I le mae’a ai o aso e tolu o fetufaa’i sui usufono mai Samoa ma Amerika Samoa i auala e fa’aleleia ma si’itia ai i luga puipuiga mo le soifua maloloina o tagata lautele, o le taeao o le aso Faraile nei, Novema 18, 2016 i le itula e 11:00 na tapunia aloaia ai loa le Fonotaga lona 7 a Vaega o le Soifua Maloloina a Samoa e lua.

A o le i tapunia aloaia lenei fonotaga taua, na maua le avanoa e toe fetufaa’i ai sui usufono mo le fa’ailoaina o auala ma fa’amaumauga ua mafai ona latou tu’u fa’atasia e fesoasoani ai i le fa’amautuina atili o le manulauti, o le fa’aleleia lea o le soifua maloloina o tagata, atoa ai ma le sainiga o se Feagaiga e fa’ailoa ai tiute tauave ma tuutuuga uma e fa’atatau i lenei fonotaga.

O le afioga i le Minisita Lagolago o le Soifua Maloloina a Samoa, Salausa Dr. John Ah Ching na fai ma sui o le au usufono mai Samoa e fa’afetaia le avanoa ua mafai ona latou maua e fa’atasi mai ai i lenei fonotaga taua, ae o le afioga i le Kovana Iitumalo o le Falelima i Manu’a, le afioga i le Fa’atui ia Misaalefua John Hudson na fai ma sui o Amerika Samoa e tali fuaitau e tusa ai o le fa’amoemoe ua mae’a.

Na taua e Salausa i lana saunoaga le taua tele o le fetufaa’i o fa’amatalaga, fa’amaumauga ma soo se metotia e mafai ai ona foia fa’afitauli o lo o a’afia ai le soifua maloloina o tagata, ae maua ai le avanoa e galulue ai ta’ita’i ma tagata faigaluega e fa’atino tiute mo le tausia lelei ina o le soifua maloloina o le atunu’u.

“O le 7 lenei o tausaga talu ona tau amata mai lenei fa’amoemoe, ae i la’u vaavaai atu i ai, e le i leva ona amata lenei fa’amoemoe a o lea ua vaaia le tino mai o fuafuaga, e ui o lo o laititi pea le fa’amoemoe o lea fa’atoa tau tamo’e, pe afai e fa’atusa i se tamaititi laititi, ae o le itu taua ua amata ona vavala mai tulaga manuia e pei ona tatou taumafai atu i ai”, o le saunoaga lea a Salausa.

Sa ia talanoa i le taua tele o le fonotaga lenei, ona o lo o maua ai le avanoa o ta’ita’i uma o le atunu’u e mafuta mai ai, e pei o sui o le Fono Faitulafono a Amerika Samoa, sui o le Kapeneta, aemaise ai o fa’auluuluga o Matagaluega ma ni isi o Ofisa tetele o le malo o lo o mafai ona ofo mai lo latou sao i le fa’aleleia o le soifua maloloina o tagata.

Ae mo Samoa fo’i ia, o lo o maua fo’i le avanoa e malaga mai ai sui o le Palemene ma ni isi o fa’auluuluga o ofisa a le malo ma tagata faigaluega, e galulue i le fetufaa’i ma fa’asoa fa’amatalaga e fa’atatau i le puipuiga o le saogalemu o tagata.

Na ia fa’afetaia le malo o Amerika Samoa ona o le avanoa na mafai ai ona tali sapaia lo latou taunu’u mai e auai i lenei fonotaga.

“O le mea moni lava ia, i le 3 aso sa tatou fa’asoa ma fetufaa’i ai i mataupu eseese e fa’atatau i auala e tausia ai le soifua maloloina o tagata, ua maitauina ai ni isi o fa’aletonu o lo o tutupu mai i Samoa e lua i le taimi nei, i le tuai lea ona faia o sailiiliga i auala e foia ai ni isi o gasegase e le pipisi e pei o le kanesa, gasegase o le fatu, fa’apea ai ma isi lava ituaiga gasegase ua to’atele o tatou tagata ua maliliu ai, ae o le taua lena o le fonotaga lenei, ua maua ai metotia ma auala e foia ai le toe tula’i mai o lenei fa’afitauli i le lumana’i”, o le saunoaga lea a Salausa.

I le tali fuaitau a le afioga a Misaalefua, sa ia fa’afetaia ai ta’ita’i o Vaega o le Soifua Maloloina sa latou tu’ufa’atasia lenei fa’amoemoe taua, lea ua mafai ai ona maua le avanoa e fa’amanuiaina atu ai ma tagata faigaluega atoa ai ma tagata lautele o le atunu’u, i fa’amatalaga taua e fa’atatau i le soifua maloloina o tagata uma.

O lana fautuaga i sui o le Vaega o le Soifua Maloloina a Samoa e lua, afai e mae’a ona tu’u fa’atasia fa’amatalaga e fa’atatau i metotia e puipuia ai le soifua maloloina o tagata, ona tufa loa lea ma fa’asoa i tagata lautele ma le lalolagi e ala i fesootaiga fa’aonaponei, ina ia mafai ai ona silafia e tagata Samoa uma le taua o le ola soifua maloloina.

Na talanoa le afioga i le Fa’atui i le taua o le soifua maloloina o tagata uma, e ala i le fa’agaioi o tino i le mae’a ai lea ona tausami i meaai mamafa, ina ia fa’aitiitia ai le tino puta.

Sa ia taua fo’i e fa’apea, o le isi lea fa’afitauli i Amerika Samoa i aso nei, o le to’atele o tagata lapopo’a, ae mafua mai i le leai o se fa’amalosi tino i le taimi e mae’a ai ona tausami, e le fa’apei o aso ua mavae, e tiga lava ona lololo le fasi pua’a sa fiafia i ai toeaiina ma loomatutua, ae sa molimauina pea lava lo altou tino soifua maloloina, ona sa toaaga i latou e fa’amalosi tino ma fa’agaioi o latou tino.

“O le fautuaga mo lenei fonotaga, o a uma fa’amatalaga ua mafai ona outou tu’u fa’atasia, ia mafai ona fa’asalalau ina ia silafia ai e le atunu’u atoa le taua o la outou galuega sa faia, ma iloa ai auala eseese e mafai ai ona fa’aleleia le soifua maloloina o tagata ma i Samoa e lua, ma mafai ai ona soifua tagata Samoa i se soifuaga fiafia ma ola soifua maloloina”, o le saunoaga lea a Misaalefua.

O le tatalo fa’aiu na saunia e le susuga i le ali’i faifeau ia Rev. Fouvale Asiata mai le Ekalesia EFKAS mai Matu’u ma Faganeanea, ma lulu aao ai loa ma fa’atoa sui o Amerika Samoa i le usugafono mai le malo o Samoa, lea na amata toe fo’i atu i le afiafi nei le isi vaega, ae o isi ua fa’amoemoe e toe fo’i atu i Samoa i le aso a taeao, le aso To’ona’i, 19 Novema 2016.