Ads by Google Ads by Google

Tatala faitoto'a maota mo vasega & galuega - Iunivesite o le Argosy


O se va'aiga i nisi o le taupulega a le Pulega o le Argosy University i le latou Ofisa autu fa'alotoifale ua tatalaoina nei i le taeao o le aso Lulu i Ottoville, Tafuna. [ata: Leua Aiono Frost]

O le taeo o le aso Lulu na te'a nei na tatala aloa'ia ai loa faitoto'a o le Maota ua fa'amautu atu i ai vasega fa'atautaia ma le Ofisa autu fo'i o le Argosy University i Ottoville, Tafuna ma sa auai fo'i Fa'auluuluga o le Faigamalo a Amerika Samoa, ina ia molimauina lea la'asaga fou ua fa'amauina ae a se la'asaga fou ua fa'amautu nei ina ia u'una'ia  le soifua a'oa'oina o fanau a le atunu'u.

 

O le sauniga i fafo o le Maota, sa ta'ita'ia e le susuga le Faife'au Rev Fouvale Asiata mai le EFKAS i Matuu ma Faganeanea. A'o le Lipine sa o'otia lea e le afioga le Kovana Sili, Lolo Matalasi Moliga, aua o ia sa lalamua i le taumafaiga mai le amataga o lenei fa'amoemoe, ia mautu se fale e faia ai a'oga a le fanau o lo'o saili tusi pasi maualuluga, e le o ofoina mai e le Kolisi Tu'ufa'atasi. O le fofoga o le polokalama sa patino lea ia Fanuatele Dr To'afa Vaiaga'e, Fa'atonu o le Argosy University i Amerika Samoa.

 

O se fiafiaga tele lea o le ali'i Faipisinisi, Avamua Dave Haleck, aua ua ausia se tasi o mo'omo'oga o lona tua'a sa moemiti i ai, a'o ia fa'ato'a le fanua lafulafua, totoina i ai fa'ato'aga e taofiofia ma fa'afuatele mai le laueleele aua ni manuia mo le lautele.

 

"O lenei fanua sa matou va'aia le galueaina e lo matou tama i le vaitausaga 1940, sa taumafai e fa'ato'a e aoga ai le eleele i le fofoga taumafa o le atunu'u, sa aoga, peita'i, ina ua taliu mai i matou mai a'oga, sa ia fa'ailoa lona naunauta'iga e fa'atutu ai ni pisinisi aoga mo le tautuaina o Tutuila ma Manu'a. Fa'afetai, ua alia'i se taofi faufa'atasi ma le Argosy University, o le a avea ma se puna'oa o le atamai mo le lumana'i manuia o Amerika Samoa, avea e saili ai le atamai lautele,” o se saunoaga lea a Avamua Dave Haleck i le taimi o le polokalama.

 

Na tofusao fo'i i latou na malaga mai fafo, o le Pulega a le Argosy University i Hawaii, o i latou fo'i e va'ava'alua ma le Ofisa i Amerika Samoa.

 

Na i ai se tala'aga o le taumafaiga a le Argosy sa fofogaina e Fanuatele, ma sa ia fa'ailoa fo'i le sao o le afioga le Kovana, sa fa'ananau i ai, ina ia fa'ataunu'u e le Argosy.

 

"E i ai mea sa ta'ua soalaupule, ae ua le o'o i ai se taumafaiga, e le tatau ona avea e le Argosy University se pito la'au o lo'o fa'afoe mai e le Kolisi Tu'ufa'atasi o Amerika Samoa. E tatau ona i ai lea va tapuia mai auaunaga, ia le sopoia e le tautua nei. O lea ua taumafai ai pea, na'o i latou ua mae'a maua o latou fa'ailoga AA ma AS e tatau ona ulufale i le tatou nei Iunivesite. Ae ou te fa'afetaia, lou sapaia o mea uma e fa'aulu atu ia te oe se fa'atanaga, aua e maualuga lau silasila i le si'itaga e tatau ona i ai le soifua taumafai ma le a'oa'oina o alo o le atunu'u."

 

O sana lafoga lea, ona tu'u lea o le avanoa i le afioga le Kovana Sili mo lana tautalaga fa'apitoa mo le taeao ua ula.

