Ads by Google Ads by Google

Taofia le toe taliaina o fualaau’aina i le School Lunch

ausage@samoanews.com

Talu ai le le fa’amaoni o ni isi o le aufai fa’atoaga fualaau’aina i le tausia leleiina lea o a latou fa’atoaga ina ia tusa ma ala o le tulafono, ua faia ai loa se fa’aiuga mai le Fa’atonusili le tumau o le Matagaluega o Fa’atoaga a le malo, ina ia taofia loa le toe taliaina o fualaau’aina o lo o totogina i le atunu’u i le polokalame o Taumafa a fanau aoga (School Lunch Program), seia toe i ai se isi fa’asilasilaga e tuuina mai.

 

O le vaiaso nei na tu’uina atu ai e le Faatonusili le Tumau o le Ofisa o Fa’atoaga ia Peter Gurr sana tusi i le Fa’atonusili le Tumau o le Matagaluega o Aoga a le malo, e logo i ai le fa’aiuga ua faia i fualaau’aina o lo o fa’atau atu i le polokalame o le ‘School Lunch’, atoa ai ma faleoloa ma pisinisi o lo o latou fa’atauina nei fualaau’aina, ina ia o latou nofouta i le fa’aiuga ua faia.

 

Na taua e le susuga a Gurr i lana tusi e fa’apea, i asiasiga masani o lo o mafai ona fa’atinoina e sui o le Ofisa o Fa’atoaga a le malo i nofoaga eseese o lo o i ai fa’atoaga o togalaau’aina i le atunu’u, na maua ai i le asiasiga i le masina lenei o Oketopa le to’atele o le aufai togalaau’aina o lo o latou soliina le tulafono mo vailaau e tausi ma teu ai fa’atoaga togalaau’aina.

 

“O a matou asiasiaga o lo o fa’atinoina pea i masina ta’itasi, o lo o faia ina ia maua ai a matou fa’amaumauga i tulaga o lo o i ai le usitaia e le aufai fa’atoaga o tulafono o le tausiaina o a latou fa’atoaga, ma ua matou fa’amaonia ai i nei asiasiga le to’atele o le aufai fa’atoaga o togalaau’aina latou te le o usitaia ma ausia tulafono mo le tausiaina o a latou fa’atoaga”, o se vaega lea o le tusi a Gurr ua mae’a ona tu’uina atu i le Ofisa o Aoga faapea ai pisinisi, faleoloa atoa ai ma i latou o lo o fa’atauina fualaau’aina i tafatafa o le alatele.

 

O tulaga sa mafai ona maua e le Ofisa o Fa’atoaga i le soliina o le tulafono mo le tausiaina o faatoaga togalaau’aina, ua atagia mai ai le matuia o vaega sa maua, ona o le malolosi o vailaau o lo o fa’aaoga e tausi ai fa’atoaga i le atunu’u, lea o lo o fa’atau atu i le atunu’u fa’apea ai le polokalame o le school lunch a fanau aoga.

 

O ni isi o tulaga sa maitauina i lea asiasiga e aofia ai le fa’aaoga o fagu vailaau mai isi atunu’u e le o tusia ai ni igoa e fa’ailoa mai ai le malosi ma ituaiga vailaau, o isi ua fa’aaoga vailaau e le o i ai numera mai le Ofisa o le AS-EPA e fa’ailoa mai ai ua fa’ataga le fa’aaogaina o ia fagu vailaau.

 

“O ni isi o fa’atoaga ua maua e le o ausia tulaga i le saogalemu e pei o le leai lea o ni faletaele e fa’aaoga e i latou o lo o galulue i fa’atoaga, ma o ni isi o fai fa’atoaga o lo o latou fa’aaogaina atigi apa e fai ma faletaele (tulou), ae o ni isi o fai fa’atoaga sa maua i isi fo’i asiasiga ua mavae atu, latou te fa’aaogaina otaota o tagata e fai ma fa’alelei eleele ina ia tupu ma ola lelei ai a latou fa’atoaga”, o se tasi lea o vaega o le tusi a Gurr.

 

O isi tulaga ua fa’amaonia le maua i asiasiga a le Ofisa o Fa’atoaga, e le gata ua fa’aaoga mea fa’alelei eleele e le o fa’atagaina e le Ofisa o Fa’atoaga, ae ua ova fo’i le fa’aaogaina o vailaau e fana ai tino o fualaau’aina, atoa ai ma le fa’aaoga o vailaau ae leai ni laisene e fa’ataga ai ona fa’aaoga nei fagu vailaau.

 

“O le saogalemu o le atunu’u atoa aemaise alo ma fanau o lo o fa’aaogaina le polokalame a le School Lunch, o le itu lena o lo o ave i ai le fa’ataua ma le fa’amuamua a le Ofisa o Fa’atoaga, ma ua manatu ai loa ina ia taofia le toe fa’atauina mai o fualaau’aina o lo o toto i le atunu’u seia toe logo atu”, o le isi lea vaega o le tusi a Gurr.

 

Sa ia taua fo’i e fa’apea, o ni isi o itu matuia sa mafai ona molimauina i a latou asiasiga, o le tu’uina mai lea e le aufai fa’atoaga o fa’amaumauga pepelo ma le sese e tusa ai o le tausiaina o a latou fa’atoaga.

 

Na pau fa’atoaga o lo o fa’ataga pea ona talia i le School Lunch atoa ai ma le fa’atau atu i soo se vaega o le atunu’u e aofia ai le taro, fa’i, ma ituaiga fualaau’aina ia o lo o toto ma tausi i totonu o fale (hydroponically-grown vegetables).

 

Ua lapataia fo’i ma le malosi e le Ofisa o Faatoaga pisinisi, faleoloa faapea ai i latou o lo o masani ona latou fa’atauina atu fualaau’aina i tafatafa o le alatele, ina ia latou fa’autagia le taua o le lapataiga ua tu’uina atu mo le saogalemu o le atunu’u atoa.

 

O kopi o lenei tusi ua tuuina atu lea i le afioga i le ali’i kovana ia Lolo Matalasi Moliga, faapea ai ni isi o Ofisa ma Matagaluega a le malo o lo o gafa ma le tausia o le soifua maloloina o le atunu’u.