Ads by Google Ads by Google

Taofia falepuipui le ali’i Amerika o lo o tu’uaia i Tonga fasioti tagata


Le ali’i o Dean J. Flectcher [ata AF]
ausage@samoanews.com

Ua taofia nei i le toese i Tafuna e aunoa ma se tupe ua fa’atulaga e le fa’amasinoga e tatala ai o ia i tua, le ali’i mai Amerika lea na sola ese mai i Tonga i le vaiaso na te’a nei, ona o tu’uaiga i lona fasiotia lea o lona to’alua, e fa’atali ai feutanaiga o lo o faia i le va o le malo o Amerika Samoa ma le malo o Tonga, mo pepa talafeagai e mafai ona toe fa’afo’i atu ai lenei ali’i i Tonga.

 

E tusa ai o ripoti sa fa’asalalauina mai Tonga, o lo o taua ai e fa’apea, o le ali’i o Dean J. Fletcher na taofia i lalo o le vaavaaiga a le Ofisa o Leoleo i Tonga, i le aai o Neiafu, e fa’atali ai le taimi e tula’i ai i luma o le Fa’amasinoga, ona o le moliaga o le fasioti tagata ua molia ai o ia, e mafua mai i le fa’alavelave lea na ia fasiotia ai lona to’alua a o taula ai le la va’a faila i le motu o Vava’u i le masina o Iulai o le tausaga nei.

 

A o fa’atali ai mo le taimi e tula’i ai i luma o le fa’amasinoga i Tonga, na mafai e Fletcher ona sola ese mai lalo o le vaavaaiga a Leoleo, ma aga’i atu ai i lana va’a faila o le Sea Oak ma sola ese ai loa, ma agai mai ai loa i Amerika Samoa.

 

Pe tusa o le itula e 5:48 taeao o le aso Gafua na te’a nei, na logo ai e se molimau le Ofisa autu o Leoleo i Fagatogo, e fa’atatau i le va’a faila ua masalomia le ulufale fa’asolitulafono mai i totonu o ogasami o le atunu’u, o lo o folau mai ai na o se ali’i papalagi e uumi lona lauulu.

 

Na taua atili e le molimau e fa’apea, na fa’ateia o ia ina ua ia vaaia le va’a o le Sea Oak o lo o taula i tafatafa ane o le latou va’a, ma ia vaaia ai le ali’i o Fletcher i totonu o le va’a, na te iloaina lelei fo’i lenei ali’i talu mai le 6 tausaga talu ai, ma sa ia faitau fo’i i se ripoti lata mai e fa’atatau i le ali’i lenei ma le fa’alavelave na sola ese mai ai i Tonga ona o le moliaga o le fasioti tagata.

 

Na fa’afeso’ota’i e le Ofisa autu a Leoleo sui o le Vaega a le Marine Patrol, ma aga’i atu ai loa le va’a mo le sailia o le va’a faila o le Sea Oak e pei ona taua o lo o taula i gatai ane o le afioaga i Fagaitua.

 

Na taunu’u leoleo i le vaega tonu o le sami o lo o tu ai le va’a faila a le Sea Oak, fa’apea ai ma se ali’i papalagi e to’atasi o lo o i ai i luga o le va’a, ma latou iloa ai le fetaui lelei o foliga o le tagata sa fa’ailoaina atu e le molimau ma le tagata o lo o latou vaaia i luga o le va’a, ma talosagaina ai loa e Leoleo lea ali’i ina ia latou aga’i mai i le Ofisa mo ni isi o fesili e fia fesiligia ai o ia.

 

Ina ua taunu’u i le Ofisa autu a Leoleo i Fagatogo na mafai ai loa ona fa’amaonia, o le ali’i sa malaga mai i le va’a, o ia moni lea o Fletcher, 53 tausaga mai le setete o Florida i Amerika, o ia fo’i o le kapeteni o le Sea Oak.

