Ads by Google Ads by Google

Tatala aloaia fonotaga lona 7 Soifua Maloloina a Samoa e lua

ausage@samoanews.com

O le taeao ananafi na tatala aloaia ai le fonotaga lona 7 a le Vaega o Soifua Maloloina i le va o Samoa e lua, mo le fa’aauauina lea o fetufaaiga i auala e si’itia ai puipuiga i le soifua maloloina o tagata lautele o le atunu’u.

 

I le silia i le to’a 30 sui usufono mai le malo o Samoa fa’apea ai sui o Vaega o le Soifua Maloloina mai le malo tele, Niu Sila ma Ausetalia o lo o auai i lenei fonotaga, lea ua fa’amoemoe e tapunia i le itula e 12:00 i le aoauli o le aso Faraile nei.

 

O le afioga i le Minisita Lagolago mo le Soifua Maloloina a Samoa le afioga i le ali’i faipule ia Salausa Dr. John Ah Ching o lo o ta’ita’ia maia le au malaga mai Samoa, lagolagosua i ai le Fa’atonusili o le Vaega o le Soifua Maloloina, afioga Leausa Toleafoa Dr. Take Naseri, ma le to’atele o sui sinia mai ni isi o Ofisa ma Matagaluega a le malo o Samoa, ua fa’amoemoe e fa’aleo so latou sao i lenei fa’amoemoe.

 

O se sauniga lotu puupuu e tatala aloaia ai lenei fonotaga, na ta’ita’ia lea e le susuga Rev. Alapi Eti, o le Ekalesia EFKAS Ierusalemu Fou.

 

O le ulua’i saunoaga o le aso na saunoa i ai le Faatonusili o le Matagaluega o le Soifua Maloloina a Amerika Samoa, afioga Motusa Tuileama Nua, ae taualuga i le saunoaga mai le afioga i le Lutena Kovana ia Lemanu Peleti Mauga.

 

Na taua e le afioga i le ali’i Fa’atonusili ia Motusa le taua o le fa’aauauina o lenei fonotaga mo ni isi tausaga i le lumana’i, e mafai ai ona saili auala e puipuia ai le soifua maloloina o tagata Samoa.

 

I le avea ai o ia ma Fa’atonusili mo le 4 lenei o tausaga, sa ia fa’ailoa ai i le aofia le tele o lu’itau o lo o fetaia’i ma le Soifua Maloloina a Amerika Samoa, ma o lo o taumafai pea le malo i le malosi e gafa ai ina ia saili auala e foia ai ia fa’afitauli.

 

Sa ia fa’aamuia i le malo Tuto’atasi o Samoa ma le auala o lo o fa’afoe ai ana galuega fa’atino, aua e tasi lava le fa’atonu e tu’uina mai i le o lo o avea ma Ta’ita’i ona mafai lea ona fa’atino ni fuafuaga, peita’i o Amerika Samoa, e tatau lava ona mulimulita’i i fa’aiuga e finagalo i ai le malo tele.

 

I le saunoaga a le afioga ia Lemanu, sa ia fa’afetaia ai le tofa na a’e i Ta’ita’i na latou asaina mai le amataga o lenei fa’amoemoe i le 7 tausaga ua tuana’i, lea ua mafai ai ona fa’aauau mai pea e o o mai i le taimi nei.

 

“Afai o auai mai i le fonotaga lenei ni sui sa auai i le ulua’i taimi na fa’avae mai ai lenei fonotaga, o outou la tagata e pito sili ona taua, aua o lo o taoto uma ia te outou fa’amanuiaga eseese e fa’atatau i talanoaga, fetufaaiga atoa ai ma fa’amaumauga na tu’u taliga mai e ta’ita’i na latou asaina maia lenei fa’amoemoe seia oo mai lava i lenei tausaga, fa’amalo finau, fa’amalo fo’i le fa’amalolosi e fa’atino mea lelei mo le atunu’u”, o le saunoaga lea a Lemanu.

 

Na taua atili e Lemanu le taua o lenei fonotaga, lea ua mafai ai ona maua e malo e lua auala e fesoasoani ai i le fa’aleleia o le soifua maloloina o tagata ta’ito’atasi, atoa ai ma le unaia o tagata uma ina ia ola soifua maloloina.

 

“Ana leai lenei fa’amoemoe e pei ona ausia ai tausaga e 7 o lo o fa’agasolo mai pea, atonu e o o mai i le taimi nei e le o tulaga manuia le soifua maloloina a o tatou tagata, peita’i ona o le tele o tulaga manuia ua molimauina i fonotaga fa’aauau a le Soifua Maloloina, ua molimauina ai le siitia o le soifua maloloina o tagata i totonu o Samoa ma Amerika Samoa nei”, o le saunoaga lea a Lemanu.

 

“O la’u fautuaga la i sui usufono uma ua maua le avanoa e fa’atasi mai i lenei fonotaga, e le mafai ona ‘anoa lenei fonotaga pe afai e le tatalaina o outou ofu tau ae fa’asoa le tomai ma le silafia ua outou iloa, ina ia mafai ai ona fa’amanuiaina tatou uma o le a maua le avanoa e fa’alogologo ai lenei fontoaga”, o le isi lea vaega o le saunoaga a Lemanu.

 

I le fa’aiuga o le saunoaga a Lemanu, sa ia fa’afeiloaia ai sui usufono uma mai atunu’u eseese ua maua le avanoa e malaga mai ai i Amerika Samoa, ma ia fa’afetaia ai fo’i i latou uma i le fa’aavanoaina o latou taimi e malaga mai ai e fai so latou sao mo le puipuia o le soifua maloloina o tagata ta’ito’atasi.