mae’a le lauina o le fa’asalaga fa’a falepuipui a le ali’i o Siaumau Siaumau Jr i luma o le fa’amasinoga maualuga i le masina o Aperila o le tausaga nei, o le aso Faraile o le vaiaso nei lea ua fa’amoemoe e toe tula’i ai Siaumau Jr i luma o le fa’amasinoga maualuga, mo le fa’aleoina o lana talosaga i luma o ali’i fa’amasino mo se avanoa e toe fa’aitiitia ai lana fa’asalaga ua mae’a ona tu’uina atu.

 

O le fa’aiuga o le masina o Aperila na te’a nei na fa’asala ai e le fa’amasinoga maualuga ia Siaumau Jr e taofia i le toese i Tafuna mo le olaga atoa, ina ua ta’usala o ia i le moliaga o le fasioti tagata i le tulaga muamua, e mafua mai i le fa’alavelave lea na ia tagatavaleina ai le ali’i leoleo su’esu’e ia Det. Lt. Lusila Brown i le 6 tausaga talu ai.

 

E ese mai i le fa’asalaga solo atoa i le toese i Tafuna, e lua isi fa’asalaga ta’i 10 tausaga le umi o lo o fa’asalaina ai fo’i e le fa’amasinoga ia Siaumau Jr, ina ua ta’usala o ia i moliaga mamafa e lua o le taumafai lea e fasioti isi Leoleo se to’alua.

 

E 5 tausaga talu ona tuana’i le fa’alavelave na tagatavaleina ai ia Det. Brown ae fa’atoa lau le fa’asalaga a le ua molia i luma o le fa’amasinoga.

 

O le susuga a Siaumau Jr sa atoa i ai ali’i pagota e to’a 25 na maua tusi pasi i se fa’auuga sa faia a le toese i Tafuna i le masina na te’a nei, mo pagota na mae’a lelei se aoaoga Tusi Paia sa auai mo le umi e 6 masina.