Ads by Google Ads by Google

Taoto fautuaga Kovana pe tatau ona fa’aauau pea Ofisa Turisi pe leai


Lulu aao le afioga i le ali’i kovana ia Lolo Matalasi Moliga ma sui o lana kapeneta. [ata AF]

Se tasi o atina’e ua maitauina le faatupulaia i le atunu’u i le taimi nei, le atina’e o turisi. [ata AF]
ausage@samoanews.com

Ua taoto atu nei se fautuaga mai le afioga i le ali’i kovana o le atunu’u i le Fa’atonusili Lagolago o le Ofisa o Turisi a le malo, ina ia toe fetu’una’i e le Ofisa o Turisi le tulaga tonu e tatau ona i ai ana tiute tauave, aemaise lava le toe mafaufau pe tatau ona toe fa’aauau pea le tautua a lenei Ofisa i totonu o le atunu’u pe leai fo’i.

 

O lea fautuaga mai le tofa Lolo Matalasi Moliga, na tu’uina atu lea i le tofa Vaito’a H. Langkilde i le taimi o le fonotaga a le kapeneta i le aso Lua o le vaiaso nei, ina ua mae’a ona folasia e Vaito’a fuafuaga fa’ataoto a le Ofisa o Turisi mo le fa’amoemoe ina ia si’itia ai le tautua a le Ofisa i le lumana’i.

 

E pei ona masani ai i le tele o fonotaga a le kovana ma lana kapeneta, e i ai avanoa e tu’uina atu i Ta’ita’i o Ofisa ma Vaega Tumaoti a le malo mo le fa’alauiloaina o a latou ripoti, i le tulaga o lo o i ai la latou tautua i le atunu’u.

 

Na fa’afetaia e Vaito’a ofisa eseese uma a le malo o lo o galulue i le fa’amamaina o le atunu’u atoa, ona o le isi lea tulaga o lo o fa’amalosia e le latou Ofisa, o le fa’amamaina lea ma teuteu fa’amatagofie le atunu’u, ina ia fesoasoani ai i le fa’atosinaina ai lea o turisi i le atunu’u.

 

Sa ia fa’atula’i fo’i se tasi o lu’itau i le unaia lea o tagata e fausia pisinisi laiti, ona o ituaiga pisinisi laiti na e fesoasoani tele i le atina’e tau turisi i le atunu’u.

 

Sa ia fa’ailoa i luma o le kapeneta le si’itia pea lea i luga o le atina’e tau turisi i Amerika Samoa, ma o lo o molimauina pea le tele o va’a meli o lo o ulufale mai i le atunu’u ma momoli mai ai le to’atele o tagata mai fafo o lo o fia maimoa ia Amerika Samoa.

 

I le mae’a ai o le saunoaga a Vaito’a, na tula’i ai loa Lolo ma ia fa’ailoa se tasi o lu’itau o lo o tula’i mai pea i le va o le Fono Faitulafono ma le Ofisa o Turisi, i le taimi e fesiligia ai le paketi a lea Ofisa o tausaga ta’itasi.

 

“Ou te iloa o le isi lenei Ofisa o lo o tele i ai fesili a le atunu’u aemaise lava i le Fono Faitulafono, ona o lo o atagia mai i ana galuega fa’atino le i ai o se fete’enaiga ma isi Ofisa o le malo”, o le saunoaga lea a le ali’i kovana.

 

“Ae pei ona ou fai atu, o le tele o tausaga e fesiligia ai lava e le Fono Faitulafono po o i ai se aoga a le Ofisa lenei o loo fai mo le atunu’u, ma ua foliga mai ai i ni isi o iloiloga o le paketi a le Ofisa lenei ma le Fono, ua tauau ina tu’u le fesiligia o galuega a le Ofisa ae ua amata ona aga’i fesili i tagata o lo o galulue i totonu o le Ofisa, ma o se tulaga e lagona ai le fa’anoanoa”.

 

Saunoa atili Lolo e faapea, o le isi fesili o lo o tele i ai manatu o le Fono Faitulafono, pe tatau ona toe fetu’una’i le tupe e fa’atino ai galuega a le Ofisa po o le fa’aitiitia fo’i.

 

“O la’u fautuaga i le Ofisa o Turisi, aua le fefefe e fai fa’aiuga lelei, ua tatau ona outou nonofo i lalo ma toe mafaufau pe tatau ona fa’aauau pea le tautua a le Ofisa pe leai. E mafua ona tutupu manatu ma fesili fa’apenei ona e le o vaai tino le Fono ma le atunu’u i tulaga tonu o a outou galuega, mae ua foliga mai fo’i ua fete’ena’i a outou galuega fa’atino ma galuega fa’atino a ni isi o Ofisa a le malo”, o le saunoaga lea a Lolo.

 

Na fa’ailoa e le ali’i kovana i luma o le kapeneta e fa’apea, o le tele o taimi latou te talanoa ma fetufaa’i ai ma ta’ita’i o le Fono, o le isi lava lenei mataupu latou te talanoa ma fa’asoa i ai, o le tulaga o le tupe fa’asoasoa a le Ofisa o Turisi.

 

E pei ona fesiligia i le tele o iloiloga o le paketi a lea ofisa i tausaga ua mavae, le tele o fesili a afioga i Senatoa ma Faipule fa’asaga i le totogi ma penefiti o lo o maua e le Pulesili o le Ofisa o Turisi, lea e aofia ai penefiti mo le fale e nofo ai, tupe mo talavai, ma isi uma lava penefiti o lo o i totonu o lana konekarate sa pasia e le Komiti Fa’afoe o le Ofisa o Turisi.