 

O su’esu’ega atili sa faia e Leoleo i lenei mataupu, na fa’amaonia ai le leai o ni pepa e fa’amaonia ai le tu’uina atu o se fa’atanaga ia Fletcher e ulufale mai ai i ogasami o le atunu’u, e leai fo’i se fu’a lanu samasama i luga o le va’a e fa’amaoania mai ai, ua i ai se faatanaga ua tu’uina atu ia te ia e mafai ai ona ulufale mai lana va’a i le atunu’u, poo se fa’amaoniga fo’i e iloa ai ua mae’a ona faia kilia e tuua ai e lana va’a le uafu mulimuli lava o le atunu’u sa ia asia.

 

Ona o tulaga i le leai lea o ni pepa fa’amaonia e fa’ataga ai Fletcher ma lana va’a e ulufale mai i Amerika Samoa, na taofia ai loa o ia i lalo o le vaaia a le Ofisa o Leoleo i le po o le aso Gafua na te’a nei, ma molia i le moliaga mama o lona fa’atamala lea e tu’uina mai fa’amaonia e fa’ataga ai ona ia ulufale mai fa’atasi ma lana va’a faila i totonu o le atunu’u.

 

O le moliaga lea ua molia ai Fletcher e le malo o Amerika Samoa, o se moliaga A o solitulafono mama, lea e mafai ona fa’asala ai o ia i le toese mo le umi e le silia i le tasi le tausaga, pe fa’asala fo’i i le salatupe e le silia i le $1,000.

 

O le taeao ananafi na tula’i ai Fletcher i luma o le fa’amasinoga fa’aitumalo, ma ia teena ai le moliaga o lo o tu’uaia ai o ia e le malo, ma fa’atulaga ai loa le isi ana iloiloga e faia lea i le aso 26 Oketopa i le itula e 8:30 i le taeao.

 

A o le i finau loia mo se vaega tupe e fa’atulaga e tatala ai le ua molia i tua e fa’atalitali ai taualumaga o lana mataupu, na fa’ailoa e le afioga i le ali’i Fa’amasino ia Fiti Sunia i itu e lua le finagalo o le fa’amasinoga, ina ia taofia pea Fletcher i le toese i Tafuna e aunoa ma se tupe e fa’atulaga e tatala ai o ia, e ui o lo o tu’uaia o ia i le moliaga mama.

 

Ina ua mae’a ona saunoa Sunia e fa’amanino le finagalo o le fa’amasinoga, sa vaaia le taumafai o Fletcher e talanoa atu i le Failautusi o le Fa’amasinoga o lo o alala mai i le laulau o lo o i ona luma, peita’i na fa’ailoa e Sunia ia Fletcher e fa’apea, “Mo lou silafia alii Fletcher, e le fa’atagaina oe ona e talanoa mai i la’u Failautusi, afai e i ai se mea e te fia talanoa ai, ona e talanoa lea i lau loia lena ua tofia e tula’i mo oe”.

 

O le ali’i Loia Fautua lagolago mai le Ofisa o le Loia Fautua mo tagata lautele sa tula’i mo Fletcher.

 

“Ua mafua ona faia le fa’aiuga a le fa’amasinoga e teena ai le fa’atulagaina o se tupe e tatala ai le ua molia i tua, ona o lea ua malamalama le fa’amasinoga i le mataupu lea o lo o mana’omia ai le ua molia e le malo o Tonga, ona o le moliaga o le fasioti tagata, ma i lalo o auala e fa’atino ai galuega a le fa’amasinoga, e i ai le malosi o le fa’amasinoga e teena ai le fa’atulagaina o se tupe e tatala ai le ua molia i tua, ae sei fa’atali feutanaiga o lo o faia i le va o le malo o Tonga ma le malo o [Amerika] Samoa, mo le fa’amautuina mai o pepa e mafai ai ona pu’e fa’apagota le ua molia ma toe fa’afo’i atu ai loa i Tonga,” o a Sunia lea.