 

"E tasi se mea ou te fa'ailoa atu, e le afaina po'o a lava feagaiga osia i le va o le tatou Kolisi Tu'ufa'atasi ma le Iunivesite o le Argosy, pau le mea e sili ona taua i ta'ita'i o le tatou Malo lea e galulue ma sasao atu nei, Ia i ai le sa'olotoga i fanau a le atunu'u e tausaili ai o latou fa'ailoga i so'o se matata, ua na'o ni nai kosi e tau'avea, ae ua maua uma kosi e tatau ona tausailia ai latou atamai, aua le malo lea e tatau ona tutula'i mai ai e fa'afoe ia mautu ma atoatoa le tausiga o ona tagatanu'u."

 

E ese mai lea sa ia fa'ailoa lona fiafia, aua ua mautu le nofoaga e tausailia ai tusi pasi maualuluga o le alo o Amerika Samoa, ua fa'amautu atili ai ma lana mau.

 

"O le taimi lenei, ua matu'u atu e le malo i le tagata lava ia, i lona le fa'aaogaina o lona taimi ma le avanoa ua ia maua, e fa'aleleia atili ai lona atamai, ua o gatasi lona agava'a, ma tiute e ao ina ia fa'ataunu'uina, i lana galuega ua filifili e galue ai ma tausaili lona manuia, manuia fo'i mo lona aiga, ekalesia ma lona atunu'u. Ua leai la se toe fa'anoi o i ai, ua mautu ma ua i ai Iunivesite e te utuvai i ai mo le atamai lautele!"

 

Na fa'aluaina fo'i e le susuga le Fa'afeagaiga lea tulaga, ina ua tutula'i mo le toe tatalo e fa'amae'a ai le polokalama matagofie ma le pu'upu'u, "Ia o le fale ua tutula'i, ua matagofie lona tino mai, ua aulelei fo'i ona totoga, peita'i, o le anofale ia silisili ona taua. O se atamai e maua mai i totonu o lenei fale, ia e la'ei ai a'o e galue ma fa'atino ou tiute i so'o se galuega po'o se faiva o le a agava'a e te galue ai."

 

Mai le vasega o le pulega mai Hawaii sa i ai, ua latou ofo fiafia mai, aua o se maota matagpfie ua fa'afaleina ai latou potu a'oga, ua i ai fo'i ma potu o masini komipiuta ma potu fono, o le fogafale muamua o lenei fale atoa ua faatautaia ai nei le Iunivesite, ae mo le taimi nei, ua fa'aaogaina e le FEMA lona fogafalelua mo a latou galuega mo le mamalu lautele ona o afaina i le ‘afa Gita.

 

I lenei fo'i sauniga mamalu e tatala aloa'ia ai le nofoaga ua fa'amautu i ai le Iunivesite o Argosy, ua suia ai nei lona Peresetene i Hawaii, ma ua le va'aia ai le susuga Dr Warren Evans, peita'i ona ua suia nei le peresetene, ua le pa'au mai ai lona sui i le sauniga ae ua malaga uma mai le to'afa o i latou: Dr MilagrosG Handel, o le Administrator lea o lo'o ua tula'i mai. Na malaga mai fo'i ma se asi o alo tama'ita'i o Samoa ua avea nei ma Fa'atonu o Tupe a le Iunivesite i Hawaii atoa ai ma le Financial Aid a le fanau a'oga. O ia lea o Fa'amu Matamatafuaali'i Unutoa, mai le afio'aga o Aua.

 

Sa a'oa'oina o ia i le Samoana High ma fa'au'u mai ai i le 2004, ulufale i le tatou Kolisi Tu'ufa'atasi ma fa'au'u mai ai i le 2006 ma malaga atu ai i fafo e saili lona tusi pasi i le Kosi Su'etusi ma Tausitusi, i le Iunivesite a Chaminade i Hawaii.

 

Pasia lelei ana a'oa'oga ma'ua ia umia nei le Master in Business Administration ma lona BA in Accounting, peita'i ua ia sailia lana galuega i le Argosy Univesity ma amata ai i le tausaga e 2016, lea ua atoa nei le lua tausaga o faigaluega ai o le Director of Finances.

 

Ua 31 tausaga o lona soifua ma ua fiafia tele aua e tele taimi e malaga mai ai fo'i e faia nisi vaega o lana tautua i le Argosy iinei, ma ua sili ona fiafia aua e sau ma asia mai ai fo'i si ona aiga. O ia o le alo tama'ita'i o Matamatafuaalii ma Vaovasa Tuiga Unutoa o Aua.