Ads by Google Ads by Google

Teena Faipule fautuaga e fa’anatinati se fa’aiuga iugafono Senate


Loia a le Fono Faitulafono, susuga Nathaniel Savali. [ata AF]
ausage@samoanews.com

Na teena e le maota o sui i le taeao ananafi se fautuaga na fa’atula’i e ni isi o afioga i Faipule, ina ia fa’aagafua tulafono a le maota, ae tu’uina atu le i’ugafono so’ofa’atasi a le maota maualuga lea na faitauina muamua i le taeao ananafi, e fa’apasia i lona faitauina fa’alua.

 

O le i’ugafono so’ofa’atasi lenei a le maota maualuga, lea na pasia i le aso Lulu na te’a nei i le palota e 14-0, o lo o talosagaina ai suiga i le Fa’avae Toe Teuteu o Amerika Samoa, ina ia mafai ona toe fa’aopoopo nofoa e 2 mo le Itumalo o Manu’a i le maota maualuga, ina ia toe fa’afo’i ai i le to’a 5 nofoa sa i ai i le ulua’i taimi ua mavae.

 

O le mae’a ai ona faitau e le Failautusi o le maota o sui o le ulutala ma le fa’atomuga o le iugafono, na tofia ai loa e le afioga i le Fofoga Fetalai ia Savali Talavou Ale le komiti o Tulafono a le maota o sui, lea o lo o ta’ita’i ai le sui fofoga fetalai ia Fetu Fetui Jr, e taoto atu i ai le iloiloina o lenei mataupu.

 

Na tula’i ai le ta’ita’ifono o le komiti ia Fetu Fetui Jr. ma fa’atula’i le mau, mo se avanoa e fa’aagafua ai tulafono a le maota, ae tuuina mai loa le i’ugafono soofaatasi i totonu mo lona faitauina fa’alua.

 

Saunoa Fetui e fa’apea, e taua tele le iugafono soofaatasi, peita’i ua molimauina le le toe i ai o ni aso fono o totoe e talanoaina ai ma pasia lenei iugafono, ma ua mana’omia ai le fa’aagafua loa o tulafono a le maota, ae tu’uina mai e faitau fa’alua.

 

O le mae’a ai o le talosaga a le sui fofoga fetalai, na poloaina ai loa e le fofoga fetalai le faia o se malologa puupuu a le maota, ae sei talanoaina le mataupu ua taoto i luma o le maota, fa’atasi ai ma lona talosagaina o le loia a le Fono Faitulafono ina ia o o atu e fa’amanino le tulafono e fa’atatau i lenei mataupu.

 

O le afioga i le ali’i faipule ia Vaetasi Tuumolimoli Saena Moliga, o ia fo’i lea o le sui ta’ita’ifono o le komiti o Tulafono a le maota, na mua’i saunoa e fa’atatau i lenei mataupu, ma ia talosagaina ai le maota ina ia taoto le mataupu seia aulia le isi nofoaiga tou o lo o lumana’i mai.

 

“Fa’afetai i le tofa saili i a outou afioga i faipule, ae o le mea moni lava, ua taoto tulafono e lima ta’ita’iina ai galuega fa’atino a le maota, e le tatau fo’i ona toe faia se isi faaiuga e sili atu ma le tulafono ua taoto, o le mafua’aga lea ua ou talosagaina ai lau afioga i le fofoga fetalai ma le maota, tatou talia le fautuaga ua taoto atu, e le tatau lava ona tatou faia se gaioiga e le tusa ma le tulafono, ou te puipui fo’i a’u i lau afioga i le fofoga fetalai ma le mamalu o sui filifilia o itumalo ta’itasi”, o le saunoaga lea a Vaetasi.

 

Na toe fa’atepa e Vaetasi afioga i faipule i se mataupu sa tula’i mai i le lua vaiaso talu ai, ina ua teena e le maota se pili sa fa’aulufale mai ae ua tuana’i aso fono fa’atulafonoina e tatau ai ona fa’aulufale pili fou i luma o le maota, o lona fo’i lena taofi, ia tumau pea le maota i lona aloaia o ana tulafono o lo o lima ta’ita’iina ai ana galuega masani.

 

Na fa’amanino e le Loia a le Fono Faitulafono ia Nathaniel Savali e fa’apea, e le mafai i lalo o le tulafono ona faitau muamua ma toe faitau lua ai se pili i luma o le maota, ae tatau lava ona fa’asolo i lona fa’asologa masani, o le faitau muamua, faitau fa’alua atoa ai ma le faitauga lona tolu ona fa’atoa faia ai loa lea o le fa’aiuga pe pasia pe teena e le maota.

 

A o taumafai le ali’i loia e toe faamanino atili i afioga i Faipule tulaga o le tulafono, ma le taimi e fa’amuta ai loa ona toe fa’aulu se pili i luma o le maota, na tau to’atama’i le Fofoga Fetalai ma ia fa’ailoa i le ali’i loia, o le a tau numi atoa le mataupu ona ua ia talanoa fua i le mataupu e le tatau ona talanoa ai i luma o le maota.

 

I le fa’aiuga o felafolafoaiga a le maota, na pasia ai loa le taoto pea o le iugafono soofaatasi a le maota maualuga i le komiti o mataupu tau tulafono a le maota, seia aulia le isi nofoaiga ona toe sasa’a lea i ai o le tofa a afioga i Faipule.